Musamu wamubwete watina Yowane 6 - Musamu Wamubwete 2013

Yesu wadiisila mafuunda mataanu ma babakala

¹ Ha mambisa haho, Yesu wayende ku simu dya mubu wa Ngalili, wu baleela se ti wa Tiberya.

² Mpuumbu yayinene yaba kwemunamaana, bukuri baatu baba kwemonaana bidiimbu bi kaba kweyirikaana mu babeeru.

³ Yesu wanwaata ku yulu mulaandu, na wadzakala na bayiki baandi.

⁴ Paaka, munkeembu wa Bayudayo, waba weki bele.

⁵ Yesu, kasyeetulaa miisu, wamono mpuumbu baatu yayinene yaba kwiisa kuri nde, nde wafuula kuri Filipo ti: «Kuri tusumbukilee mampa, mpisi heki baatu ba badya?»

⁶ Nde waleele mamo mu kumutsiitsa; mukwongo nde-meene waba yaari ma kaba katsima kuyirika.

⁷ Filipo wabvutula kuri nde ti: «Ti hayuku tusuumbiri mampa ma nkama dzoolo dza bidenali, lo makukula, kuri ti mpisi muutu kabaka mwaa-kitsuri ko.»

⁸ Mosi mu bayiki baandi, Andere mpaangi Simoni Petelo, waleele kuri nde ti:

⁹ «Hari mwaa-kilesi kimosi hamaha, wuri na mampa mataanu na bansu boolo; ngo lo bibyo nki, mu mburi baatu ba?»

¹⁰ Yesu waleele ti: «Dzakisee baatu.» Kwaba bitiiti byalaka ha kibeendu kikyo. Baatu badzakiri baba kampe mafuunda mataanu.

¹¹ Yesu waholo mampa, bu katoondo, wakabula kuri baatu baba badzakala; wasa bunubwo se mu bansu, bunu bwa tiiriri baatu.

¹² Bamanaa kuyukuta, nde waleele kuri bayiki baandi ti: «Kutukisee bitini bisaariri, mpisi kuhele kuba ti kimosi kifuukila.»

¹³ Hango bo bakutukisa na baluulusa, mitooto kuumi na myoolo mu bitsuri bya mampa byasaariri mu ma badya baatu.

¹⁴ Baatu bu bamono bidiimbu bi kayirikiri nde, baleele ti: «Ngwanwa, wumawu Mubikiri wiisiryee ha nsi.»

¹⁵ Yesu kayaabaa ti bee biisiri kumuholo mu mpisi bamusa mbyaasi, nde wabweese kweende ku yulu mulaandu nde-kaka.

Yesu wayende ha yulu maampa

¹⁶ Nsinsika bu yatubuka, bayiki baandi bakulumuka ku mubu,

¹⁷ bu banwaata mu bwaatu, bo bayende ku simu dya mubu dyakaka, ku Kafarnawumi. Mampimbisi maba mamwaabwa, na Yesu waba wakiri wahele kutubuka kuri bo.

¹⁸ Mubu waba waningusu mu kiteembu kya makwa.

¹⁹ Bo baba ba mwaatekesele, kampe mu mafuunda mataanu, bunu pe masaamunu ma bitaki, ha batalila Yesu wuri mu kwiisa dyaata ha yulu mubu na weki kokosolo bebele na bwaatu. Bo bamono boomo.

²⁰ Ngo nde wabaleele ti: «Wu me; yaa luba na boomo ko!»

²¹ Bo baba batiiri bamuholo mu bwaatu, ngo hanaho bwaatu bwatubuka ha simu di babakweende.

Mpuumbu yasaka Yesu

²² Kiluumbu kyanama, mpuumbu baatu basii saala ku simu dya mubu dyakaka, bamono kuri ti, bwaatu bwaba bumosi kitsu, na Yesu se kasii kweende mu bwaatu kintwaari na bayiki baandi ko, ngo bo bakaka bayensi.

²³ Mabwaatu makaka, manangukini ku Tiberya mayisa ha kibeendu ki babadya mampa, haho Mfumu kabvutiri matoondo.

²⁴ Mpuumbu baatu bu yamono ti Yesu wahele haho, bayiki baandi se bo pe, ha banwaata mu mabwaatu na bayende ku Kafarnawumi mu kwesaka Yesu.

