Musamu wamubwete watina Luka 17 - Musamu Wamubwete 2013

Masumu na mpemisi

¹ Yesu waleele kuri bayiki baandi ti: «Diri dya mpasi ti, kuhele kuba misamu mi bwiilila baatu mu masumu; ngo kyaari kuri wunde wuba mpwaani yi mikwiisikila.

² Lo bubvuriri bubwete mu nde, ti bamukaanga nguku-tari mu nkiingu yaandi, na bamutuba mu mubu, ti na kuba mpwaani ya mbwiilulu mu masumu, kuri mosi mu mwaa-bilesi bimabi.

³ Seenee madyeele beenu-meene!» «Mbuti mpaangi yaaku bwiiri mu masumu, lo museembe; na mbuti nde yiingiri madyeele, lo muhemesene.

⁴ Mbuti siiri masumu kuri ye, mbala nsaamu mu kiluumbu, na mbala nsaamu nde wiisiri kuri ye, na wukuleeriri ti: "Me nyinyoongo", lo muhemesene.»

Kanyi

⁵ Bantumu baleele kuri Mfumu ti: «Wutubweese kanyi!»

⁶ Mfumu waleele ti: «Mbuti beenu luri na kanyi, diri bunu lusaangi lwa muti sinapi, nkani habeeri lo luleeriri kuri muti sikomore wu ti: "Taabuka na yende wemene mu mubu", lo nde ketyee kulutambukila.»

Kisalu kiyelemini kusa nkutu

⁷ «Na mu beenu, habaana wuri na nkutu yiri mu kutsaba nseke, bunu pe kwekebe bibulu, ngo bu kafumini ku manseke nde wumuleeriri ti: "Wasa mu mawasu, dzakala dya"?

⁸ Buri lo kari, nde kumuleele ti: "Lambikila me byandya, lwaata kinkuta, nsiila byandya, natee me mana kudya na kunwa, tumi ye se dya na kunwa ko?"

⁹ Buri lo nde ntoondikiri nkutu bukuri yirikiri ma bamutuminye?

¹⁰ Bwobumosi seenee kuri beenu, bu lumeeni kuyirika momanso ma balutuminyee, lo leelee ti: "Beetu bankutu bahele mufunu, beetu ma tuyirikiryee mani ma tubeeri twayelemene kuyirika."»

Yesu watsinikisa babeeru ba bwaasi kuumi

¹¹ Yesu bu kaba mu nzila mu kweende ku Yerusalemi, walutila ha kakati dya Samariya na Ngalili.

¹² Bu kakoto mu bula bu mosi, babeeru ba bwaasi kuumi bamubwaana, na bo bateleme kimamanga na nde.

¹³ Bo batoombolo mbeembu, baleele ti: «Yesu, Muyikisi, bakila beetu ngebe.»

¹⁴ Bu kamono, waleele kuri bo ti: «Yendeenu lwelusoongo manyutu meenu kuri bangaanga-nzaambi.» Ngo bu baba mu kweyende, bo bamono ti beki batsyeeme.

¹⁵ Mosi mu bo, bu kamono ti mwaatsiinika, wabvutuka, na wabeke kwekeembese Nzaambi, mu mbeembu yadzaangama.

¹⁶ Nde wabwa, kuri watsuka busu ha miilu mya Yesu, na wabvutula matoondo kuri nde. Muutu wunde waba Musamariya.

¹⁷ Yesu wabvutula, waleele ti: «Buri kari bo kuumi batsyeemikinye ko? Ngo bawa, kuri bari?

¹⁸ Buri kusii baanaa babvutukiri mu kukeembese Nzaambi ko, ha yulu wunu munzeense wumawu?

¹⁹ Tumi Yesu waleele kuri nde ti: "Teleme, yende; kanyi dyaaku dikubvuukisiri.»

Nyisulu Kimfumu kya Nzaambi

²⁰ Bafarisi bamufuulaana ti nkya ntaangu Kimfumu kya Nzaambi kikwiisa? Yesu wabvutula kuri bo, waleele ti: «Kimfumu kya Nzaambi ka kikwiisa kuri bakimono mu miisu ko,

²¹ ka baleele ko ti: "Kyoki hamaha!" Bunu pe ti: "Kyoonii kunii!" Mukwongo Kimfumu kya Nzaambi kiri ha kakati dya beenu.»

²² Tumi nde waleele kuri bayiki ti: «Biluumbu sa biisa, biri beenu sa lwaba na nzala kumono ti kimosi, mu biluumbu bya Mwaana muutu; ngo ka lumumono ko.

²³ Sa baluleele ti: "Wuri kunii!" [bunu pe ti:] "Wuri hamaha!" Yaa lweende ko, yaa lunama ko.

²⁴ Bunu bu serimaa nseremi kuri yiha buungi kuholosono ku nto yulu yamosi natee ku yakaka, bunubwo se buba Mwaana muutu [mu kiluumbu kya nde].

²⁵ Ngo nde yelemini kutekesele kumono mpasi dzalaka, na kuba kuri ti, baatu ba kiseendu kimaki bamuyekiri.

²⁶ Ngo bunu bwaba mu biluumbu bya Nowa, bunubwo se buba mu biluumbu bya Mwaana muutu.

²⁷ Baatu badya, banwa, bakweele na bakweelese natee mu kiluumbu kya kotiri Nowa mu bwaatu, kya yisiri mbuukulu maampa yadzuusiri bobanso.

²⁸ Bwobumosi se, bunu bwaba mu biluumbu bya Loti: baatu badya, banwa, basuumba, bayarika, bakuna, na batuunga,

²⁹ natee mu kiluumbu kya pariri Loti mu Sodoma, kya nokini mvula ya mbaawu na mfulu dzikweya, ya dzusiri bobanso.

³⁰ Bunubwo se, mbasi-tsuku buba mu kiluumbu, kiyabukina Mwaana muutu.»

³¹ «Mu kiluumbu kikyo, wunde wuba ku yulu saansi dya nzo, kuri bitotolo byaandi biri munsa nzo, yaa kasunduka mu kubiholo ko, na bwobumosi se, wunde wuba ku manseke, yaa kabweese kubvutuka mambisa ko.

³² Baambukee mwooyo mu mukasi Loti.

³³ Mpisi wunde wusaka bwa kukebele kidziingu kyaandi, sa kakidziimbisa; ngo kasi wunde wukidziimbisa sa kakibvuukisa.

³⁴ Me nyileele kuri beenu, mu butsuku bubwo, mu boolo mbasi-tsuku baba ha mbuka mosi, sa baholo wamosi, na wakaka sa bamusiisa.

³⁵ Mu bakyeetu boolo bari mu kunyika mankono, mosi sa bamuholo, wakaka sa bamusiisa. [

³⁶ ]

³⁷ Bayiki bafuula, baleele ti kuri nde ti: "Kuri Mfumu?" Nde wabvutula kuri bo ti: "Haho ha ba kibulu kyafwa, hanaho se ha ba bango-noni.»