Musamu wamubwete watina Luka 1 - Musamu Wamubwete 2013

Nkotulu

¹ Mu bukuri baatu balaka basiiri kisalu kya kutina kikulu kya misamu mimyo mayirimini ha kakati dya beetu,

² bunu bwa tuyaabisiri babo bari kuholosono kunu mbandukulu baba bambaangi bamono mu miisu, na bayeki bisari bya Maampu.

³ Me bu nyafyongokini misamu myominso kunu mbandukulu mu bunkete na deredee, nyamwiini ti bwabubwete me se ntina mu ntoono ye Tehofile, muutu walukiinsu,

⁴ mpisi heki ye se yaaba ngwanwa ya maampu ma wuri wataambula.

Nyaabusulu mbutukulu ya Yowane Mubotiki

⁵ Mu ntaangu yiri Erode waba mbyaasi mu Yudaya, kwaba ngaanga-nzaambi mosi, nkuumbu yaandi Dzakariya, mu kabu dya Abya, na mukasi waandi waba mosi, mu baala ba bakyeetu bapalila mukaanda dya Aaloni, nkuumbu yaandi Elidzabeti.

⁶ Boboolo baba baatu basuunguma ha busu bwa Nzaambi, bakwedyaatila kunsa mangisi na ntumu dza Mfumu kwahele maseembu.

⁷ Bo baba bahele na baala, bukuri Elidzabeti waba kisita, na boboolo mibvu myaba myeki myatoomboko.

⁸ Ntaangu Dzakariya yatubuka, ya kusala kisalu kyaandi kya bungaanga-nzaambi, bunu bwaba muloongo wa kabu dya nde ha busu bwa Nzaambi.

⁹ Bunu bwaba kifu kya bungaanga-nzaambi, wari ha yulu nde, dyabwa, mu kukoto mu nzo yangisi ya Mfumu na kuyoko mananaasi.

¹⁰ Fundu-fundu dyodinso dya baatu, dyaba ha mbasi mu kusaambila, mu kilookolo kya nyokulu mananaasi.

¹¹ Mbasi ya Mfumu yamumonokono, yateleme ha lubakala lwa dziku dya mananaasi.

¹² Dzakariya bu kayimono, mutima wasa mambaawu na wabwilikila kinkuuka.

¹³ Mbasi yaleele kuri nde ti: «Yaa ba na boomo ko Dzakariya, bukuri ndoombulu dza ye dzibakiri mvutu, na mukasi waaku, Elidzabeti sa kakubutila mwaana wa mubakala, na ye sa wamuteele nkuumbu Yowane.

¹⁴ Nde sa kaba kuri ye ntoono ya kiminu na ya nkeembu, na baatu balaka sa baba na kiminu mu mbutukulu yaandi.

¹⁵ Mukwongo, nde sa kaba muutu wamunene ha busu bwa Mfumu, nde mbasi-tsuku bviinya na malu makookolaa kunwa pe. Sa kaba waluula mu Mpeeve Yangisi, kuri wakiri mu mwooyo nguri yaandi.

¹⁶ Nde sa kabvutula baala balaka ba Isaheli kuri Mfumu, Nzaambi bo.

¹⁷ Nde sa keyende ku mankula ha busu bwa Nzaambi, mu mpeeve na mu mpinu dza Eliya, mu kubvutula mitima mya bataayi ha yulu baala, na bangaa-tungu, ku madyeele ma baatu basuunguma, na kusa kuri ti baatu baba bayirima mu kutaambula Mfumu.»

¹⁸ Ngo Dzakariya waleele kuri mbasi ti: «Dyaburi me nyiyaabila mamama? Me ti nyeki kinuni, na mukasi me mibvu myeki myatoomboko».

¹⁹ Mbasi yabvutula kuri nde yaleele ti: «Me ngo mbasi Ngabileri, wukootelemaa ha busu bwa Nzaambi. Me bampeekirye mu kudzoonso kuri ye, na mu kuyaabisa ye mukeensu wumawu.

²⁰ Mono, ye busii bubwo, bweese kuba na mbeembu ko na bweese kudzoonso ko, natee kiluumbu kiyirima misamu mimami, bukuri ye sii sa kanyi mu maampu ma me ko, mbasi-tsuku mayirima mu ntaangu yasoolu.»

²¹ Baatu baba kiingaana Dzakariya, bakimuka mu kumono ti nde wuri mu kudziingila mu nzo yangisi.

²² Kamana kupala, nde waba weki kubangisina pe kudzoonso na bo; bo babakula kuri ti mamono-miisu kabwanikinyee na mo mu nzo yangisi. Nde waba weki baba, na kwedzoonsolo mu bidiimbu.

²³ Biluumbu bya kisalu kyaandi bimanaa kukuka, Dzakariya wabvutuka ku nzo yaandi.