Yesu ngo mpa ya bumwooyo

²⁵ Bo bu bamono Yesu ku simu dya mubu dyakaka, bamuleele ti: «Labi, nkya ntaangu ye wiisiryee ku?»

²⁶ Yesu wabvutula kuri bo ti: «Ngwanwa mu ngwanwa me nyiluleele ti, beenu luri mu kwesaka me kari bukuri lwamwiini bidiimbu ko, ngo bukuri lwadiiri mampa na lwayukutiri.

²⁷ Salee, kari mu ntoono byandya bibolaa ko, ngo mu ntoono byandya binamitinaa mu kidziingu kyahele manunu, mbasi-tsuku biluha Mwaana muutu, bukuri nde Taayi Nzaambi, kari kasa kinyemu kyaandi.»

²⁸ Haho bo baleele kuri nde ti: «Nki beetu tusa mpisi heki tusala kisalu kya Nzaambi?»

²⁹ Yesu wabvutula waleele kuri bo ti: «Kisalu kya Nzaambi kiri kuri ti beenu lusa kanyi mu wunde wu kari kaheeke.»

³⁰ Haho bo baleele kuri nde ti: «Heki ye nkya kidiimbu wusa, mpisi heki beetu tumono na tusiila kanyi mu ye? Nkya kiyiriki wusa?

³¹ Bataayi ba beetu badiiri maana mu nsi yankatu, bunu bu diri dyatinu ti: "Nde wabaha mpa ya ku yulu ya kudya."»

³² Yesu waleele kuri bo ti: «Ngwanwa mu ngwanwa me nyiluleele, Moose kasii ha beenu mpa ya ku yulu ko, ngo Taayi dyaami wuha beenu mpa ya ku yulu yangwanwa.

³³ Bukuri mpa ya Nzaambi, ngo yisundukaa ku yulu na yihaanaa bumwooyo kuri nsi.»

³⁴ Haho bo baleele kuri nde ti: «Mfumu, tuha mpa yiyo mantaangu momanso.»

³⁵ Yesu waleele kuri bo ti: «Me ngo mpa ya bumwooyo. Wunde wukwiisa kuri me, kari mbakila nzala ko, na wunde wusa kanyi mu me, kari mbakila mpwiisu ko.

³⁶ Ngo me nyiluleeriri ti: Beenu lwamwiini [me], na lwahele kusa kanyi.

³⁷ Mpisi wumpa Taata, sa kiisa kuri me, na me nyiri mbingila wunde wukwiisa kuri me ko,

³⁸ bukuri me nyafumuna ku yulu, kari mu kuri ti nyirika kutya kwa me-meene ko, ngo kwa wunde wampeeke.

³⁹ Kutya kwa wunde wampeeke kuri ti, me mpele kudziimbisa ti mosi mu ba kari kampa, ngo me sa nyamufulukisa [mu] kiluumbu kya manunu.

⁴⁰ Kutya kwa Taayi dyaami kuri ti, wunde wumono Mwaana na wusa kanyi mu nde, kabaka kidziingu kyahele manunu, na me sa nyamufulukisa mu kiluumbu kya manunu.»

⁴¹ Haho, Bayudayo babeke kumunguta mu ntoono ya nde, bukuri waleeriri ti: «Me ngo mpa yafumuna ku yulu.»

⁴² Na bo baleele ti: «Buri wumawu kari Yesu, mwaana Yosefi, wu tuyaari taayi na nguri ko? Buri mu lumalu nde keki leele ti: me nyafumuna ku yulu?»

⁴³ Yesu wabvutula waleele kuri bo ti: «Yaa lumunguta beenu na beenu ko.

⁴⁴ Kuri muutu ti mosi wukwiisa kuri me, mbuti Taata wampeeke wahele kumutwaala, na me sa nyamufulukisa mu kiluumbu kya manunu.

⁴⁵ Dyatinu mu babikiri ti: "Bobanso sa baba bayikusu kuri Nzaambi". Ngo mpisi wumwaayuka ma Taata, na wumwaayika ma nde, lo wiisiri kuri me.

⁴⁶ Kuri wu mwaamono Taata ko, mbuti ka wunde wafumuna kuri Nzaambi ko; wunde wumwaamono Taata.

⁴⁷ Ngwanwa mu ngwanwa, me nyiluleele ti: wusa kanyi, lo wuri na kidziingu kyahele manunu.

