Musamu wamubwete watina Yowane 20 - Musamu Wamubwete 2013

Mukala wa mukangala

¹ Kiluumbu kyatete mu lumiingu, Mariya Madelene wayende ku mukala, mu minkya, mampimbisi maba makiri, na wamono tari Dyayusulu ha mukala.

² Haho nde wadzumuna na wayende kuri Simoni Petelo, na kuri muyiki wakaka, wuri Yesu waba mutyaanaana; nde waleele kuri bo ti: «Bayisiryeenu Mfumu mu munsa mukala, na beetu twahele kuyaaba ku bamusuusiryee.»

³ Haho, Petelo wapala na muyiki wakaka, na bayende ku mmukala.

⁴ Bo boolo, badzumuna ha kimosi; muyiki wakaka waba bvuri ntiinu na Petelo, na watubuka watete ku mukala.

⁵ Bu kayilimina, nde wamono bisila byasuusa, ngo kasiiri kukoto ko.

⁶ Simoni Petelo se watubuka ha mambisa ma nde, nde wakoto mu bulu, wakengese bisila byasuusa haho.

⁷ Mutulu wu baba wadziinga mutu waandi, wasuusa ha luteke, wafutuka ha kibeendu kya nde-kaka, waba wahele kuba ha kimosi na bisila.

⁸ Haho, muyiki wakaka, watubukiri watete ku mukala nde se wakoto, wamono na wasa kanyi.

⁹ Mukwongo, bo baba bakiri matinu kubakula pe; bwaba bwayelemene ti Yesu kafuluka mu bafwa.

¹⁰ Bayiki babweese kubvutuka mu manzo maaku.

Yesu wamonoko kuri Mariya Madelene

¹¹ Mariya waba wateleme ku mbasi, bebele na mukala, wuri mu kudila. Bu kaba dilaana, nde wayilima munsa mukala,

¹² nde wamono bambasi boolo balwaata binkuta byahembeke, badzakala, mosi ku mutu, na wakimi ku miilu, haho ha baba basuusa nyutu Yesu.

¹³ Bo baleele kuri nde ti: «Mukyeetu, buri wuri mu kudila?» Nde wabvutula kuri bo ti: «Bo bahoridyee Mfumu yaami, na me nyahele kuyaaba ku bamusuusiryee.»

¹⁴ Bu kaleele mamo, nde wasyeeteke ku mambisa, na wamono Yesu wateleme, ngo nde waba wahele kuyaaba ti wunde ngo Yesu.

¹⁵ Yesu waleele kuri nde ti: «Mukyeetu, nki wuri mu kudila? Na wuri mu kwesaka?» Nde bu kaba tsima ti wunde muutu wusala kunsa dzuumbu, na waleele kuri nde ti: «Mfumu, mbuti ye wumunetyee, lo leele me ha wumusuusiryee, na me nyee muholo.»

¹⁶ Yesu waleele kuri nde ti: «Mariya!» Nde bu kasyeeteke, waleele kuri nde mu kihebeleho ti: «Labuni!» Mambangukulu ti: «Muyikisi.»

¹⁷ Yesu waleele kuri nde: «Yaa belemene me ko! Bukuri me nyakiri kutoomboko pe kuri Taata; ngo kasi yende kuri bampaangi ba me, na leele kuri bo ti: Me ntoombokiri kuri Taayi dyaami, na Taayi dya beenu, na Nzaambi yaami na Nzaambi yeenu.»

¹⁸ Mariya Madelene wayaabisa bayiki ti: «Me mwiinyeenu Mfumu.» Na nde wabaleele mamo ma mu leeriri Yesu.

Yesu wamonokono kuri bayiki baandi

¹⁹ Hango, nsinsika bu yayisa, kyaba kiluumbu kyatete mu lumiingu, myeelu myaba myakaangu, haho haba bayiki, mu ntoono boomo bwa Bayudayo. Yesu wayisa, wateleme ha kakati dya bo, na waleele kuri bo ti: «Kiyeengi kuri beenu!»

²⁰ Bu kaleele bubwo, nde wasoongo bikaayi na lubaansi kuri bo. Bayiki baluula mu kiminu bu bamwiini Mfumu.

²¹ Yesu wabweese kuleele kuri bo ti: «Kiyeengi kuri beenu! Bunu bwampeekiri Taata, me se nyiluheekiri.»

²² Bu kaleele mamo, wafula muheebulu ha yulu bo, na waleele kuri bo ti: «Taambuleenu Mpeeve Yangisi!

²³ Kuri babo baluhemesene beenu masumu ma bo, sa maba mabahemusunu; mbuti kuri babamosi lubakebiri mo, sa maba makebu.»

Yesu bo na Toma

²⁴ Toma, mosi mu kuumi na boolo, wu bateelaa mu nkuumbu ya Didimo, kasii ba kintwaari na bo ko, ha yisiri Yesu.

²⁵ Bambaasi bayiki bamuleele ti: «Beetu tumwiinyee Mfumu.» Nde waleele kuri bo ti: «Mbuti me nyahele kumono bidiimbu bya nsooso mu bikaayi bya nde, na kusuusa muleembu mu bidiimbu bya nsooso, na kusuusa kikaayi kya me mu lubaansi lwa nde, lo me nyisiila kanyi ko.»

²⁶ Ha mambisa ma biluumbu mpoomo, bayiki baandi baba mukati, Toma se waba kintwaari na bo. Myeelu myakaangu, Yesu wayisa, wateleme ha kakati, na waleele ti: «Kiyeengi kuri beenu.»

²⁷ Tumi leeriri kuri Toma ti: «Twaala muleembu waaku ha, na mono bikaayi bya me, twaala kooko kwaaku na soko mu lubaansi lwa me. Yaa ba ngaa-muhaawu ko, ngo ba ngaa-kanyi.»

²⁸ Toma wabvutula na waleele kuri nde ti: «Mfumu yaami na Nzaambi yaami.»

²⁹ Yesu waleele kuri nde ti: «Bukuri ye mwiini me, ye siiri kanyi? Kiminu kuri bari bahele kumono, ngo basiila kanyi!»

Mufunu mukaanda

³⁰ Hango, Yesu wabweese kuyirika bidiimbu bikimi byalaka, ha busu bwa bayiki [baandi], byahele kutina mu mukaanda wumawu;

³¹ bimabi babitinini, mu kuri ti beenu lusa kanyi ti Yesu ngo Kiristo, Mwaana Nzaambi, na mpisi heki mu nsiilu kanyi, beenu lubaka kidziingu mu nkuumbu yaandi.