Musamu wamubwete watina Yowane 18 - Musamu Wamubwete 2013

Nkaangulu Yesu

¹ Kamanaa kuleele mamo, Yesu wayende na bayiki baandi, ku simu dyakaka dya muwiilu wa Kedoroni, kukwo kwaba dzuumbu, di kakotiri nde-meene na bayiki baandi.

² Yuda, waba muyarika, nde se waba yaari kibeendu kikyo, bukuri Yesu waba kutukuna kukwo, mantaangu malaka na bayiki baandi.

³ Ngo Yuda kaholaa mukaangu bayongolo na bakebi ba Nzo-nzaambi ba kataamburi kuri bangaanga-nzaambi, na Bafarisi, bayende kunukwo na miinda na byuufu na binwaanunu.

⁴ Hango Yesu, bu kaba kayaari momanso mamutubukila, nde wapala na waleele kuri bo ti: «Na luri mu kwesaka?»

⁵ Bo babvutula kuri nde: «Yesu wa ku Nadzareti». Nde waleele kuri bo: «Me ngo nde.» Yuda, waba muyekele, waba wateleme se kintwaari na bo.

⁶ Ngo nde kaleelaa ti: «Me ngo nde», bo babvutuka mambisa na babwa ha nsi.

⁷ Yesu wabweese kubafuula ti: «Na luri mu kwesaka?» Bo babvutula ti: «Yesu wa ku Nadzareti».

⁸ Yesu wabvutula ti: «Me nyiluleeriryee ti: Me ngo nde. Ngo mbuti me luri mu kwesaka, lo hemeseenu bamaba beende kwaaku.»

⁹ Mpisi heki maampu ma kari kaleele meende mu mana: «Babo ba wuri wampa, me nyahele kudziimbisa ti mosi mu bo.»

¹⁰ Ngo Simoni Petelo, bu kaba na mbeesi yayila, kayiyuulaana, ha kalata kisari kya mukuutu bangaanga-nzaambi, na wamutabula kutu dya lubakala. Kisari kikyo kyaba nkuumbu Maloko.

¹¹ Yesu waleele kuri Petelo ti: «Bvutula mbeesi yaaku mu lukutu; mbasa ya mpa Taata, buri me nyinwa yo ko?»

Yesu bamunata ha busu bwa Ana

¹² Hango mukaangu bayongolo, na mukuutu waaku, na bakebi ba Bayudayo Basiimba Yesu, na bamukaanga bikonyi.

¹³ Bo batekesele kumunata kuri Ana. Nde waba buko bwa Kayafa, waba mukuutu bangaanga-nzaambi, mu mubvu wunde.

¹⁴ Kayafa nde ngo wabaha ndoongi kuri Bayudayo ti: «Bu bvuriri bubwete, ti muutu mosi kafwa mu ntoono kaanda.»

Petelo watuna Yesu

¹⁵ Simoni Petelo na muyiki mukimi, baba kwenama Yesu. Muyiki wunde waba wayabakana kuri mukuutu ngaanga-nzaambi, nde wakoto kintwaari na Yesu mu nzo mukuutu bangaanga-nzaambi.

¹⁶ Petelo waba wateleme ku mbasi bebele na mweelu. Hango muyiki wakaka wunde waba wayabakana kuri mukuutu bangaanga-nzaambi wadzoonso kuri mukyeetu waba kebaa mweelu, na nde wakotoso Petelo.

¹⁷ Haho, mukyeetu waba kebaa mweelu wafuula kuri Petelo ti: «Buri ye se wuri mosi mu bayiki ba muutu wumawu?» Petelo wabvutula ti: «Me nyiri nde ko!»

¹⁸ Bisari na bakebi, baba bateleme mu kuyoto mbaawu, yi baba babvuka, bukuri kwaba kyoosi. Petelo se waba kintwaari na bo mu kuyoto mbaawu.

Mukuutu bangaanga-Nzaambi waha bifuuri Yesu

¹⁹ Hango mukuutu bangaanga-nzaambi wafuula Yesu mu mitariri bayiki baandi, na mu nyikusulu dzaandi.

²⁰ Yesu wabvutula kuri nde ti: «Me nyabee kwedzoonsaana, na pwelelee kuri baatu bobanso, mu mantaangu momanso, me nyabee kweyikisaa mu manzo ma nkutukunu na mu Nzo-nzaambi, mu kookutukunaa Bayudayo bobanso, na me nyasii leele ntoono ti mosi mu nsweeki ko.

