Musamu wamubwete watina Luka 13 - Musamu Wamubwete 2013

Mufunu mu kuyiinga dyeele

¹ Mu ntaangu yiyo, baatu bayisa kuri Yesu mu kumuyaabisa mamo mayirimini mu bari Ngalili, bari Pilato kabadzusaana, ha kasaangiri makila ma bo na ma bibulu byaha mu kikabu.

² Nde wabvutula, waleele kuri bo ti: «Beenu bu lutsima ti bari Ngalili babo, bukuri bamwiini mpasi, bo babvuriri masumu ti na baatu bobanso bari Ngalili?

³ Pele, me nyileele kuri beenu ti, mbuti beenu luyiingiri madyeele ko, lo beenu-banso se sa lwafwa bunu bo.

⁴ Heki bo kuumi na mpoomo, babwiirikiri nzo ku Silowa baba fwa, beenu bu lutsima ti bo baba babvuriri lumvuki ti na baatu bobanso bari Yerusalemi?

⁵ Pele, me nyileele kuri beenu ti, mbuti beenu luyiingiri madyeele ko, lo beenu-banso se sa lwafwa bunu bo.»

Nkuma ya mungenge wuri wahele kubuta

⁶ Yesu wabweese kuta nkuma yimayi: «Muutu mosi wakuna mungenge munsa nseke yaandi ya bviinya, ngo bu kayisa mu kusaka bimbutu mu nde wahele kubaka.

⁷ Nde waleele kuri kisari kya bviinya ti: "Mono, mibvu myeki mitatu me nyiri mu kwiisa kusaka bimbutu mu mungenge wumawu, ngo nyahele kubaka. Hango, mutabula kwaandi, bukuri wuri mu kukala butoto kwa buunu."

⁸ Kisari wabvutula kuri nde ti: "Mfumu, muhemeseeti mu mubvu wu, natee me nyimuhaka mu teteke na nziika bitiiti,

⁹ kampe lo bee butiri bimbutu mu mantaangu makwiisa; mbuti pele tumi wamutabula."»

Yesu watsinikisa mukyeetu mosi, waba na kipfuumi, mu kiluumbu kya mpuumunu

¹⁰ Yesu waba yikisaana mu nzo-nkutukunu mu kiluumbu kya mpuumunu.

¹¹ Mono, munumwo mwaba mukyeetu mosi, wuri kipilu kya mibvu kuumi na mpoomo, waba na mpeeve yamusa kipfuumi, kuri nde wakoromo na wahele kubangisina kusuunguma.

¹² Yesu bu kamumono, wamuteele mbila na wamuleele ti: «Mukyeetu, ye kuulukiri mu kipfuumi kyaaku.»

¹³ Nde wamutetekele myooko, na hanaho, nde wasuunguma na wabeke kukeembese Nzaambi.

¹⁴ Ngo mukuutu nzo-nkutukunu wabaka nkesi, bukuri Yesu watsinikisi mubeeru mu kiluumbu kya mpuumunu. Nde waleele kuri mpuumbu ti: «Turi na biluumbu bisaamunu bi tuyelemini kusala. Wasamee mu biluumbu bibyo, mu kutaambula butsiina, nkani ka mu kiluumbu kya mpuumunu ko.»

¹⁵ Mfumu wabvutula kuri nde, waleele ti: «Beenu bangaa-bumpitu-bumpyoongo, buri mpisi muutu mu beenu mu kiluumbu kya mpuumunu, kakoonyangunaa ngoombo yaandi ko, bunu pe mpuunda ko mu kidiilulu na kweemunwiisa maampa?

¹⁶ Ngo mwaana Abalaami wa mukyeetu wumawu, wuri Satana wabee wamukaanga bikonyi, mu mibvu kuumi na mpoomo, buri habee lo kumunyaanguna pe mu kiluumbu kya mpuumunu?»

¹⁷ Yesu bu kaleele mamo, bataatu ba nde bobanso bafwa nsoni; ngo mpuumbu yakeembe mu momanso mankimukunu ma kaba yirikaana.

