Musamu wamubwete watina Luka 10 - Musamu Wamubwete 2013

Yesu wasindika bayiki makuumi nsaamu na boolo

¹ Ha mambisa haho, Mfumu wasoolo baatu bakimi, makuumi nsaamu [na boolo], na wabasindika boolo-[boolo] ku mankula ma nde, mu mpisi bvula na mpisi kibeendu, ku kaketi kweende nde-meene.

² Yesu waleele kuri bo ti: «Bya kutolo munsa nseke byalaka, ngo bangaamba bantele. Ngo loombee kuri ngaa-nseke, kaheeke bangaamba bakweetolo nseke yaandi.»

³ Yendeenu! Mono, me nyiluheekiri bunu baala ba bimeeme ha kakati dya bango-mbulu.

⁴ Yaa lunata kimpokoro kya mboongo ko, nkangala pe, masapaatu pe, na muutu mboto kuha pe mu nzila.

⁵ Mu nzo ngo nzo yi lukotiri, lo leele mbeti ti: "Kiyeengi kiba mu nzo yi!"

⁶ Na mbuti mu mwo muri mwaana wa kiyeengi, lo kiyeengi kya beenu sa kyaba ha yulu nde; mbuti pele, lo sa kyabvutuka kuri beenu.

⁷ Dzakilee mu nzo yiyo, dyeenee na nweenee bya bo, bukuri kisari wuri na miswa mu kutaambula mufutu waandi. Yaa lupala mu nzo mosi, mu kweekoto mu yakaka.

⁸ Mu bvula ngo bvula di lukotiri, bu balutaambiri, lo dyeenee byandya bi baluha,

⁹ tsinikisee babeeru bari haho, na bayaabisee ti: «Kimfumu kya Nzaambi kikokisiri kuri beenu.»

¹⁰ Mu bvula ngo bvula di lukoto, mbuti bahele kulutaambula, bu luri mu kupala mu manzila ma dyo, leele ti:

¹¹ «Na fuunda dya bvula diri mu bitaambi byeetu, tulukubukila. Ngo yaabeenu ti Kimfumu kya Nzaambi kikokisiri.

¹² Me nyileele kuri beenu ti, mu kiluumbu kikyo, sa babvula kuseembe bvula didyo ti na Sodoma.»

Mabvula mabisa kusiila kanyi mu Yesu

¹³ «Kyaari kuri ye Koradzi! Kyaari kuri ye Betesayida! Bukuri mbuti bimaangu byayirimini kuri beenu, ngo byayirimini ku Tiro na Sidoni, nkani na kidzika bo balweeti matsaaka, na kuyoolo lufuta, nkani baketi yiinga madyeele.

¹⁴ Mukwongo, mutsuundu wa beenu sa kabvula makwa, ti na wa Tiro na Sidoni.

¹⁵ Heki ye Kafarnawumi, buri natee ku yulu, ye wuba wadzaangusu? Natee ku nsuku lubila, ye wusunduka.»

¹⁶ «Wunde wuluywiila, lo me kaywiiriri; na wunde wulunyaafuna, lo me kanyaafuni; ngo wunde wunyaafuna me, lo waheeke me kanyaafuni.»

Mvutukulu ya makuumi nsaamu na boolo

¹⁷ Makuumi nsaamu [na boolo] babvutuka mu kiminu na baleele ti: «Mfumu, na mampeeve mamabi matutumuminye mu nkuumbu yaaku!»

¹⁸ Yesu waleele kuri bo ti: «Me mbee mono Satana bunu nseremi, yiyisikiri ku yulu na yibwiiri!

¹⁹ Mono, me nyaluheeri lutumu mu kudyaata banyoko na bangeenge, na mpinu dzodzinso ha yulu mutaatu; kuri kitotolo ti kimosi ko, kilumonoso mpasi.

²⁰ Hango, yaa lumono kiminu, mu kuri ti mampeeve mamabi malutumumina; ngo kasi monee kiminu mbuti mankuumbu meenu matinima mu mayulu.»

Yesu wakeembe

²¹ Mu kilookolo kinikyo, Yesu wakeembe [mu] Mpeeve Yangisi na waleele ti: «Me nyikudumusa, Taata, Mfumu ya ku yulu na ya ha butoto, bukuri bangaa-madyeele na bangaa-nyaabulu, ye wabasweeke misamu mimyo, ngo wayaabisa myo kuri mwaa-baala bantele. Bunubwo Taata, ye bubwo watiiriri ti buba ha busu bwaaku.

