Musamu wamubwete watina Luka 7 - Musamu Wamubwete 2013

Yesu watsinikisa kisari kya mukuutu bayongolo

¹ Yesu kamana kudzoonso maampu mamo kuri mpuumbu baatu, ha wakoto ku Kafarnawumi.

² Mukuutu nkama bayongolo waba na nkutu mosi ya mutima, yaba yabeele na yeki mu kufwa.

³ Bu kayuka badzoonsolo mu Yesu, nde waheeke bakulu ba babakala ba Bayudayo kuri Yesu, mu kumuyingukila, mpisi kiisa kabvuukisa nkutu yiyo.

⁴ Bo bu batubuka kuri Yesu, bamuyingukila nkati mu kifiki na baleele ti: «Muutu wu wayelemene mu kuri ti ye muyirikila mamo;

⁵ bukuri nde tiiri kaanda dyeetu, na watutuungula se na nzo-nkutukunu.»

⁶ Yesu ha kayende kintwaari na bo. Yesu kabaanaa weki bebele na nzo, mukuutu nkama bayongolo waheeke banduku baandi mu kuleele kuri Yesu ti: «Mfumu, yaa wiisa kwaandi ko, bukuri me nyahele kukuka mu kuri ti ye koto mu nzo yaami.

⁷ Mu didyo, me mwiinyee ti nyahele kuyelemene mu kwiisa me-meene ku wuri ye. Ngo leele kwaandi ntoono mosi, lo kisari kya me bwee kitsiinikini.

⁸ Mukwongo, me se nyiri muutu wuri kunsa lutumu lwa mukuutu, na me se nyiri na bayongolo bari kunsa lutumu lwa me. Me ndeelaana kuri mosi ti: "Yende", lo weensi; kuri wakaka ti: "Wasa", lo wiisiri, kuri nkutu yaami ti: "Sa bumabu", lo siiri.»

⁹ Yesu bu kayuka mamo, wamuha masiiku, na bu kasyeeteke kuri mpuumbu yaba kwemunama, waleele ti: «Me nyiluleele ti, me nyamwiini kwaami mu Isaheli, kanyi dya bumabu ko.»

¹⁰ Baatu babasiindikiri babo babvutuka ku nzo, bamono nkutu kuri watsiinika.

Yesu wafulukisa mwaa-munkuula mosi ku Nayini

¹¹ Ha mambisa haho, Yesu wayende ku bvula dimosi diri nkuumbu Nayini. Bayiki baandi na mpuumbu baatu yayinene se bayende na nde.

¹² Mu ntaangu yi kaba weki kokosolo na mweelu bvula, mono, baba beki kweedziika muutu wafwa, mwaana ndemosi mu nguri yaandi, yaba yiri se mufwiiri. Mpuumbu yafwaana yaba kintwaari na nde.

¹³ Mfumu bu kamumono, wamubakila ngebe, na wamuleele ti: «Yaa dila ko!»

¹⁴ Yesu kakokosolaa, belemini sanduku. Banati bateleme, na nde waleele ti: «Mwaa-munkuula, me nyikuleele ti siimbika!»

¹⁵ Waba wafwa ha kadzakiri, na bekiri kudzoonso. Yesu ha kamubvutiri kuri nguri yaandi.

¹⁶ Bobanso boomo bwababwiilila, bakeembese Nzaambi, na baleele ti: «Mubikiri wamunene telemini ha kakati dya beetu!» Na ti: «Nzaambi wiisiri mu kubakisa baatu baandi!»

¹⁷ Ntoono yitariri Yesu yiyo, yatsamukina mu Yudaya dyodinso, na mu nkoonsi yoyinso.

Yowane Mubotiki waheeke bantumu kuri Yesu

¹⁸ Bayiki ba Yowane bayaabisa momanso mamo kuri nde. Yowane bu kateele boolo mu bayiki baandi,

¹⁹ ha kabaheeke kuri Mfumu, mu kumufuula ti: «Ye ngo wunde wukwiisa, hoti beetu tukiinga mukimi?»

²⁰ Bu batubuka kuri Yesu, baatu babo baleele ti: «Yowane Mubotiki wutuheekiri kuri ye, nde ti: "Ye ngo wunde wukwiisa, hoti beetu tukiinga mukimi?"»

²¹ Mu kilookolo kinikyo, Yesu watsinikisa baatu balaka baba na mabeeru, baba na bipfuumi, baba na mampeeve mamabi, na wasa kuri ti balaka baba bafwa miisu bataambula bweese bwa kwemono.

²² Tumi nde wabvutula kuri bo ti: «Bu lubvutuka yaabiseenu kuri Yowane mamo ma lumwiini na ma luyukiri: bafwa miisu bari mu kumono, bikata biteleme, babeele bwaasi batsyeemeke, bafwa makutu bayuka, bafwa bari mu kufuluka, na bawelu bari mu kutaambula Musamu Wamubwete.

²³ Kiminu kuri wunde wuhele kubwa mu ntoono me!»

²⁴ Bantumu ba Yowane bamanaa kubvutuka, Yesu wabeke kudzoonso kuri mampuumbu mu ntoono Yowane ti: «Nki beenu lweensyee kumono ku nsi yankatu? Dyaari dyanyingusu mu kiteembu?