⁴⁸ Me ngo mpa ya bumwooyo.

⁴⁹ Bataayi ba beenu badiiri maana ku nsi yankatu na bafwiiri.

⁵⁰ Yimayi ngo mpa yafumuna ku yulu, mpisi wudya yo, lo kafwa ko.

⁵¹ Me ngo mpa ya mwooyo yafumuna ku yulu; mbuti muutu diiri mpa yiyo, lo nde sa kaba mwooyo mu bibvu ngo bibvu. Na mpa yi nyiha me, ngo muswinyi waami, mu ntoono kidziingu kya nsi.»

⁵² Haho, Bayudayo bakalikisa bo na bo baleele ti: «Dyaburi nde katsiitsa kutuha muswinyi [waandi] mu kudya?»

⁵³ Ha ngo Yesu wabvutula kuri bo ti: «Ngwanwa mu ngwanwa me nyiluleele, mbuti beenu lwahele kudya muswinyi Mwaana muutu, na lwahele kunwa makila maandi, lo lwahele kubaka kidziingu mu beenu-meene.

⁵⁴ Wunde wudya muswinyi waami, na wunwa makila maami, wuri na kidziingu kyahele manunu; na me sa nyamufulukisa mu kiluumbu kya manunu.

⁵⁵ Bukuri muswinyi waami byandya byangwanwa, na makila maami malu mangwanwa.

⁵⁶ Wunde wudya muswinyi waami, na wunwa makila maami, wasa kikuundi mu me, na me mu nde.

⁵⁷ Bunu buri Taata wampeeke wuri mwooyo, na me nyiri mwooyo mu nde; bunu bubwo se wunde wudya me, sa kaba mwooyo mu me.

⁵⁸ Yimayi ngo mpa yafumuna ku yulu, yahele kuba bunu ya diiri bataayi ba beenu, na bo bafwiiri. Wunde wudya mpa yi, sa kaba mwooyo mu bibvu ngo bibvu.»

⁵⁹ Nde waleele mamo mu ntaangu yi kaba yikisa mu nzo-nkutukunu ku Kafarnawumi.

Maampu ma kidziingu kya bibvu ngo bibvu

⁶⁰ Balaka mu bayiki baandi bu bayuka mamo, baleele ti: «Maampu mamo mamakwa, na wunde wabangusina kumayuka?»

⁶¹ Yesu bu kayaaba mu nde-meene ti bayiki baandi baba kwemunguta mu ntoono yiyo, nde waleele kuri bo ti: «Buri mamo ma lubumisini makya?

⁶² Heki mbuti, beenu lumwiini Mwaana muutu toombikiri ku yulu ku kaba?

⁶³ Mpeeve yikooha bumwooyo, muswinyi wahele mufunu. Maampu ma nyiluleeriri me ngo Mpeeve na kidziingu.

⁶⁴ Ngo babamosi, ha kakati dya beenu bahele kusa kanyi.» Mukwongo, Yesu waba yaari, kuholosono kunu mbandukulu, babo bahele kusa kanyi, na wunde wumuyekele.

⁶⁵ Nde wabweese kuleele ti: «Me ndeeriri bubwo kuri beenu ti, kuri muutu ko wubangisina kwiisa kuri me, mbuti Taata wahele kumuha miswa.»

⁶⁶ Kubaandika haho, balaka [mu] bayiki baandi, babvutuka mambisa na basii bweese kweyende na nde ko.

⁶⁷ Haho Yesu waleele kuri bo kuumi na boolo ti: «Buri beenu se lubvutukiri kweenu?»

⁶⁸ Simoni Petelo wabvutula ti: «Mfumu, kuri na beetu tukweende? Ye wuri na maampu ma kidziingu kya bibvu ngo bibvu,

⁶⁹ na beetu twasa kanyi, na tuyaari ti ye ngo Wangisi, wa Nzaambi.»

⁷⁰ Yesu wabvutula kuri bo ti: «Buri beenu bo kuumi na boolo, kari me nyalusoolo ko? Ngo mosi mu beenu dyabulu kari.»

⁷¹ Nde mu Yudaya, mwaana Simoni Iskaryote kabadzoonsolo, bukuri nde waba mosi mu bo kuumi na boolo, watsimini kumuyekele.