Musamu wamubwete watina Luka 24 - Musamu Wamubwete 2013

Mfulukulu Yesu

¹ Kiluumbu kyatete mu lumiingu, mu minkyeelu mya bwiisi, bakyeetu bayende ku mampeembe na banata milolongo mya maasii mi bayirikiri.

² Bamono tari dyaba dyaduka bulu dyeki dyanengumusu.

³ Bu bakoto, basii mono nyutu Mfumu Yesu ko.

⁴ Bu baba beki bwakusiila kuyaaba pe, mono, babakala boolo balwaata binkuta bikweseme, bateleme ha busu bwa bo.

⁵ Babwiilikila kinkuuka, na bayilimisa mabusu mu nsi. Babakala babo babaleele ti: «Buri luri mu kwesaka muutu wamwooyo ha kakati dya bafwa?

⁶ Kasiiryee ha ko, ngo fulukiryee mu bafwa. Baambukeenu mwooyo dyaburi nde kaba luleele, ha kaba kakiri ku Ngalili.

⁷ Nde waba kweleelaa ti: "Mwaana muutu yelemini kuba wayekulu mu myooko mya bangaa-masumu, kuba wakomunu ha yulu kuruwa, tumi kiluumbu kyabitatu nde kafuluka."»

⁸ Bo babaambuka mwooyo mu maampu maandi.

⁹ Bu bafumuna ku mampeembe, bo bayaabisa momanso mamo kuri bo kuumi na mosi na kuri bobanso bakaka.

¹⁰ Kwaba Mariya Madelene, Yowana na Mariya wa nguri Yakobo, na bakaka se baba kintwaari na bo. Bo bayaabisa mamo kuri bantumu.

¹¹ Ngo bantumu bamono ti maampu mamo ma biwobiri, na babisa kusiila kanyi mu mo.

¹² Ngo Petelo, katelemaa, dzumini ku mampeembe, na bu kayilimina, wamono bini bisila; tumi nde wabvutuka ku nzo yaandi kunsa nkimukunu, ya mamo mayirimini.

Mu nzila Emawusi

¹³ Mono, mu kiluumbu kinikyo, boolo mu bo, baba kweende ku bula buri nkuumbu Emawusi, bwaba kibeensi na Yerusalemi, kampe mu bilookolo byoolo bya kudyata.

¹⁴ Bo baba kwedzoonsolo mu ntoono misamu myominso myayirimini, mimyo.

¹⁵ Bu baba mu kweyolo na kwekalikisa, nde-meene Yesu se wakokosolo, wabvuuta nzila na bo,

¹⁶ ngo kasi miisu mya bo bunu myaba na lumvuungulu, mu kuhele kumuyaabila.

¹⁷ Nde waleele kuri bo ti: «Nki misamu luri mu kwedzoonso bu lukweyende?» Bo bateleme bunu bari na ngebe.

¹⁸ Mosi mu bo nkuumbu Kelehopa, wabvutula waleele kuri nde ti: «Buri wunu ye mu badzakala ku Yerusalemi, wahele kuyaaba misamu miyiriminyee mu biluumbu bimabi?»

¹⁹ Nde wafuula kuri bo ti: «Nki myo?» Bo bamuleele ti: «Mitariri Yesu wa ku Nadzareti, wabeeri mubikiri wampinu mu biyiriki na mu nzoonsulu, ha busu bwa Nzaambi, na ha busu bwa baatu bobanso.

²⁰ Dyaburi bakuutu ba bangaanga-nzaambi na bamfumu ba beetu bamukesiri mukanu wa lufwa, na bamukomini ha yulu kuruwa.

²¹ Beetu twabee na nsiitu ti kampe nde wukuula Isaheli; ngo ha yulu myominso mimyo, kiluumbu ki kyeki kyabitatu kuholosono kwabwiiri misamu mimyo.

²² Ti hayuku babamosi mu bakyeetu, batuleeriryee mya nkimukunu. Bu babee bayende ku mampeembe mu minkyeelu mya bwiisi,

²³ basii mono nyutu yaandi ko, ha babvutukiryee, na kuleele ti bambasi babamonikinyee, na babaleeriryee ti nde wuri mwooyo.

²⁴ Babamosi mu beetu se bu beensyee ku mampeembe, bamwiinyee bunu bu beleele bakyeetu, ngo nde bahele kumumono.»

²⁵ Yesu waleele kuri bo ti: «Ha! Baatu bahele na madyeele, na bahele na mawasu mu kusiila kanyi, mu myominso myaleele babikiri.