²¹ Ngo buri ye wufuula me? Fuula kuri babo bayukiri ma nyabee kwebaleelaana. Mono, bo bayaari ma nyabee kweleelaa me.»

²² Yesu kaleelaa bubwo, mosi mu bisari wakokosolo, wamulata mbata, waleele ti: «Bubwo ye wuha mvutu kuri mukuutu bangaanga-nzaambi?»

²³ Yesu wabvutula kuri nde ti: «Mbuti bwabubi me dzoonsiri, lo soongo bubi buri haho; ngo mbuti bwabubwe, buri ye wulata me?»

²⁴ Haho Ana, bu kamukaanga bikonyi wamuheeke kuri Kayafa, mukuutu bangaanga-nzaambi.

Petelo wabweese kutuna Yesu

²⁵ Simoni Petelo, bu kaba wateleme haho, mu kuyoto mbaawu, baleele kuri nde ti: «Buri ye se, wuri mosi mu bayiki ba nde ko?» Nde watuna na waleele ti: «Me nyiri nde ko.»

²⁶ Mosi mu bisari bya mukuutu bangaanga-Nzaambi, wa mu kaanda dya muutu wuri Petelo wamutabiri kutu waleele ti: «Buri me nsii monaa ye, ku dzuumbu kintwaari na nde ko?»

²⁷ Petelo wabweese kutuna, na hanaho, mulumi nsusu wakookolo.

Yesu ha busu bwa Pilato

²⁸ Bo bayisikaa kuri Kayafa, ha banata Yesu ku nzo ya munsuundu; kyaba kyeki kipari na bo ka basii koto mu nzo ya mutsuundu ko, mu kubata kusumuka, na babaka bwa kudiila Paaka.

²⁹ Haho, Pilato wapala ku mbasi ku babo bo na waleele ti: «Mu nkya ntoono beenu luri mu kufuunda muutu wumawu?»

³⁰ Bo babvutula baleele kuri nde: «Mbuti muutu bee wahele kuyirika mamabi, nkani tuketyee kumuyekele kuri ye ko.»

³¹ Pilato waleele kuri bo ti: «Muholee beenu-meene na mutsuundisee bunu buri mangisi meenu.» Bayudayo baleele kuri nde ti: «Beetu twahele na miswa, mya kudzusa muutu.»

³² Mu bubwo ma leeriri Yesu mayende mu mana, ma kaba yaabisa mu nkya mfwiilu nde kaba kayelemini kufwiila.

³³ Pilato, wabweese kukoto munsa nzo ya munsuundu, wateele Yesu na wamuleele ti: «Buri ye ngo mbyaasi Bayudayo?»

³⁴ Yesu wabvutula ti: «Buri mu ye-meene wuri mu kuleele mamo hoti baatu bakimi bakuleeriri mya mu me?»

³⁵ Pilato wabvutula ti: «Buri me Muyudayo yiri? Kaanda dya ye-meene na bakuutu ba bangaanga-nzaambi bakuyekiryee kuri me; nki wuri wayirika?»

³⁶ Yesu wabvutula: «Kimfumu kya me kiri kya ha nsi yi ko; mbuti Kimfumu kya me kibeeri kya ha nsi yi, nkani bisari bya me biketyee kunwaana, mpisi heki me mpele kuba wayekulu kuri Bayudayo; ngo mu lumalu, kimfumu kya me kiri kya hamaha ko.»

³⁷ Pilato waleele kuri nde ti: «Ngo ye mbyaasi wuri?» Yesu wabvutula ti: «Ye wuri mu kuleele ti me mbyaasi nyiri. Mu bubwo me nyiri nyabutuka, na mu bubwo me nyiri nyayisa ha nsi, mpisi heki me nta kimbaangi mu mitariri ngwanwa. Mpisi wunde wuri mu ngwanwa, lo wuyukaa mbeembu me.»

³⁸ Pilato wufuula kuri nde ti: «Ngwanwa ngo nki?» Pilato, bu kamana kuleele mamo, ha kabweese kupala ku mbasi, kuri Bayudayo na wabaleele ti: «Me nyahele kumono lumvuki ti lumosi mu nde.

Yesu bamukesele mukanu wa lufwa

³⁹ Ngo beenu luri na kifu kiri ti, me nyelemini kulupatukilaa muutu mosi mu ntaangu ya Paaka. Ngo lutiiri ti me nyilupatukila mbyaasi Bayudayo?»

⁴⁰ Hango bo bakisa ti: «Kari wunde ko, ngo Baraba!». Baraba waba ngaa-bumfuna.