²⁴ Ha mambisa ma biluumbu bibyo, Elidzabeti, mukasi waandi wabaka yimi, na wasweeme mu mangoondo mataanu. Nde waleele ti:

²⁵ «Mamama Mfumu kayirikiri mu ntoono me, mu biluumbu bi kasyeetiri kisoosi kyaandi kuri me, mu kumana nsoni dza me ha kakati dya baatu.»

Nyabusulu mbutukulu ya Yesu

²⁶ Mu ngoondo ya masaamunu, Nzaambi waheeke mbasi yiri nkuumbu Ngabileri, ku bula bumosi, bwa mu nkoonsi ya Ngalili, buri nkuumbu Nadzareti,

²⁷ wamuheeke kuri mwa ntuumba mosi yanswaasa, yaba kunsa lulelusunu lwa makweele, bo na bakala dimosi diri nkuumbu Yosefi, wapalila mu kaanda dya Davidi, mwaa-ntuumba yiyo nkuumbu yaandi Mariya.

²⁸ Mbasi yakoto mu nzo Mariya na yamuha mboto ti: «Ba na kiminu, ye wuri na bweese, Mfumu wuri na ye.»

²⁹ Mariya bu kayuka mamo, mutima wasa mambaawu na wafuula kunsa mutima ti: Sa mboto ya bubwo lo mambangukulu ti kwe?

³⁰ Mbasi yaleele kuri nde ti: «Yaa ba na boomo ko Mariya, bukuri ye bakiri bweese kuri Nzaambi.

³¹ Mono, ye sa baka yimi, sa wabuta mwaana wa mubakala, na sa wamuteele nkuumbu Yesu.

³² Nde sa kaba muutu wamunene, sa bamuteele Mwaana Mwa-Yulu, na Mfumu Nzaambi sa kamuha mboloko ya Davidi taayi dyaandi.

³³ Nde sa katuma kaanda dya Yakobe kwakinkulu, na kimfumu kyaandi kiwa ko.»

³⁴ Mariya waleele kuri mbasi ti: «Sa mimyo buri miyirimina, bukuri me nyakiri babakala kuyaaba pe?»

³⁵ Mbasi yabvutula kuri nde ti: «Mpeeve Yangisi sa yiisa ha yulu ye, na mpinu dza Mwa-Yulu sa dzakufuka mu mposi yaandi. Hango-nkuumbu, mwaana wubutuka sa kaba wangisi, na sa bamuteele ti Mwaana Nzaambi.

³⁶ Mono, Elidzabeti mwisi kaanda waaku se weki na yimi dya mwaana wa mubakala kunsa bununi bwaandi, na nde wu babeleelaana ti kisita, yimi dyeki mu ngoondo ya masaamunu.

³⁷ Bukuri Nzaambi kakoonaa dyaambu ko.»

³⁸ Na Mariya wabvutula ti: «Mono, me nyiri kisari kya Mfumu. Hemese ma leeriri ye mayirima mu me.» Ha mambisa haho, mbasi yamusiisa.

Mariya wayende kweemono Elidzabeti

³⁹ Mu biluumbu binibyo, Mariya wayende, mu mawasu, ku bula bu mosi mu nkoonsi ya milaandu ya Yudaya.

⁴⁰ Nde wakoto mu nzo Dzakariya na waha Elidzabeti mboto.

⁴¹ Elidzabeti kamana kuyuka mboto ya muheeri Mariya, mwaana waba mu mwooyo waandi wanyiŋina, na Elidzabeti waluula mu Mpeeve Yangisi.

⁴² Elidzabeti wadzoonso mu mbeembu yadzaangama, waleele ti: «Ye babvuri kusakumuna mu bakyeetu bobanso, na mwaana waaku se wasakumunu.

⁴³ Mi kuri mifumini, ti nguri Mfumu yaami, kiisa ku nyiri me?

⁴⁴ Bukuri, mono, mboto ye bu yiyukini mu makutu ma me, mwaana wuri mu mwooyo me niŋini mu kiminu.

⁴⁵ Kiminu kuri wunde wasa kanyi ti, misamu myaleele Mfumu mu nde, sa myayirima.»

Mukuunga Mariya

⁴⁶ Mariya waleele ti: «Muheebulu waami wusiika Mfumu,

⁴⁷ na mutima waami waluula mu kiminu mu ntoono Nzaambi, mubvuukisi waami;

⁴⁸ bukuri nde syeeturyee kisoosi kyaandi ha yulu nkulukulu ya kisari kyaandi. Mono, kuholosono mu lumalu, biseendu byobinso sa byaleele me ti nyiri mu lwambwe,

⁴⁹ bukuri Mwa-mpuungu wayirikiri misamu myansisi kuri me. Nkuumbu yaandi yiri yangisi,

⁵⁰ na ngebe dzaandi kuri babo bamubvuminaa dziri mu biseendu ngo biseendu.

⁵¹ Nde sariryee mu makwa ma myooko myaandi, lutumu lwa kooko kwaandi. Nde tsyamikisyee bangaa-butuutu-ntulu, mu bitsimi bya mitima mya bo.