²² Me Taata wampa byobinso. Kuri muutu ti mosi wuyaari Mwaana, mbuti ka Taata ko. Kuri se muutu ti mosi wuyaari Taata, mbuti ka Mwaana ko, na kuri wunde wuri Mwaana tiiri kamuyaabisa.»

²³ Tumi bu kasyeeteke kuri bayiki baandi, wabaleele ha bo-bakaka ti: «Kiminu kuri miisu mimyo mikwemono ma lukwemono beenu.»

²⁴ Me nyileele kuri beenu ti: «Babikiri na bambyaasi balaka baba batya kumono, ma lukwemono beenu, ngo basii mono ko; na kuyuka ma lukweyuka beenu, ngo basii kuyuka ko.»

Nkuma ya Musamariya wamubwete

²⁵ Mono, muyikisi mangisi mosi wateleme mu kukotoso Yesu mu nsindukulu, waleele ti: «Muyikisi, me nki nyelemini kusa, mu kubaka kidziingu kyahele manunu?»

²⁶ Yesu wamufuula ti: «Nki byatinu mu mangisi? Buri ye wuri mu kutaanga?»

²⁷ Nde wabvutula, waleele ti: «"Tya Mfumu Nzaambi yaaku mu mutima waaku ndemunso, mu muheebulu waaku ndemunso, mu makwa maaku momanso, na mu dyeele dyaaku dyodinso." Na ti: "Tya mbaasi yaaku bunu ye-meene."»

²⁸ Yesu wamuleele ti: «Ye heeri mvutu yayibwete. Sa bubwo, na ye sa waba na kidziingu.»

²⁹ Ngo muyikisi mangisi mu kusaka buungu mu nde-meene, wabweese kufuula Yesu ti: «Heki mbaasi me ngo na?»

³⁰ Yesu wamubvutula ti: «Muutu mosi wanangukini ku Yerusalemi, mu kukulumuka ku Yeriko. Ha lukesu, nde wabwa ha myooko mya bangaa-bumfuna, bo bamuholo na byobinso bi kaba na byo, bamutuuta nkuba na basaa mutabula ngaambu.

³¹ Mu kinkuma, ngaanga-nzaambi mosi, waba kulumuka mu nzila yiniyo. Bu kamumono, wakeenge nzila na waluta.

³² Kisari kya Nzo-nzaambi kimosi se bunubwo, wayisa kutubuka ha kibeendu kinikyo, bu kamumono nde se wakeenge nzila.

³³ Ngo Musamariya mosi, waba mu budyeengi, watubuka hari muutu wunde. Bu kamumono, wamubakila ngebe.

³⁴ Bu kakokosolo, wayitila maasi na malu mu maboko maandi, na wakaanga mo. Ha kamuteeteke ha yulu mpuunda ya nde-meene, na wamunata ku nzo banzeense ya kufutila, ku kamubukisa.

³⁵ Bwiisi bu bwakya, Musamariya waholo bidenali byoolo, waha kuri wukoosalaa mu nzo banzeense, na wamuleele ti: "Bakisa muutu wu, tumi bweeri ha nyibvutuka, me nyikufuta mipata mi wubweese kusalila ha yulu mimyo."»

³⁶ Yesu wafuula: «Heki mu ye, mu bo batatu babo, lo na wuri mbaasi muutu wunde wabwiiri mu myooko mya bangaa-bumfuna?»

³⁷ Muyikisi mangisi wabvutula ti: «Wunde wamubakiri ngebe.» Yesu wamuleele ti: «Yende, ye se weyirika ma bubwo.»

Yesu ku nzo ba Malata bo na Mariya

³⁸ Bu baba mu nzila, Yesu wakoto mu bula bumosi, na mukyeetu mosi, nkuumbu Malata, wamutaambula.

³⁹ Nde waba na kibusi kimosi, kiri nkuumbu Mariya, [kiri] kaholaa dzakiri ha miilu mya Mfumu, mu kuyuka maampu maandi.

⁴⁰ Ngo kasi, Malata waba mutele-mutele mu ntoono bisalu byalaka. Bu kayisa, waleele ti: «Mfumu, ye wahele kunyoongo, mu kumono ti kibusi kya me wayekekele me bisalu? Muleele kabakisa me.»

⁴¹ Mfumu wabvutula kuri nde ti: «Malata, Malata, ye wunyoongo na wukwekangara mu myalaka.

⁴² Kitotolo kimosi kitsu kiri mufunu. Mariya sooriryee kikuuku kibvuriri bubwete, kiri lo bahele kumuyusula na kyo.»