Musamu wamubwete watina Yowane 5 - Musamu Wamubwete 2013

Yesu watsinikisa muutu wabwa mambwolokoto

¹ Ha mambisa haho, Yesu wayende ku munkeembu mosi wa Bayudayo ku Yerusalemi.

² Mu bvula didyo, ha mpele mweelu bimeeme, kuri kidzinga kimosi ki bateelaa Betedzata mu kihebeleho, kyaba masaansi mataanu.

³ Kunsa masaansi mamo, kwaba mpuumbu babeeru baba baneŋene: bafwa miisu, bari na bipfuumi mu miilu na babobo binamu. [

⁴ ]

⁵ Kwaba muutu mosi haho, waba mwaasa mibvu makuumi matatu [na] mpoomo mu kubeele;

⁶ Yesu bu kamumono waneŋene, na bu kayaabiri ti mwaasa ntaangu yalaka, waleele kuri nde ti: «Buri ye tiiri kutsiinika?»

⁷ Mubeeru wabvutula kuri nde ti: «Mfumu, me nyahele na muutu wuri, mu ntaangu yiri maampa meki maningusu, lo nde ntubiri mu kidzinga; ha nyisakaa me kweende, lo muutu mukimi tekisiri kusunduka na me.»

⁸ Yesu wamuleele ti: «Teleme, holo nkwaala yaaku na yende.»

⁹ Hanaho, muutu wunde watsiinika, waholo nkwaala yaandi na wayende. Kiluumbu kikyo kyaba kiluumbu kya mpuumunu.

¹⁰ Haho, Bayudayo baleele kuri muutu watsiinikini ti: «Lolo kiluumbu kya mpuumunu, ye wuri na miswa mya kwenata nkwaala yaaku ko."»

¹¹ Nde wabvutula kuri bo ti: «Wunde wutsinikisi me bu kandeeriryee ti: "Holo nkwaala yaaku, na yende."»

¹² Bo bamufuula ti: «Nkya muutu wukuleeriryee ti: "Holo nkwaala na yende"?»

¹³ Ngo wunde wu batsinikisi, waba wahele kuyaaba wunde na kari, bukuri Yesu waba weki kumonoko pe kunsa mpuumbu yaba haho.

¹⁴ Ha mambisa haho, Yesu wabweese kumono muutu wunde mu Nzo-nzaambi, na wamuleele ti: «Mono, ye weki wamutsiina, yaa bweese kusa masumu ko, mpisi hele kubwanikina na mabvuriri bubi.»

¹⁵ Muutu wunde wayende kweeyaabisa kuri Bayudayo ti: «Me Yesu wansinikisi.»

¹⁶ Hango nkuumbu, Bayudayo bakwaamisa Yesu, bukuri nde wayirikiri mamo mu kiluumbu kya mpuumunu.

¹⁷ Ngo Yesu wabvutula kuri bo ti: «Taayi dya me wuri mu kwesala natee mu lumalu, me se nyiri mu kwesala.»

¹⁸ Ngo mu didyo Bayudayo babvula kusaka bwa kumudzusila, bukuri kari kini kiluumbu kya mpuumunu, kaba wahele kubvumina ko, ngo bukuri waba leelaa se ti Nzaambi Taayi dya nde, na nde wuri nsiisa na Nzaambi.

Lutumu lwa Mwaana Nzaambi

¹⁹ Yesu wabvutula kuri bo, waleele ti: «Ngwanwa mu ngwanwa, me nyiluleele ti, Mwaana kari nsiila kisalu mu nde-meene ko, mbuti ka mi kamono Taayi nyirikulu ko; bukuri mimyo mi yirikaa Taayi, Mwaana se mini myo kayirikaa.

²⁰ Mukwongo, Taayi tiiri Mwaana, na wumusoongaa momanso ma kayirikaa nde-meene. Nde sa kamusoongo biyiriki bibvuriri bunene ti na bibyo, mpisi heki beenu lukimuka.

²¹ Bunu bukoofulukisaa Taayi bafwa na kubasa bamwooyo, bunubwo se Mwaana wusaana wamwooyo wunde wu katiiri.

²² Taayi wahele kutsuundisa muutu ti mosi, ngo nde waha nsundusulu yoyinso kuri Mwaana,

²³ mpisi heki bobanso bakiinsa Mwaana bunu bu bakiinsa Taayi. Wunde wahele kukiinsa Mwaana, lo wahele kukiinsa se Taayi dyamuheeke.»

