Musamu wamubwete watina Luka 8 - Musamu Wamubwete 2013

Bakyeetu baba kwenamaana Yesu

¹ Ha mambisa haho, Yesu wayende mu mabvula na mu mabula, mu kwebikisa na kweyaabisa Musamu Wamubwete wa Kimfumu kya Nzaambi, na bo kuumi na boolo baba kintwaari na nde.

² Kwaba se bakyeetu babamosi batsiinikini, mu mampeeve mamabi na mu mabeeru: Mariya wu bateelaa ti Madelene, mu nde mwaparidi mampeeve nsaamu mamabi.

³ Yowana, mukasi kisari kya kikuutu kya Erode kiri nkuumbu Kudza, Sudzane, na bakimi balaka, baba kwebabakisaana mu bi baba na byo.

Nkuma ya mukuni

⁴ Mpuumbu yayinene bu yaba yakutukina, na baatu ba mpisi bvula bari mu kwiisaana kuri Yesu, nde wata nkuma yimayi:

⁵ «Mukuni wayende ku kwenyaka nsaangi dzaandi. Bu kaba mu kwenyaka, nsaangi dzamosi dzabwa ha luteembu lwa nzila, baatu badzidyaata na banoni ba yulu badzitooto.

⁶ Dzakaka dzabwa ha yulu tari, dzamene, ngo dzakana bukuri kyototo kyo pe.

⁷ Dzakaka dzabwa ha kakati dya manseende, byabuuka ha kimosi, ngo manseende madziswetekese.

⁸ Dzakimi dzabwa ha butoto bwabubwete; na miti bu myabuuka myabuta bimbutu ku kinkama.» Yesu ha kabweese kuleele ti: «Wuri na makutu mu kuyuka, hemese kayuka!»

Bukuri nki Yesu kari mu kweyikisa mu mankuma

⁹ Bayiki baandi bamufuula mambangukulu ma nkuma yiyo.

¹⁰ Nde waleele ti: «Kuri beenu baheeri kiteesu kya kuyaaba mpaanu dza Kimfumu kya Nzaambi; ngo kuri bakaka mu mankuma, mpisi heki baba, "bu batala, bahele kumono, na bu bayuka, bahele kubakula."»

Yesu wusundula nkuma ya mukuni

¹¹ Mambangukulu ma nkuma yiyo ngo ma: «Nsaangi ngo maampu ma Nzaambi.

¹² Luteembu lwa nzila ngo baatu bari, bamana kuyuka maampu, ha mambisa haho, dyabulu wiisiri, na yisiri maampu mu mitima mya bo, mu kubata kuri ti bakwiisa kusa kanyi na baba babvuukusu.

¹³ Bari ha yulu tari, ngo babo bari bu bayukiri, bataamburi maampu mu kiminu, ngo kasi bo bahele na myaansi. Bo basa kanyi mu mwaa-ntaangu mosi, ngo mu ntaangu ya nsindukulu basasukiri.

¹⁴ Bibwiiri kunsa manseende, ngo babo bamwaayuka, ngo minyoongi, busina na biminu bya kidziingu bikwebaswetekese mu nzila, na bahele kutubuka ku kuyele.

¹⁵ Bibwiiri ha butoto bwabubwete, ngo babo bayuka maampu, mu mutima wamubwe na wayirima, bamakebe, babuta bimbutu kuri banamitina.»

Nkuma ya mwiinda

¹⁶ «Mukwongo, kuri muutu ko wuri kanamukaana mwiinda wumufukiri kisa, bunu pe wumusuusiri kunsa mbuka; ngo kasi nde lo kumusuusa ha kitetukulu kya mwiinda, mpisi heki bakoto bamono buungi.

¹⁷ Bukuri, kuri kyasweeku ko, kihele kuba kyamonokono; na kuri nsweeki ko, yihele kuba yayabakina na pwelelee.

¹⁸ Hango, seenee madyeele mu nyukulu yeenu; bukuri kuri wunde wuri na kitotolo, sa bamuha; ngo kuri wunde wahele na kitotolo, na ki katsimini kubaka, sa bamuholo na kyo.»

