Musamu wamubwete watina Yowane 19 - Musamu Wamubwete 2013

¹ Hanaho, Pilato watuma ti baholo Yesu, na bamulata nkwaasulu.

² Bayongolo bayirika lukoongolo lwa manseende, bamutetekele lwo ha yulu mutu, na bamulwiika kiyuungu kyabeenge.

³ Bo bakokosolo kuri nde, na babeke kuleele ti: «Mboto yaaku, mbyaasi Bayudayo!» Na bamulata mambata.

⁴ Pilato wabweese kupala ku mbasi na waleele kuri bo ti: «Mono, me nyeki kulutwalikila nde ku mbasi, mpisi beenu luyaaba ti, me nsii mono lumvuki ti lumosi mu nde ko.»

⁵ Hango, Yesu wapala ku mbasi, kuri walwaata lukoongolo lwa manseende na kiyuungu kyabeenge. Pilato waleele kuri bo ti: «Muutu ndewu!»

⁶ Hango bu bamumono, bakuutu ba bangaanga-nzaambi na bisari babikisa baleele ti: «Mukomono ha kuruwa! Mukomono ha kuruwa!» Pilato waleele kuri bo ti: «Muholeenu beenu-meene na mukomonee ha kuruwa; bukuri, me nsii mono kwaami lumvuki mu nde ko.»

⁷ Bayudayo babvutula kuri nde ti: «Beetu turi na ngisi, na bunu buri ngisi yiyo, nde yelemini kufwa, bukuri nde-meene waleeriri ti nde Mwaana Nzaambi.»

⁸ Pilato kamanaa kuyuka ntoono yiyo, wabaka boomo bwalaka,

⁹ wabweese kukoto mu nzo mutsuundu, na waleele kuri Yesu ti: «Ye wa kuri?» Ngo Yesu kasii kumuha mvutu ko.

¹⁰ Haho Pilato kaleele kuri nde: «Ye wahele kudzoonso kuri me? Buri ye wahele kuyaaba ti, me nyiri na lutumu mu kupatula ye, na nyiri na lutumu mu kukomono ye ha kuruwa?»

¹¹ Yesu wabvutula [kuri nde] ti: «Ye wuri na lutumu ti lumosi ha yulu me ko, mbuti bahele kukuha lwo ku mayulu. Hango nkuumbu, wunde wuyekiri me kuri ye, wuri na sumu dibvuriri bunene.»

¹² Hanaho, Pilato wasaka bwa kumupatukila; ngo Bayudayo babikisa baleele ti: «Mbuti ye wumupatiri, lo ye wuri nduku Kayisari ko. Mpisi wunde wuleele nde-meene ti nde mbyaasi, lo nde mutaatu Kayisari.»

¹³ Pilato, kamana kuyuka misamu mimyo, neti Yesu ku mbasi, na dzakiri ha kibala kya mutsuundisi, ha «kibeendu kya matari» ki baleelaa mu kihebeleho ti «Ngabata.»

¹⁴ Yaba yeki nyirikulu Paaka, kilookolo kyaba kyeki kampe kyabisaamunu. Nde waleele kuri Bayudayo ti: «Mbyaasi yeenu yoyi!»

¹⁵ Hango bo babikisa ti: «Dzusa! Dzusa! Mukomono ha kuruwa!». Pilato waleele kuri bo: «Me komono ha kuruwa mbyaasi beenu?» Bakuutu ba bangaanga-nzaambi babvutula ti: «Beetu turi na mbyaasi ko, mbuti ka Kayisari ko.»

¹⁶ Hango, nde wamuyekele mpisi bamukomono ha kuruwa. Hango bo banata Yesu.

Yesu bamukomono ha yulu kuruwa

¹⁷ Bu kaba mu kwenata kuruwa nde-meene, nde wapala mu kweende ku kibeendu ki baleela ti «Kibeendu kya kiteengi kya mutu», ki baleelaa mu kihebeleho ti «Ngolongota.»

¹⁸ Kukwo, bo bamukomini ha yulu kuruwa, kintwaari na baatu boolo bakimi, wamosi ha, wakaka kuni, heki Yesu ha kakati.

¹⁹ Pilato, waba watina bisoni mu bayi wasuusa ha yulu kuruwa. Waba watina ti: «Yesu wa ku Nadzareti, mbyaasi Bayudayo.»

²⁰ Haho, balaka mu Bayudayo, bataangiri bisoni bibyo, bukuri kibeendu kikyo, ki bakomini Yesu kyaba bebele na bvula. Bisoni bibyo byaba mu ndiinga ya kihebeleho, na mu ya bari Loma, na mu kihelene.

