Musamu wamubwete watina Luka 19 - Musamu Wamubwete 2013

Yesu bo na Dzakayi

¹ Yesu bu kakoto wataba Yeriko.

² Na mono, muutu mosi, nkuumbu yaandi Dzakayi, waba mukuutu batori ba mpaku, na waba kisina.

³ Nde wasaka mu kumono Yesu bunu bu kari, ngo waba wahele kubangisina mu ntoono mpuumbu, na bukuri nde mutele waba wamukufi.

⁴ Bu kadzumuna ku mankula, wanwaata mu muti sikomore, mpisi kamumono, bukuri Yesu haho kaba lutila.

⁵ Yesu, bu katubuka ha kibeendu kikyo, watala ku yulu na wamuleele ti: «Dzakayi, sunduka mu mawasu, bukuri lolo di, me nyelemini mu kudzakala mu nzo ya ye.»

⁶ Dzakayi wasunduka mu mawasu, wataambula Yesu mu nzo yaandi, na wakeembe.

⁷ Baatu bobanso bu bamono bubwo, bamunguta, baleele ti: «Nde weedzakala mu nzo ngaa-masumu!»

⁸ Dzakayi katelemaa, leeriri kuri Mfumu ti: «Mono, me nkaburi bitotolo bwaami ha kakati, na mpeeri ndaambu yakaka kuri bawelu; na mbuti me nyaholo kitotolo kya muutu mu makwa, lo bina me nyimubvutukila.»

⁹ Yesu waleele kuri nde ti: «Lolo di mvuukulu yikotiri mu nzo yimayi, bukuri wu se mosi mu baala ba Abalaami.

¹⁰ Mukwongo, Mwaana muutu wayisa mu kusaka na kubvuukisa wadziimbila.»

Nkuma ya mipata mya woolo

¹¹ Baatu bu baba yukaa mamo, Yesu wabweese kuta nkuma, bukuri nde waba weki bebele na Yerusalemi, na baatu baba kutsima ti, Kimfumu kya Nzaambi bweekimonikini, mu kilookolo kikyo.

¹² Hango, nde waleele ti: «Muutu mosi walukiinsu wayende ku nsi ya la, mu kwetaambula bumbyaasi nde-meene na kwiisa bvutuka.

¹³ Bu kateele bisari byaandi kuumi, wabakabula mipata kuumi mya woolo na waleele kuri bo ti: "Seenee mumbungu mu ntaangu yi nyeensi me."

¹⁴ Baatu babari bula bumosi baba bamubele; bo baheeke bamonikisi ha lumbisa lwa nde mu kweleele ti: "Beetu tutiiri ko, ti muutu wu kaba mbyaasi beetu."

¹⁵ Bu kamana kutaambula bumbyaasi wayisa bvutuka. Nde watumisa bisari bi kaheeri mboongo, mpisi kayaaba bi babakirye mu mumbungu.

¹⁶ Watete wayisa, waleele ti: "Mfumu, mu mupata ye wa woolo, me mbakirye mimpata kuumi.

¹⁷ Mbyaasi waleele kuri nde ti: "Bwabubwe, ye kisari kyakibwe; ngo bukuri ye wabeeri wakwiikama mu byantele, me nyikuheeri lutumu ha yulu mabvula kuumi."

¹⁸ Waboolo se wayisa, waleele ti: "Mu mupata ye wa woolo me mbakirye mipata mitaanu."

¹⁹ Mbyaasi waleele se kuri wunde ti: "Ye se nyikuheeri lutumu ha yulu mabvula mataanu."

²⁰ Wakaka se wayisa, na waleele ti: "Mfumu, mupata waaku wa woolo, wu nyabee nyasweeke kunsa nsaanda, ndewu.

²¹ Mukwongo, me nyabee na boomo bwa ye, bukuri ye muutu wuri na mutima wakuba, wunaangunaa biri wahele kusuusa, na wutolaa biri wahele kukuna."

²² Mbyaasi waleele kuri nde ti: "Mu nzoonsulu dza ye-meene, me nyimono ti ye wuri kisari kyakibi. Ye nkati wabeeri wayaaba ti, me muutu nyiri na mutima wakuba, nyinaangunaa biri nyahele kusuusa, na nyitolaa biri nyahele kukuna?

²³ Ngo buri ye waheriri kwesuusa mboongo dza me ku nzo-mboongo? Na me bu nyikwiisa, mbaka ndaandu mu dzo."