Nguri na bampaangi ba Yesu

¹⁹ Nguri na bampaangi ba Yesu bayisa kuri nde, ngo basii bangusina kukokosolo nkati-nsi na nde ko, mu ntoono mpuumbu.

²⁰ Bamuyaabisa ti: «Nguri ye na bampaangi ba ye bari ku mbasi, na batiiri kumono ye.»

²¹ Yesu wabvutula, waleele kuri bo ti: «Nguri me na bampaangi ba me ngo babo, bayuka maampu na bamasalila.»

Yesu wadzuunisa kiteembu

²² Kiluumbu kimosi Yesu wanwaata mu bwaatu na bayiki baandi. Nde waleele kuri bo ti: «Tusabukeenu ku simu dya mubu.» Na bo bayende.

²³ Bu baba mu kweyende mu mubu, Yesu wabwa tolo. Kiteembu kyamakwa kyayisa mu mubu; bwaatu bwaba bweki dyaama, na bo beki mu nsisi.

²⁴ Bu bakokosolo, basiimbila Yesu na bamuleele ti: «Muyikisi, muyikisi, beetu tufuukiri.» Bu kasiimbuka, nde waŋaŋana kiteembu na mipaku myamakwa, na byo byahoto, na kidzuunu kyamonoko.

²⁵ Nde waleele kuri bo ti: «Kanyi dya beenu kuri diri?» Bo babwiilikila boomo, bakimuka na balelesene bo na bo ti: «Bee sa nde na kari, kuri lo nde wutuma na biteembu na maampa, na byo bimutambukila?»

Yesu watsinikisa muutu waba na mampeeve mamabi

²⁶ Bo batubuka ku nsi bari Ngeraseno, yiri simu na simu na Ngalili.

²⁷ Bu kasunduka ha nsi, muutu mosi waba na mampeeve mamabi, wayisa mu kumubwaana. Kuholosono na kidzika, nde waba wahele kwelwaata binkuta. Nde kaba dzakalaana munsa nzo ko, ngo kunsa mampeembe.

²⁸ Bu kamono Yesu, wafula misaakulu myamakwa, wabwa ha busu bwa nde, na mu mbeembu yayinene nde waleele ti: «Nki ha kakati dya me na ye, Yesu Mwaana Nzaambi Mwaa-yulu? Me nyikuyingukila, yaa kwaamisa me ko.»

²⁹ Bukuri Yesu waba tuma kuri mpeeve yayibi, mu kupala mu muutu wunde. Mukwongo, mbala dzalaka mpeeve yiyo yaba musiimbaana. Baba mukaangaana mu masyeene na mu biseengu mu kumukebe; ngo kasi lo wubitaandula. Mpeeve yayibi yiyo yaba munataana mu mansi mankatu.

³⁰ Yesu wamufuula ti: «Ye nkuumbu na?» Nde wabvutula ti: «Mukaangu», bukuri mampeeve mamabi malaka maba makoto mu nde.

³¹ Mampeeve mamo maba yingukila Yesu, mpisi heki nde kahele kumatuma mu kweende ku lubila.

³² Ha teke haho, kwaba mpuumbu bangulu yayinene, yaba ku yulu mulaandu. Mo mamuyingukila mpisi kamaha miswa makoto mu bangulu babo. Yesu ha kamaha miswa.

³³ Mampeeve mamabi bu mapala mu muutu wunde, makoto mu bangulu. Mpuumbu bangulu yabununa ku nsuku mulaandu, yabwa mu mubu, na yadyaama.

³⁴ Batari ba bangulu, bu bamwiini mayirimini, bayitika na bayende kweyaabisa kunsa bvula na mu mabula.

³⁵ Baatu bapala mu kumono mayirimini, bayisa kuri Yesu na bamono muutu wapariri mampeeve mamabi, walwaata, wamutsiina na wadzakala ha miilu mya Yesu. Bo bamono boomo.

³⁶ Babo bamwiini mamo, babayaabisa dyaburi babvuukisiri muutu wunde, waba na mampeeve mamabi.