²⁴ «Ngwanwa mu ngwanwa me nyiluleele ti: wunde wuyuka maampu ma me, na wusa kanyi mu wunde wampeeke, lo wuri na kidziingu kyahele manunu. Nde wahele kwiisa ku mutsuundu, ngo wayeki wayisika mu lufwa mu kuluta ku bumwooyo.

²⁵ Ngwanwa mu ngwanwa me nyiluleele ti: kilookolo kiri mu kwiisa na mu lumalu kimwaatubuka, kiri bafwa sa bayuka mbeembu ya Mwaana Nzaambi, na babo bayiyuka sa baba mwooyo.

²⁶ Bukuri, bunu buri Taayi wuri na kidziingu mu nde-meene, bunubwo se nde kari kaha kuri Mwaana mu kuba na kidziingu mu nde-meene.

²⁷ Na nde waha kuri Mwaana lutumu lwa kutsuundisa, bukuri nde ngo Mwaana muutu.

²⁸ Yaa lukimuka mu mimyo ko, bukuri kilookolo kiri mu kwiisa, kiri bobanso bari mu mampeembe, sa bayuka mbeembu yaandi,

²⁹ sa bapala mu mo, bayirikiri mamabwe sa beende ku mfulukulu ya bumwooyo, na bayirikiri mamabi ku mfulukulu ya mu mutsuundu.

³⁰ Me lo nyahele kubangisina kuyirika kitotolo ti kimosi mu me-meene. Me nyitsuundisa bunu bu nyiyukula, na mutsuundu wa me wasuunguma, bukuri me nyahele kusaka kutya kwa me-meene, ngo kutya kwa wunde wampeeke.»

Kimbaangi mu ntoono Yesu

³¹ «Mbuti me teeri kimbaangi mu ntoono me-meene, lo kimbaangi kya me kiri kyangwanwa ko.

³² Ngo mbuti mukimi wuta kimbaangi mu ntoono ya me, lo me nyaari ti kimbaangi, ki kari mu kuta mu ntoono me kyangwanwa;

³³ beenu lwaheekiri baatu kuri Yowane, na nde wateeri kimbaangi mu ntoono ngwanwa.

³⁴ Me ngo wuri nyahele na nzala kuri ti muutu kateele me kimbaangi, ngo me ndeeriri bubwo, mpisi heki beenu luba babvuukusu.

³⁵ Yowane waba bunu mwiinda wanamuku na wuri mu kweseme; ngo beenu lwatiiri kukeembe mu mwaa-kilookolo kimosi, mu buungi bwaandi.

³⁶ Haho, me nyiri na kimbaangi kibvuriri bunene ti na kya Yowane; mukwongo biyiriki bya mpa Taata mu kuyirika, biyiriki bi nyiri mu kusa, bibyo bita kimbaangi mu me, ti Taata wampeeke.

³⁷ Taata wampeeke, nde-meene wata kimbaangi mu ntoono me; ngo kasi beenu ka lwayukiri mbeembu yaandi ko, ka lwamwii se kinzeri kyaandi ko,

³⁸ na Maampu maandi mahele kusa kikuundi mu beenu, bukuri lwahele kusa kanyi mu wunde wu kari kaheeke.

³⁹ Beenu lukwefyongokono Matina, bukuri beenu lutsima kubaka kidziingu kyahele manunu mu mo; mo ngo mari mu kuta kimbaangi mu ntoono me;

⁴⁰ na beenu lwahele kutya kwiisa kuri me, mpisi heki lubaka kidziingu.»

⁴¹ «Me nyahele kusaka kuri ti baatu bankeembese.

⁴² Me nyiluyaari, beenu lwahele na ntiilu ya Nzaambi mu beenu-meene.

⁴³ Me nyayiisa mu nkuumbu ya Taayi dyaami, na beenu lwahele kuntaambula; ngo mbuti mukimi wiisiri mu nkuumbu ya nde-meene, lo wunde beenu lumutaambula.

⁴⁴ Habaana beenu, nkeembu kutaambula yi lukwehelesene beenu na beenu, ngo lwahele kusaka nkeembu yifumunaa kuri Nzaambi yomosi, lo dyaburi beenu lutsiisa kusa kanyi?

⁴⁵ Yaa lutsima ko ti me mbasi-tsuku nyilufuunda kuri Taata; wufuunda beenu, Moose wunde wu luri lwasiila nsiitu.

⁴⁶ Mukwongo, mbuti beenu lwasa kanyi mu Moose, lo beenu luketyee kusa kanyi mu me, bukuri mu ntoono ya me Moose kari katina.

⁴⁷ Ngo mbuti lwahele kusiila kanyi mu ma kari katina nde, lo buri lusiila kanyi mu maampu ma me?»