²⁴ Nde waleele kuri baba haho ti: "Yisilee mupata wa woolo wu kari na nde, na luha kuri wunde wuri na mipata kuumi mya woolo."

²⁵ Bo baleele kuri nde ti: "Mfumu, nde mwaatekesele kubaka mipata kuumi mya woolo."

²⁶ Me nyiluleele ti: "Kuri wunde wuri na kitotolo, sa babweese kumuha; ngo kasi wunde wahele na kitotolo, sa bayisila na ki kari na kyo.

²⁷ Ha yulu haho se, bataatu ba me, bari basii tya ko ti me ba mbyaasi bo, batwaalee hamaha, na bakekeenu ha busu bwa me."»

Yesu wayende ku Yerusalemi

²⁸ Yesu bu kamana kuleele mamo, wayende ku mankula mu kwetoomboko ku Yerusalemi.

²⁹ Bu katubuka bebele na Betefange na Betanya, nkati-nsi na mulaandu wa Mi-olive, nde waheeke boolo mu bayiki,

³⁰ wabaleele ti: «Yendeenu ha bula buri ha mankula, bu lukoto mu bwo, beenu sa lwamono mwaana mpuunda wakaangu, wuri muutu ti mosi kadzakiri ha yulu nde ko; nyangunee nde na twaalee.

³¹ Mbuti muutu wulufuuriri ti: "Buri lumunyaanguna?" Lo leelee bumabu ti: "Mfumu wuri na nzala nde."»

³² Bantumu bu bayende, bamono misamu bunu bu kaba baleele.

³³ Bu baba mu kunyanguna mwaana mpuunda, bangaa-nde babafuula ti: «Buri lunyanguna mwaana mpuunda?»

³⁴ Bo baleele ti: «Mfumu wuri na nzala nde.»

³⁵ Tumi bo bamunata kuri Yesu; bo bayala biyuungu byaaku ha yulu mwaana mpuunda, na badzakisa Yesu ha yulu nde.

³⁶ Bu baba mu kweyende, baatu babeke mu kweyala biyuungu byaaku mu nzila.

³⁷ Babaanaa beke bebele na nkulumusu ya mulaandu wa Mi-olive, mpuumbu yoyinso ya bayiki yabeke mu kukeembe, na kudumusa Nzaambi mu mbeembu yadzaangama, mu ntoono bimaangu byobinso bi bamwiini.

³⁸ Bo baleele ti: «Kaba wasakumunu, wunde wukwiisa mu nkuumbu Mfumu; kiyeengi ku yulu na nkeembu kunu kinsongi-yulu!»

³⁹ Bamosi mu Bafarisi baba mu mpuumbu baleele kuri nde ti: «Muyikisi, ŋaŋina bayiki baaku.»

⁴⁰ Nde wabvutula waleele ti: «Me nyiluleele ti, mbuti bo bawuriri, lo matari sa mafula misaakulu.»

Yesu wadila mu ntoono Yerusalemi

⁴¹ Bu kakokosolo wamono bvula, na wadila mu dyo,

⁴² waleele ti: «Mbuti ngo ye se, mu kiluumbu ki, bee wayaaba bwa kubakula kiyeengi! Kasi mu lumalu, kyasweeku ha miisu mya ye.

⁴³ Mukwongo, biluumbu sa biisa kuri ye, biri bataatu ba ye sa batuunga mpaangu, mu kukudyengekele na kukuswetekese mpele na mpele.

⁴⁴ Sa batsaamuna bvula dyodinso, na kudzusa ye na baatu baaku bobanso; ka basiisa ti tari ha yulu tari ko kuri ye, bukuri ye wasii yaba ntaangu, yi baba kwiisa mu kumono ye ko.»

Yesu wakoto mu Nzo-nzaambi

⁴⁵ Yesu bu kakoto mu Nzo-Nzaambi, wabeke kubingisa baba yarikaana,

⁴⁶ waleele kuri bo ti: «Diri dyatinu: "Nzo yaami sa yaba nzo lusaambulu, ngo kasi beenu lumwaasa yo, ntari bangaa-bumfuna.»

⁴⁷ Nde waba yikisaana mpisi kiluumbu mu Nzo-Nzaambi. Bakuutu ba bangaanga-nzaambi, batini ba mangisi na baatu balukiinsu baba kwesakaana bu bamudzusila,

⁴⁸ ngo baba bahele kubaka bwa kusiila, bukuri baatu bobanso baba batiiri kuyuka mi kaleele nde.