³⁷ Baatu bobanso ba nkoonsi ya Ngeraseno, baleele kuri Yesu ti keende la na bo, bukuri bo baba beki na boomo bwalaka. Nde wakoto mu bwaatu na wabvutuka.

³⁸ Muutu wapariri mampeeve mamabi, wabeke kuyingukila Yesu, mu kuri ti keba na nde; ngo nde wamubvutula, wamuleele ti:

³⁹ «Bvutuka ku nzo yaaku, na yaabisa momanso ma yirikiri Nzaambi kuri ye.» Muutu wunde wayende mu kweyaabisa kunsa bvula dyodinso, momanso mamuyirikiri Yesu.

Mukyeetu mosi wabelemene kinkuta kya Yesu, na mwaana Yayiro wafuluka

⁴⁰ Mu ntaangu ya bvutukiri Yesu, mpuumbu yamubwaana; bukuri bobanso baba mukiingaana.

⁴¹ Na mono, muutu mosi wayisa, nkuumbu yaandi Yayiro, nde waba mukuutu nzo-nkutukunu. Bu kabwa ha miilu mya Yesu, wamuyingukila mu kweekoto mu nzo nde,

⁴² bukuri mwaana ndemosi, wu kaba na nde wa mukyeetu, wa mvula kampe kuumi na dzoolo, waba weki mu kufwa. Yesu bu kaba mu kwekwese, mampuumbu bamusiila mfina.

⁴³ Haho, mukyeetu mosi waba kwepalaana makila mu kiteesu kya mibvu kuumi na myoolo, nde wamana lubaku lwaandi lwolunso mu myooko mya bangaanga, ngo ti mosi yasii bangusina kumutsiinikisa ko.

⁴⁴ Bu kakokosolo ku mambisa, nde wabelemene heengu dya kiyuungu kya Yesu, na ha nsi na nsi, mbeeru makila kupala yawa.

⁴⁵ Yesu waleele ti: «Na belemini me?» Bobanso batuna, na Petelo waleele ti: «Muyikisi, mampuumbu mari mu kukusiila mfina na makusweeteke.»

⁴⁶ Ngo Yesu waleele ti: «Muutu belemini me, bukuri me nyaabiri ti mpinu dzipariri mu me.»

⁴⁷ Mukyeetu kamonaa ti bamuyaabiri, wayisa kuri wukwetekete, wabwa ha busu bwa Yesu, waleele ha busu bwa baatu bobanso, mu nkya ntoono nde kamubeleminye, na dyaburi nde katsiinikini ha nsi na nsi.

⁴⁸ Yesu waleele kuri nde ti: «Mwaana me wa mukyeetu, kanyi dyaaku dikubvuukisiri. Yende mu kiyeengi.»

⁴⁹ Yesu bu kaba wakiri mu kudzoonso, muutu mosi wafumuna ku nzo mukuutu nzo-nkutukunu, waleele ti: «Mwaana ye mwaafwa, yaa bweese kukwaamisa kwaandi muyikisi ko.»

⁵⁰ Yesu bu kayuka, wabvutula kuri nde ti: «Yaa ba na boomo ko, sa dini kanyi, nde beebvuukiri.»

⁵¹ Bu batubuka ku nzo, nde kasii ha miswa ko ti, muutu ti mosi kakoto, ha yulu wuni Petelo, Yowane, Yakobo, na taayi na nguri ba mwaana.

⁵² Bobanso baba dilaana na baba nyoongaana mu ntoono mwaana. Yesu waleele ti: «Yaa ludila ko, bukuri mwaana wahele kufwa, ngo wuri tolo.»

⁵³ Ngo baatu bamusiila munsiku, bu baba bayaari ti wafwa.

⁵⁴ Yesu bu kakwaata kooko kwa mwaana, wabikisa, waleele ti: «Mwaana, siimbika!»

⁵⁵ Kiluunsi kya mwaana kyabvutuka mu nde, na ha nsi na nsi, nde wateleme. Yesu watuma ti bamuha bya kudya.

⁵⁶ Taayi na nguri ba nde bakimuka. Ngo Yesu wabadika ti yaa baleele kuri muutu ti mosi ko, mamo mayirimini.