⁵² Nde sononyee bambyaasi mu mamboloko, na dzaangisiri ba mafuunsi.

⁵³ Babo bari na nzala, nde wubaluulusiryee mu bitotolo, na babisina nde wubabvutiryee na myooko mya mukangala.

⁵⁴ Nde wiisiri mu kubakisa Isaheli, kisari kyaandi, na wumubambukiri mwooyo mu kumusiila ngebe.

⁵⁵ Bunu bu kabaleele kuri bataayi beetu, mu ntoono Abalaami na kaanda dyaandi kwakinkulu.»

⁵⁶ Mariya wadzakala kuri Elidzabeti kidzika kampe kya mangoondo matatu, tumi ha kabvutuka ku bula bwaandi.

Mbutukulu Yowane Mubotiki

⁵⁷ Ntaangu Elidzabeti ya kubuta yatubuka, na nde wabuta mwaana wa mubakala.

⁵⁸ Ba bari manzo bebele, na ba bari mu kaanda, bayuka ti Mfumu soongiryee bunene bwa ngebe dzaandi kuri Elidzabeti, bakeembe mu kintwaari na nde.

⁵⁹ Kiluumbu kya mpoomo bu kyatubuka, bo bayende mu kweteende mwaana bubakala. Baba batiiri kuluka mwaana nkuumbu ya taayi dyaandi, Dzakariya,

⁶⁰ kasi nguri yaandi ha kaleeriri ti: «Pele, nkuumbu yaandi Yowane.»

⁶¹ Bamuleele ti: «Mu kaanda dya beenu kwahele muutu wuri na nkuumbu yiyo.»

⁶² Ha beki fuulaana mu nzoonsulu ya bidiimbu kuri taayi dya mwaana kari nkya nkuumbu katiiri baluka mwaana.

⁶³ Dzakariya waloombo mwaa-baya dyantele na watina ti: «Nkuumbu yaandi Yowane.» Bobanso bamono dyo dyankimukunu.

⁶⁴ Ha nsi na nsi, munwa Dzakariya wadzibuma, ludima lwaandi lwanyanguka, na nde wabeke mu kudzoonso na kudumusa Nzaambi.

⁶⁵ Bobanso baba mu loondo didyo bamono boomo, na badzoonsolo mu misamu mimyo mu nkoonsi ya milaandu ya nsi ya Yudaya.

⁶⁶ Bobanso bayukiri misamu mimyo, bamikebe kunsa mitima myaaku, na baleele ti: «Mwaana wu na kaba?» Mukwongo, kooko kwa Mfumu kwaba ha yulu nde.

Mukuunga wa mbikululu wa Dzakariya

⁶⁷ Taayi dyaandi Dzakariya, waluula mu Mpeeve Yangisi, na wabikula waleele ti:

⁶⁸ «Kaba wadumusu Mfumu Nzaambi ya Isaheli, bukuri nde wayisiri mu kuyilimina na mu kukuula kaanda dyaandi.

⁶⁹ Na watelemisi Mubvuukisi wampinu mu kaanda dya Davidi, kisari kyaandi.

⁷⁰ Bunu bu kayaabisiri, na kidzika mu minwa mya babikiri baandi bangisi.

⁷¹ Sa katubvuukisa mu myooko mya bataatu beetu, na mu myooko mya bobanso batuberiri,

⁷² mu kusiila bataayi beetu ngebe, na kubambukila mwooyo mu lulelusunu lwaandi lwangisi,

⁷³ bunu bu kalabiri maalu kuri Abalaami, taayi dyeetu, mu kutubvuukisa,

⁷⁴ mu kutukuula mu myooko mya bataatu, mpisi heki tumusalila kwahele kuba na boomo,

⁷⁵ kunsa bungisi na nsungumunu, ha busu bwaandi, mu biluumbu byobinso bya kidziingu kyeetu.

⁷⁶ Ye mwaa-mwaana, sa ba kuteele ti mubikiri Mwaa-yulu, bukuri ye sa weende ku mankula ma Mfumu, mu kuyirikila manzila maandi,

⁷⁷ mu kuha kuri kaanda dyaandi, nyaabulu ya mvuukulu mu mpemusunu ya masumu ma bo,

⁷⁸ mu ntoono mutima wangebe wa Nzaambi yeetu, mu didyo, buungi bwaandi sa bwaseme ha yulu beetu, bunu ntaangu ya ku yulu,

⁷⁹ mu kuha nsyeemunu kuri babo badzakala kunsa mampimbisi, na kunsa mposi ya lufwa, na mu kutwaalisa miilu myeetu mu nzila ya kiyeengi.»

⁸⁰ Mwaa-mwaana waba kwebuukaana, na kwebaka makwa mu kimpeeve. Nde wadzakala ku nsi yankatu natee kiluumbu ki kamonikini nde kuri Isaheli.