Musamu wamubwete watina Luka 2 - Musamu Wamubwete 2013

Mbutukulu Yesu

¹ Mu biluumbu bibyo, Kayisari Oguste wapalisa lutumu lwa kusa ntaangulu baatu bobanso bari ha butoto.

² Ntaangulu baatu yatete yiyo yasalimini mu ntaangu yiri Kirinyo waba ngoforo mu nsi ya Sirya.

³ Baatu bobanso baba kweendaana kukwetinima, muutu-muutu ku bula bwa nde-meene.

⁴ Na Yosefi, wayisika ku bula bwa Nadzareti, mu nsi ya Ngalili, na watoomboko mu kweende ku nsi ya Yudaya ku bula bumosi bwa Davidi buri nkuumbu Beteleemi, bukuri nde waba wa mu kaanda na mu nzo ya Davidi.

⁵ Yosefi wayende kukwo mu kweetinama bo na Mariya, nduku yaandi ya lulelusunu lwa makweele, waba weki na yimi.

⁶ Mu ntaangu yi baba kukwo, biluumbu bya Mariya bya kubuta byatubuka.

⁷ Nde wabuta mwaana waandi wa mubakala watete. Nde wamudziinga mansaanda na wamuneŋesene munsa kidiilulu kya bibulu; bukuri bo basii baka kibeendu ko mu nzo banzeense.

Mbasi na batari ba bibulu

⁸ Mu nkoonsi yiyo, kwaba batari ba bibulu baba kwedzakalaana ku bibiti, mu kwekebe bibulu bya bo butsuku.

⁹ Mbasi mosi ya Mfumu yateleme ha mankula ma bo, na nkeembu ya Mfumu yabafuka kunsa buungi na kinkuuka kya babwiilikila.

¹⁰ Ngo mbasi yaleele kuri bo ti: «Yaa luba na boomo ko; bukuri me nyiluyaabisa musamu wamubwete, wuba wa kiminu kyalaka kuri baatu bobanso.

¹¹ Lolo dimadi, mu bvula dya Davidi, Mubvuukisi butukiri mu ntoono beenu. Nde ngo Kiristo Mfumu.

¹² Kidiimbu kuri beenu ngo kimaki: sa lwamono mwaa-mwaana wa nsoombo wadziinga mansaanda na waneŋesene munsa kidiilulu kya bibulu.»

¹³ Hanaho na sisuu, fundu-fundu dya mukaangu bambasi wa ku yulu dyabvutuna na mbasi yiyo, mu kudumusa ti:

¹⁴ «Nkeembu kuri Nzaambi kunu kinsongi-yulu, na kiyeengi ha butoto, kuri baatu ba katiiri.»

Batari ba bibulu beensi ku Beteleemi

¹⁵ Bambasi bamanaa kubvutuka ku yulu, batari ba bibulu balelesene bo na bo ti: «Tweendee natee ku Beteleemi, mpisi twetumonee mamo mamwaayirima, ma tuyaabisiri Mfumu.»

¹⁶ Bo babingukila mu kweende, na bamono Mariya, Yosefi na mwaa-mwaana wansoombo, waneŋesene munsa kidiilulu kya bibulu.

¹⁷ Bu bamumono, bo bayaabisa mamo, ma babaleeriri mu ntoono ya mwaana wunde.

¹⁸ Bobanso bayukuri ma yaabisiri batari ba bibulu, bamono dyo dyankimukunu.

¹⁹ Mariya ngo wuri, waba kebaa misamu myominso mimyo, na kwemitsima kunsa mutima waandi.

²⁰ Tumi batari ba bibulu, babvutuka kuri bakwedumusa Nzaambi, mu momanso ma bayukiri na ma bamwiini, bunu bu babaleeriri.

Yesu wataambula nkuumbu yaandi

²¹ Biluumbu mpoomo bu byakuka, mu kuteende mwaana bubakala, bamuteele nkuumbu Yesu, yaba leele mbasi, tekesele yimi dya mwaana disonoko mu mwooyo nguri.

Yesu bamusakumuna ku Nzo-nzaambi

²² Biluumbu bu byatubuka, bya nsyemusunu, bunu buri mangisi ma Moose, bo banata mwaana ku Yerusalemi mu kumusoongo kuri Mfumu,

²³ bunu bu diri dyatinu mu mangisi ma Mfumu ti: «Mpisi mwaana wubutuka watete, ngo wa mubakala, sa kaba wasakumunu mu kuba wa Mfumu.»

²⁴ Bo baha mu kikabu bya kudzusa, bunu bu diri dyaleelu mu mangisi ma Mfumu, «biduka byoolo bunu pe, mabeembe moolo makiri mantele.»

²⁵ Ku Yerusalemi, kwaba muutu mosi nkuumbu Simehoni. Muutu wunde waba wasuunguma, na wubvuminaa Nzaambi; waba kiingaana mboondulu ya Isaheli, na Mpeeve Yangisi yaba ha yulu nde.

²⁶ Mpeeve Yangisi yamuyaabisa ti: nde kafwa ko natee wakiri kumono Kiristo wa Mfumu.

