Musamu wamubwete watina Yowane 17 - Musamu Wamubwete 2013

Yesu wasaambila mu bayiki baandi

¹ Yesu kamana kuleele mamo, nde wasyeetele miisu myaandi ku yulu, na waleele ti: «Taata, kilookolo kitubukiri; keembese Mwaana waaku, mpisi heki Mwaana ka kukeembese,

² mpisi heki, bunu bu wuri wamuha lutumu ha yulu baatu bobanso, nde kaha kidziingu kyahele manunu kuri bobanso ba wuri wamuha.

³ Kidziingu kya mantaangu mpmanso ngo kimaki: bayaaba ye, Nzaambi yomosi kitsu yangwanwa, na wunde wu wuri waheeke, Yesu Kiristo.

⁴ Me nyakeembisiri ye ha butoto, me nyameeni kisalu ki wampeeri mu kusa.

⁵ Mu lumalu, Taata keembese me, ha teke ye-meene, mu nkeembu yi nyaba na yo ha teke ye, tekesele nsi yiyirima.

⁶ Me nyayaabisiri nkuumbu yaaku, kuri baatu ba wampeeri ba wuri wapalisa mu nsi. Bo baba ba ye, na ye wabampeeri, na bo bakebiri maampu maaku.

⁷ Mu lumalu, bo bamwaayaaba kuri ti byobinso bi wampeeri, byafumuna kuri ye,

⁸ bukuri maampu ma wampeeri, me nyabahee mo, na bo bamataamburi na bayaaburi mu ngwanwa ti me nyapalila kuri ye, na basiiriri kanyi ti ye wampeekiri.»

⁹ «Me nyiloombo mu bo. Me nyahele kuloombo mu nsi, ngo mu babo ba wuri wampa, bukuri bo ba ye.

¹⁰ Byobinso bya me bya ye, na bya ye bya me; na me nyataamburi nkeembu mu bo.

¹¹ Me nyahele bweese kuba mu nsi, ngo bo bari mu nsi, na me nyiri mu kwiisa kuri ye. Taata dyangisi, kebe bo mu mpinu dza nkuumbu yaaku, yi wuri wampa, mpisi baba mosi, bunu beetu na ye turi mosi.

¹² Mu ntaangu yi nyabeeri na bo, me nyabee bakebaana mu nkuumbu yaaku, yi wuri wampa. Me nyabee kwebakalaana, na kuri ti mosi mu bo wadziimbiri ko, ha yulu wunu mwaana wanzimbukulu, mpisi heki Matinu meende mu mana.

¹³ Ngo kasi mu lumalu me nyiri mu kwiisa kuri ye, na nyiri mu kuleele mamo ha nsi, mpisi heki baba na kiminu kyaami, kyakuka mu bo.

¹⁴ Me nyabaheeri maampu ma ye; na nsi yababele, bukuri bo bahele ba nsi, bunu bu nyiri me, nyahele wa nsi.

¹⁵ Me nyahele kuloombo kuri ti, ye wubayisila mu nsi, ngo kuri ti ye wubakebe mu Ngaa-bubi.

¹⁶ Bo bari ba nsi ko, bunu bu nyiri me, nyahele wa nsi.

¹⁷ Wubasa bangisi mu ngwanwa, maampu maaku ngo ngwanwa.

¹⁸ Bunu bu wuri wampeeke ha nsi, me se nyibaheeke ha nsi.

¹⁹ [Me] nyisa bungisi mu me-meene mu ntoono bo, mpisi heki bo se baba bangisi mu ngwanwa.»

²⁰ «Me nyahele kuloombo mu bani bo kitsu, ngo na mu babo se basiila kanyi mu me, na mu maampu ma mo,

²¹ mpisi heki bobanso baba mosi, bunu buri ye Taata mu me, na me se mu ye, mpisi heki bo se baba mu beetu, kuri heki nsi yisa kanyi, ti ye wampeeke.

²² Me nyabaha nkeembu yi waheeri kuri me, mpisi baba mosi, bunu bu turi beetu na ye mosi,

²³ me mu bo, ye mu me, mpisi heki bo baba mosi mu kiteesu kyakuka, kuri heki nsi yiyaaba ti ye wampeeke, na ye wabatya bunu bu wuri watiila me.

²⁴ Taata, babo ba wuri wampa, me ntiiri ti haho ha nyiiri me, bo se baba na me, mpisi heki bamono nkeembu yaami, yiyo yi wuri wampa Bukuri ye watya me tekesele nyirikulu nsi.

²⁵ Taata ngaa-kusuunguma, nsi yasii kuyaaba ye ko, ngo me nyikuyaari, na bamaba bayaari ti, ye wampeeke.

²⁶ Me nyabayaabisa nkuumbu yaaku, na me sa mbweese kubayaabisa, mpisi heki ntiilu yi wuri watiila me, yiba mu bo, na me se mu bo.»