²⁵ Heki nki beenu lweensyee kumono? Muutu walwaata binkuta byabibwete? Hambeti, balwaataa binkuta byabibwete, na bari mu lwambwe mu manzo ma bambyaasi bakoobaanaa.

²⁶ Heki nki lweensyee kumono? Mubikiri? Heehe, me nyiluleele ti nde bvuriri na mubikiri.

²⁷ Mu ntoono ya nde, diri dyatinu ti: "Mono, me nyiheeke munati-mukeensu waami ku mankula ma ye, nde wuyirika nzila yaaku, ku mankula ma ye."»

²⁸ «Me nyiluleele ti, mu babutuka mu bakyeetu, kwahele wubvuriri bukuutu na Yowane; ngo wubvuriri bulesi mu Kimfumu kya Nzaambi, bvuriri bukuutu na nde.

²⁹ Baatu bobanso bayukiri, na batori ba mpaku se, bamono dyo ti Nzaambi wasuunguma, na bataambula mbotokulu ya Yowane.

³⁰ Ngo nkasi, Bafarisi na batina ba mangisi, babisiri maba matiiri Nzaambi mu bo, na bahele kutaambula mbotokulu kuri Yowane.»

³¹ Na ba na, «me nyiyelekese baatu ba kiseendu kimaki, na ba na bo bari bafwanikina?

³² Bo bafwanikina na mwaa-baala bari badzakala ha kibeendu kya bobanso, babamosi bari mu kubikisaa kuri bakaka, baleele ti: "Beetu twasikiri nseembe mu beenu, ngo kasi beenu lwaasii kina ko; beetu twayimbiri mikuunga mya lufwa, ngo kasi beenu lwaasii dila ko!"

³³ Mukwongo, Yowane wayisa, wahele kwedya byandya, na wahele kwenwa malu; beenu luleele ti: "Nde wuri na mpeeve yayibi!"

³⁴ Mwaana muutu wayisa, wukwedya na wukwenwa; beenu luleele ti: "Monee ngaa-lutee lwa kudya, na yaa-kinwi, nduku batori ba mpaku na bangaa-masumu!"

³⁵ Bobanso bari na madyeele, bamonaa kuri ti madyeele masuunguma.»

Yesu mu nzo Simoni Mufarisi

³⁶ Mosi mu Bafarisi wateele Yesu mbila mu kudya kintwaari na nde. Nde bu kakoto mu nzo, walaambula miilu mu kudya.

³⁷ Na mono, mukyeetu mosi, ngaa-masumu, waba kunsa bvula, bu kayuka ti Yesu wuri mu kudya mu nzo Mufarisi, wanata yuku dya mananaasi.

³⁸ Bu kaba ha mbisa miilu mya Yesu, wabeke mu kudila na kuboloso miilu mya Yesu mu mansangasa, wayaala myo mu mfu dza mutu waandi, waminyumutina, na wakila myo mananaasi.

³⁹ Mufarisi watumisini Yesu bu kamono bubwo watsima kunsa mutima ti: «Muutu wu ngo kabeeri mubikiri, nkani nketi kuyaaba mukyeetu wuri mu kumubelemene wumawu na kari, na nkya nzelu kari na yo, bukuri ngaa-masumu.»

⁴⁰ Yesu wabvutula kuri nde ti: «Simoni, me nyiri na di nyikuleele.» Simoni waleele ti: «Muyikisi, dzoonso kwaaku.»

⁴¹ «Baatu boolo baba na kibiimbu kuri musoombisi-mboongo mosi. Watete waba na kibiimbu kya nkama taanu dza bidenali, ngo wakaka makuumi mataanu.

⁴² Bu baba bwa kubvutukila pe kibiimbu, nde wabahemesene boboolo. Mu boboolo babo na wubvula kumutya?"

⁴³ Simoni wabvutula ti: "Me tsimini ti wubabvuriri kuhemesene." Yesu waleele kuri nde ti: "Ye heeri mvutu yayibwete.»

⁴⁴ Yesu bu kasyeeteke kuri mukyeetu, ha kaleele kuri Simoni ti: «Ye wumono mukyeetu wumawu? Me nkotirye mu nzo ye, ngo ye sii haanaa me maampa ma kuswaaka miilu; kasi nde bolisiri miilu mya me mu mansangasa maandi, na yaariri myo mu mfu dzaandi.

⁴⁵ Ye sii nyumutinaa me ko; ngo kasi nde, kipilu kinkotirye me, nde wahele kuhoto mu kunyumutina miilu mya me.

⁴⁶ Ye sii yitilaa me maasi mu mutu ko; ngo kasi nde yitiri mananaasi mu miilu mya me.

⁴⁷ Mu ntoono yiyo me nyileele kuri ye ti: Masumu ma nde malaka meki mahemusunu, bukuri nde soongiri ntiilu yalaka. Ngo kuri wunde wubahemisini kwantele, lo ntiilu yi kasoongo se yantele.»

⁴⁸ Tumi Yesu waleele kuri mukyeetu ti: «Masumu maaku meki mahemusunu.»

⁴⁹ Baba dyanaa kintwaari na nde, baleele mu bo-meene ti: «Nkya muutu wumawu wu kwehemesene na masumu?»

⁵⁰ Yesu wabweese kuleele kuri mukyeetu ti: «Kanyi dyaaku dikubvuukisiri; yende mu kiyeengi.»