Nkuma ya lusaangi lubvuriri mu buntele

¹⁸ Yesu ti: «Kimfumu kya Nzaambi kyafwanikina na nki? Na nki me nyitsitsa kukifwanikisa?

¹⁹ Kyafwanikina na lusaangi lwa muti wuri nkuumbu sinapi, luri muutu kaholaana, kunini munsa munyaka waandi. Bu lumenini lweki muti, na banoni ba yulu bakwiisa kutuunga madzaansa kunsa bimpaala byaandi.»

Nkuma ya lufunusu

²⁰ Yesu wabweese kuleele ti: «Na nki me nyifwanikisa Kimfumu kya Nzaambi?

²¹ Kyo kyafwanikina na lufunusu luri wa mukyeetu kaholaana saangiri na fufu dyakuka bisa bitatu, natee ku ditoomboko dyodinso.»

Mweelu wasweeteme

²² Yesu waba kwelutaana mu mabvula na mu mabula, na wukweyikisa kuri wuri mu kweende ku Yerusalemi.

²³ Muutu mosi wumufuula ti: «Mfumu, buri lutaangu lwa baatu babvuuka mwa-lwantele?» Yesu waleele kuri bo ti:

²⁴ «Nwanikinee mu kukoto mu mweelu wasweeteme, bukuri me nyiluleele ti, balaka sa basaka kukoto, ngo ka babangusina ko.»

²⁵ «Mu ntaangu yiri ngaa-nzo, mwaateleme na mwaakaanga mweelu, haho beenu lubaandika kuteleme ku mbasi, na kukomboto ha mweelu, na kuleele ti: "Mfumu, wutudzibukila." Nde bu kabvutula sa kaleele kuri beenu ti: "Me nyahele kuyaaba beenu kari ba kuri!"

²⁶ Haho, beenu lubaandika kuleele ti: "Beetu twadiiri ha busu bwa ye, na ye wayikisiri mu manzila ma beetu."

²⁷ Nde sa kabweese kuleele kuri beenu ti: "Me nyahele kuyaaba beenu kari ba kuri. Sasikeenu ha teke me, beenu lukwesalilaa kunsa bubayi!"

²⁸ Kukwo kuba bidilu na nkweetulu miinu, mu ntaangu yilumono beenu Abalaami, Isaki, na Yakobe, na babikiri bobanso mu Kimfumu kya Nzaambi; ngo kasi beenu balutubiri ku mbasi.

²⁹ Baatu balaka bafumuna ku este na ku weste, ku node na ku sude, sa biisa badzakala mu kudya mu Kimfumu kya Nzaambi.

³⁰ Na mono, basyeelele sa batekesele, na batekesele sa basyeelele.»

Yesu na Yerusalemi

³¹ Mu kilookolo kikyo, Bafarisi babamosi bakokosolo kuri Yesu na bamuleele ti: «Yisika ha, weende kwaaku, bukuri Erode tiiri kudzusa ye.»

³² Yesu wabvutula kuri bo ti: «Bu luri mu kweende leelee kuri mubaku wunde ti: "Mono, me nyiri mu kwebingisa mampeeve mamabi, na nyiri mu kwetsinikisa babeeru lolo di, na bweepari, na mu kiluumbu kya bitatu lo me meeni."

³³ Ngo me nyelemini kunama nzila yaami lolo di, bweepari na mbasi bweepari, bukuri bwahele kuyelemene ti mubikiri kahele kufwiila ku Yerusalemi.

³⁴ Yerusalemi, Yerusalemi, ye wudzusaa babikiri, na wudzusila mu matari babo babaheeke kuri ye. Mantaangu makwe me nyaba nyatya kwaandi kukutukisa baala ba ye, bunu bu fukaa nguri nsusu baala baandi kunsa mapaapu, ngo kasi beenu lusii tya ko.

³⁵ Mono, nzo yeenu bee bayiyekiri. [Ngo] me nyileele kuri beenu ti, ka lubweese kumono me ko, natee [kutubuka kilookolo] ki luleele beenu ti: "Kaba wasakumunu wunde wukwiisa mu nkuumbu ya Mfumu!"»