²¹ Hango bakuutu ba bangaanga-nzaambi, ba Bayudayo baleele kuri Pilato ti: «Yaa tina ko ti: "Mbyaasi Bayudayo" ngo ti "Wumawu waleeriri ti: Me mbyaasi Bayudayo".»

²² Pilato waleele ti: «Mamo ma ntinini, ma ntinini.»

²³ Ngo bayongolo bamana kukomono Yesu ha kuruwa, baholo binkuta bya nde, bakaburi byo mu bikuuku bina, kibari kimosi mu mpisi muyongolo. Bo baholo se dzweele dyaandi. Dzweele didyo dyaba dyahele na mibaambulu, dyodinso dyaba dyabindikisa mu nsaanda mosi, kubandikila ku yulu.

²⁴ Ngo bo balelesene bo na bo ti: «Yaa tukaakilee dyo ko; ngo tuteenee wari mu kuyaaba, na wuholo dyo», mpisi heki matinu meende mu mana [maleele] ti: «Binkuta bya me, bo babikabiri bo na bo, na mu dzweele dyaami, bo bata wari.» Mimyo bayongolo bayirika.

²⁵ Ha teke kuruwa dya Yesu, nguri yaandi waba wateleme, na nguri yaandi ya kilesi, Mariya mukasi Kolopa, na Mariya Madelene.

²⁶ Hango Yesu kamonaa muyiki wu kaba tyaanaana, na nguri wateleme ha teke muyiki wunde, waleele kuri nguri yaandi ti: «Mukyeetu, mwaana waaku ndewu.»

²⁷ Tumi nde waleele kuri muyiki ti: «Nguri yaaku yoyi». Kuholosono kilookolo kikyo, muyiki waholo Mariya ku nzo yaandi.

Lufwa lwa Yesu

²⁸ Ha mambisa haho, Yesu kayaaba ti momanso ma mwaayirima, kuri heki matinu meende mu mana, nde waleele ti: «Me nyeki na mpwiisu.»

²⁹ Kwaba kisa kyaluula mu bviinya dyansa; baholo musasaka waluula mu bviinya dyansa, wakaanga mu muti isopi, na babumisa nde mu munwa waandi.

³⁰ Yesu bu kanwa bviinya dyansa, waleele ti: «Bukukiri!» Bu kateengeke mutu, muwuumunu watabuka.

Muyongolo mosi watobolo lubaansi lwa Yesu

³¹ Kyaba kiluumbu kya nyirimunu, na Bayudayo baba bahele kutya ti, manyutu maba ha yulu kuruwa mu kiluumbu kya mpuumunu. Kiluumbu kya mpuumunu kikyo kyaba nkati kyakinene. Bo baloombo kuri Pilato, miswa mya kubabokolo miilu, tumi beki bayisila.

³² Bayongolo bayende na babokolo miilu mya baatu babakomini kintwaari na nde. Babokolo mya watete, tumi mya wakaka.

³³ Bu batubuka kuri Yesu, bamono ti, waba mwaafwa, hango-nkuumbu, basii kumubokolo miilu ko.

³⁴ Ngo kasi, mosi mu bayongolo, mu dyoongi dyaandi, wamutobolo lubaansi, na ha nsi na nsi, makila na maampa byapala.

³⁵ Wunde wamwiini, wata kimbaangi, na kimbaangi kyaandi kiri kyangwanwa. Nde yaari ti mamo, ma kaleele mangwanwa, mpisi beenu lusiila kanyi.

³⁶ Misamu mimyo myayirimini, mpisi heki matinu, meende mu mana: «Ka bamubokolo muyisi ti mosi ko.»

³⁷ Matinu makaka maleele ti: «Bo sa batala kuri wunde wu baba tobolo mu dyoongi.»

Yesu bamudziika

³⁸ Ha mambisa haho, Yosefi wa ku Arimatayi, waba muyiki Yesu mu mansweeki, mu ntoono kwebata Bayudayo. Nde wayisa na waloombo kuri Pilato, mpisi kayisila nyutu Yesu. Pilato wa muha miswa, nde wayende na wayisila nyutu Yesu.

³⁹ Nikodemo se, muutu wunde, waba kweende lwatete kuri Yesu mu butsuku, watwaala mananaasi ma mire masaanga na ma alowese, makuka kampe mikuru mitatu myaminene.

⁴⁰ Baholo nyutu Yesu, bayiyooso mananaasi na bayikaanga bisila bunu bwaba kifu kya bayudayo, mu kudziika bamvuumbi.

⁴¹ Ku kibeendu ki baba bakomono Yesu, kwaba dzuumbu, na kunsa dzuumbu kwaba bulu dyamoono diri baba bakiri mvuumbi kudziikila pe.

⁴² Bo basuusa nyutu Yesu, mu bulu dyaba bebele didyo, mu ntoono nyirimunu ya Bayudayo.