Musamu wamubwete watina Luka 3 - Musamu Wamubwete 2013

Nyikusulu dza Yowane Mubotiki

¹ Mu mubvu wa kuumi na mitaanu, wa kimfumu kya Tiberyo Kayisari, Pontyo Pilato waba mutumi mu nkoonsi ya Yudaya, Erode waba mutumi mu nkoonsi ya Ngalili, Filipo mpaangi yaandi mutumi mu nkoonsi ya Iturayo na nkoonsi ya Tarakoniti, na Lisanya waba mutumi mu nkoonsi ya Abilene,

² Ana bo na Kayafa baba bakuutu ba bangaanga-nzaambi. Mu ntaangu yiyo Nzaambi wadzoonso kuri Yowane, mwaana Dzakariya, mu nsi yankatu.

³ Yowane wayende, mu nkoonsi yoyinso ya Yorodani, mu kwebikisa mbotokulu ya nyiingulu madyeele, mu mpemusunu masumu.

⁴ Bunu bu diri dyatinu, mu mukaanda maampu wa Esaya mubikiri ti: «Mbeembu ya wunde wukwebikisa mu nsi yankatu: Yirikeenu munsaku Mfumu, suungukeenu manzila maandi!

⁵ Mpisi beenge sa dyaba dyadzibukulu, mpisi mulaandu na mpisi mukutu sa kaba wakululu; mankoondoko sa maba masuunguku, na manzila mari mikumbukutu sa basa mo kidende.

⁶ Na baatu bobanso, sa bamono mvuukulu ya Nzaambi.»

⁷ Yowane, waba leelaana kuri mampuumbu, maba kweendaana kuri nde, mu kubotoko ti: «Kitsuumbu kya bampiri, na wulusoongiri bwa kuyitikila nkesi dziri mu kwiisa?

⁸ Ngo soongeenu biyiriki byayelemene na nyiingulu madyeele, na yaa lubaandika kweleele mu beenu-meene ko ti: "Taayi dya beetu Abalaami", bukuri me nyileele ti: mu matari ma, lo Nzaambi telemisi baala kuri Abalaami!

⁹ Ngo kikuba kyeki kyasuusa, ha yulu myaansi mya muti: mpisi muti wahele kubuta bimbutu byabibwe, lo wa kutabula na wa kutuba ku mbaawu.»

¹⁰ Mampuumbu maba kumufuulaa ti: «Heki beetu ki tuyelemini kusa?»

¹¹ Nde wabvutula, waleele kuri bo ti: «Wunde wuri na binkuta byoolo, kaha kyamosi kuri wahele na kyo; wunde se wuri na byandya kasa bwobumosi.»

¹² Batori ba mpaku se, bayisa mpisi bababotoko, na baleele kuri nde ti: «Muyikisi, heki beetu nki tuyelemini kusa?»

¹³ Nde wabvutula kuri bo ti: «Yaa lwefutusa bibvuriri na bibyo bi bari balutuma mu kusa ko.»

¹⁴ Bayongolo se bamufuula ti: «Heki beetu nki tuyelemini kusa?» Nde waleele kuri bo ti: «Yaa ludzika kya muutu mu makwa ko, na yaa lufutukila muutu ko; ngo monee kiminu mu mufutu wa beenu-meene.»

¹⁵ Baatu baba kwekiingaana, na kweha bifuuri kunsa mitima myaaku, mu ntoono Yowane, ti kampe nde ngo Kiristo.

¹⁶ Yowane wabvutula, waleele kuri bobanso ti: «Me nyilubotoko mu maampa; ngo wunde wubvuriri makwa na me, wuri mu kwiisa. Me nyahele kukuka, ti mu kunyanguna misiinga mya masapaatu ma nde. Nde sa kalubotoko mu Mpeeve Yangisi na mu mbaawu.

¹⁷ Nde wuri na kiyengese kyaandi, mu kooko kwaandi, mu kukoombolo mbasi yaandi, na kukutikisa mankono ku yulu talaka dyaandi, ngo kasi, bitiiti sa kabiyoko ku mbaawu yiri yadzimaa ko.»

¹⁸ Mu nsyamusunu dzikimi, dzalaka Yowane kaba kweyaabisila Musamu Wamubwete kuri baatu.

¹⁹ Ngo Yowane waŋaŋini Erode mutumi nkoonsi, mu ntoono Erodyade mukasi mpaangi yaandi, na mu momanso mamabi ma kayirikiri.

²⁰ Ha yulu momanso, Erode kaholaa kaangiri Yowane mu boroko.

Mbotokulu Yesu

²¹ Baatu bobanso bamana kutaambula mbotokulu, Yesu se bamubotoko. Bu kaba mu kusaambila, yulu dya dzibuma,

²² na Mpeeve Yangisi yakulumuka ha yulu nde, mu kifwaani kya beembe, na mbeembu mosi yadzoonso ku yulu ti: «Ye ngo mwaana waami wa mutima, me nyimonaa kiminu mu ye.»

Muloongo kinkaaka kya Yesu

²³ Yesu waba, kampe na makuumi matatu ma mibvu, bu kaba baandika kisalu kyaandi. Nde waba bunu bu bwaba kwetsimaana baatu ti mwaana Yosefi, waba mwaana Eli,

²⁴ mwaana Matata, mwaana Levi, mwaana Meleki, mwaana Yanayi, mwaana Yosefi,

²⁵ mwaana Matatya, mwaana Amosi, mwaana Nawumi, mwaana Eseli, mwaana Nangayi,

²⁶ mwaana Maata, mwaana Matatya, mwaana Semeyi, mwaana Yoseki, mwaana Yoda,

²⁷ mwaana Yowanane, mwaana Eresa, mwaana Dzorobabele, mwaana Salatyeli, mwaana Neri,

²⁸ mwaana Meleki, mwaana Adi, mwaana Kosame, mwaana Elemadame, mwaana Ere,

²⁹ mwaana Yesu, mwaana Elyedzere, mwaana Yorime, mwaana Matata, mwaana Levi,

³⁰ mwaana Simehoni, mwaana Yuda, mwaana Yosefi; Yosefi mwaana Yoname, mwaana Elyakimi,

³¹ mwaana Meleya, mwaana Mena, mwaana Matata, mwaana Natani, mwaana Davidi,

³² mwaana Yesayi, mwaana Yobede, mwaana Bwese, mwaana Sala, mwaana Naasoni,

³³ mwaana Aminadaba, mwaana Ademine, mwaana Areni, mwaana Eseromo, mwaana Fare, mwaana Yuda,

³⁴ mwaana Yakobe, mwaana Isaki, mwaana Abalaami, mwaana Tara, mwaana Nakore,

³⁵ mwaana Seruke, mwaana Lagawu, mwaana Faleki, mwaana Ebere, mwaana Sala,

³⁶ mwaana Kayiname, mwaana Arfaka, mwaana Seme, mwaana Nowa, mwaana Lameke,

³⁷ mwaana Matusaleme, mwaana Enoki, mwaana Yareti, mwaana Malelehele, mwaana Kayiname,

³⁸ mwaana Enose, mwaana Sete, mwaana Adami, mwaana Nzaambi.