²⁶ Buri bwabee bwahele kuyelemene ti Kiristo kamono mpasi, na kakoto mu nkeembu waandi?»

²⁷ Nde ha kababangukula misamu mitariri nde-meene, miri mu Matinu momanso, kubandikila Moose natee mu babikiri.

²⁸ Bo bakokosolo bebele na bula bu babakweende; ngo nde waba weki sa bunu wuluta nzila.

²⁹ Bo bamukabukisa, baleele ti: «Wasa ba na beetu, bukuri yeki nsinsika na bwiisi buyiriri.» Nde wakoto mu kuba kintwaari na bo.

³⁰ Bu kaba walaambula miilu mu kudya kintwaari na bo, nde waholo mpa, wasakumuna, wabukuna na wabaha.

³¹ Haho miisu mya bo myadzibumini na bamuyaabiri, ngo kasi nde ha kadziimburi ha busu bwa bo.

³² Bo balelesene wamosi kuri wakaka ti: «Buri ye bee monaa mutima mambaawu ko, bu kabee kwetudzoonsilaa mu nzila, na kutubangukila Matinu?»

³³ Bo bateleme mu kilookolo kinikyo, babvutuka ku Yerusalemi, na babweese kumono bo kuumi na mosi, na baatu bakimi kintwaari na bo.

³⁴ Babo baleele ti: «Nkati ngwanwa Mfumu wafuluka, na Simoni wumumwiinyee.»

³⁵ Na bo se bayaabisa ma babwanikina na mo mu nzila, na dyaburi bo bamuyaabiryee ha kabee bukuna mpa.

Yesu wamonokono kuri bayiki baandi

³⁶ Bu baba mu kuleele bubwo, nde wateleme ha kakati dya bo, na wabaleele ti: «Kiyeengi kuri beenu!»

³⁷ Bo babwilikila kinkuuka na bamono boomo, bukuri bu baba tsima ti kikimbila bamwiini.

³⁸ Ngo nde wabaleele ti: «Buri lweki na hele-hele, na buri luri na maketi-keti mu mitima myeenu?

³⁹ Taleenu myooko mya me, na miilu mya me, wu nkati me-meene nyiri; beleminee me, na yirikee kunkyeese, kikimbila kikobaanaa na muswinyi na miyisi ko, bunu bu luri mu kumono mu me.»

⁴⁰ Bu kari mu kwedzoonso bubwo, wabasoongo myooko na miilu.

⁴¹ Ngo bu baba bakiri kanyi kusiila pe, mu ntoono kiminu, na bukuri bamono nkimukunu, nde wabafuula ti: «Buri luri na bya kudya hamaha?»

⁴² Bo, bamuha kitsuri kya nsu kyayoku.

⁴³ Bu kaholo, wakidya ha busu bwa bo.

⁴⁴ Tumi wabaleele ti: «Mamama ngo maampu ma nyabee luleelaana, mu ntaangu yi nyabee nyakiri na beenu ti: "Myominso myatinu mu ntoono ya me, mu mangisi ma Moose, na mu babikiri natee mu mikuunga, miyelemini kweende mu mana.»

⁴⁵ Nde wadzibula madyeele ma bo, mpisi babakula Matinu.

⁴⁶ Na wabaleele ti: «Bunu bu diri dyatinu: Kiristo sa kamono mpasi, na sa kafuluka mu bafwa mu kiluumbu kyabitatu,

⁴⁷ na nyiingulu madyeele, mu mpemusunu ya masumu, sa yaba yayaabisa mu nkuumbu yaandi, kuri makaanda momanso, kubandikila ku Yerusalemi.

⁴⁸ Beenu luri bambaangi mu mamama.

⁴⁹ [Mono,] nyiheeke kuri beenu bibyo byasa Taayi dyaami nsiilulu. Dzakileenu munsa bvula natee ku lutaamburi beenu mpinu dza ku yulu.»

Yesu wanwaata ku yulu

⁵⁰ Tumi Yesu wanata bayiki baandi [ku mbasi] natee bebele na Betanya; na bu kanaanguna myooko myaandi, wabasakumuna.

⁵¹ Bu kaba mu kubasakumuna, nde wahaambuka na bo, na wanaangunu ku yulu.

⁵² Na bo bamana kumusaambila ha babvutukiri ku Yerusalemi na kiminu kyalaka.

⁵³ Bo, mu mantaangu momanso baba namitinaa kuba mu Nzo-nzaambi mu kudumusa Nzaambi.