²⁷ Mpeeve Yangisi yamutwaalisa ku Nzo-nzaambi. Mu kilookolo kyaba twaala ba taayi na nguri mwaa-mwaana bo Yesu, mu kuyirika bunu buri kifu kya mangisi mu ntoono ya nde,

²⁸ Simehoni wamutaambula mu myooko, na wadumusa Nzaambi, na waleele ti:

²⁹ «Mu lumalu, Mfumu, hemese kisari kyaaku keende kwaandi mu kiyeengi, bunu bu waba leele.

³⁰ Bukuri miisu myaami mimwiini mvuukulu ye,

³¹ yi wuri watekesele kuyirika ye ha busu bwa baatu bobanso.

³² Bubwo ngo buungi mu kuyabakana kuri makaanda, na nkeembu ya baatu baaku, Isaheli.»

Mbikululu ya Simehoni

³³ Ba taayi na nguri bamono dyo, dyankimukunu mu misamu mi baba leele mu ntoono mwaana.

³⁴ Simehoni wabasakumuna na waleele kuri Mariya, nguri mwaana ti: "Mono, mwaana wumawu wuri ha mu ntoono ya mbwiilulu, na ntelemunu ya baatu balaka mu Isaheli, na mu kuba kidiimbu kiri baatu batya kyo ko.

³⁵ Ye-meene nguri ngo wuri, mbeesi yayila sa yakutobolo mutima, kuri heki mi kwetsima baatu balaka kunsa mitima miba mayabakana."

Ana mubikiri wa mukyeetu

³⁶ Kwaba se mubikiri wa mukyeetu wuri nkuumbu Ana, mwaana Fanweli, mu kaanda dya Asere. Nde waba weki wanuna kwalaka. Mibvu nsaamu kadzakiri na mulumi wu kakweeriri kuri wakiri mwaa-ntuumba yanswaasa,

³⁷ Ha mambisa haho nde wasaala mufwiiri natee kukatubuka mibvu makuumi mpoomo na mina. Nde kabaa sasikaa la na Nzo-nzaambi ko. Nde waba salila Nzaambi butsuku na mwiini, mu nkotulu maloomi na mu nsaambulu.

³⁸ Mu kilookolo kikyo, nde se waba hanaho, wabeke mu kubvutula matoondo kuri Nzaambi, na wadzoonsolo mu mwaana wunde, kuri bobanso babakiingila nkuululu ya Yerusalemi.

Mvutukulu ku Nadzareti

³⁹ Ba Yosefi na Mariya bamana kuyirika momanso, bunu buri ndoombolo dza mangisi ma Mfumu, bo babvutuka ku bula bwaaku ku Nadzareti, mu nkoonsi ya Ngalili.

⁴⁰ Mwaa-mwaana waba kwebuukaana, wukwebaka makwa, wukweluula mu madyeele, na bweese bwa Nzaambi bwaba ha yulu nde.

Yesu mu Nzo-nzaambi

⁴¹ Mu mpisi mubvu, bataayi na nguri ba nde baba kweendaana ku Yerusalemi, ku munkeembu wa Paaka.

⁴² Yesu kabaanaa weki na mvula kuumi na dzoolo, taayi na nguri bayende na nde ku munkeembu bunu bwaba kifu kya bo.

⁴³ Biluumbu bya munkeembu bu byawa, mu ntaangu yi baba bvutuka, mwaana wuri nkuumbu Yesu wasaala ku Yerusalemi, kuri taayi na nguri bahele kuyaaba.

⁴⁴ Bo baba kutsima ti kampe wuri munsa mpuumbu. Bo badyaata kiluumbu kyakitsiina mu nzila, na babaandika kwemusaka kuri ba bari mu kaanda, na kuri ba bari bayabisina.

⁴⁵ Bo babaanaa bahele kumudzuukila, ha babvutukiri ku Yerusalemi, mu kunamitina kwemusaka.

⁴⁶ Biluumbu bitatu bu byakuka, bo bamudzuukila mu Nzo-nzaambi, wadzakala ha kakati dya bayikisi, wuri mu kubaywiilaana na wuri mu kubahaanaa bifuuri.

⁴⁷ Bobanso baba muywiilaana, bamono nkimukunu mu madyeele ma nde na mu mamvutu ma nde.

⁴⁸ Bataayi na nguri, bu bamumono bakimuka, na nguri yaandi wamuleele ti: «Mwaana me, buri ye yirikiri beetu ma bumabu? Moneti, me beetu na taayi dya ye twafwa mu kwekusaka.»

⁴⁹ Ngo Yesu wabvutula kuri bo ti: «Nki luri mu kwensakila? Buri beenu luyaa ko ti, me nyelemini kunama misamu mya taayi dyaami?»

⁵⁰ Ngo kasi bo basii bakula musamu wu kaba baleele ko.

⁵¹ Tumi nde, ha kakulumuka na bo, na wayende ku Nadzareti. Nde waba watumuma kuri bo. Na nguri yaandi waba kwekebaa misamu myominso mimyo kunsa mutima waandi.

⁵² Na Yesu waba kwebuukaana [mu] madyeele, mu mutele na mu bweese, ha busu bwa Nzaambi na ha busu bwa baatu.