Musamu wamubwete watina Yowane 15 - Musamu Wamubwete 2013

Yesu bviinya dyangwanwa

¹ «Me ngo bviinya dyangwanwa, na Taata ngo muhati nseke bviinya.

² Nde kooyisilaa mpisi kimpaala kiri mu me, kyahele kuha bimbutu; na nde wu bweeyesaa mpisi kimpaala kiri na bimbutu, mpisi kabvula kubuta bimbutu.

³ Beenu lweki lwatsyeeme, mu ntoono maampu ma nyiluleeriri me.

⁴ Namitinee kuba mu me, na me mu beenu. Bunu buri kimpaala, lo kyahele kubangusina kubuta bimbutu mu kyomeene, mbuti kyahele namitina kuba mu mudzi bviinya; bwobumosi kuri beenu, luri natina bimbutu ko, mbuti lwahele kusa kikuundi mu me.

⁵ Me ngo mudzi bviinya, beenu ngo midzi myantele. Wunde wunamitina kuba mu me, na me mu nde, sa kabuta bimbutu byalaka, bukuri kwahele me, lo lubangusina kusa kitotolo ko.

⁶ Mbuti muutu wahele kunamintina kuba mu me, lo kumulooso ku mbasi, bunu kimpaala, na kikanini. Bimpaala byakana babikutukisaana, babitubiri ku mbaawu, na biyiiri.

⁷ Mbuti beenu lunamitina kuba mu me, na maampu maami Na maampu maami mamitina kuba mu beenu, lo loombeenu bi lutiiri, na sa lwataambula.

⁸ Mu bumabu Taayi dyaami kaba wakeembese, habaanaana beenu lubuta bimbutu byalaka, na lusoongo kuri ti beenu bayiki baami.

⁹ Bunu bwa ntiila Taata, bunubwo se me nyiri nyalutiila. Namitinee kuba munsa ntiilu yaami.

¹⁰ Mbuti beenu lukebiri ntumu dzaami, lo beenu sa lwanamitina kuba kunsa ntilu yaami; mu ntiilu yaami; bunu bu nyiri nyakebe me ntumu dza Taayi dyaami, na na nyanamitina kuba kunsa ntiilu yaandi mu ntiilu yaandi.»

¹¹ «Me nyiluleeriri mimyo, mpisi heki kiminu kyaami kiba mu beenu, na kiminu kyeenu kiba kyakuka.

¹² Lutumu lwa me ngo lu: tilisinee beenu na beenu, bunu bu nyiri nyalutiila me.

¹³ Ntiilu yibvuriri bunene yiri na muutu ngo, ya kuha kidziingu kyaandi mu banduku.

¹⁴ Beenu luri banduku baami, mbuti luyirikaana ma nyilutumaana.

¹⁵ Me nyahele kubweese kuluteele bisari, bukuri kisari kayaa bisaana mfumu yaandi ko. Me nyiluteele banduku, bukuri me nyaluyaabisiri myominso mi nyayikiri kuri Taayi dyaami.

¹⁶ Kari beenu lwasooriri me ko; kasi meenu nyalusooriri na nyalusuusa, mpisi heki beenu lweende na lubuta bimbutu, na bimbutu byeenu binamitina kuba, mpisi heki ma luloombo kuri Taata mu nkuumbu yaami, nde kaluha.

¹⁷ Ma nyilutuma me mamama, tilisinee beenu na beenu.»

Nsi yabele Yesu na bayiki baandi

¹⁸ «Mbuti nsi yiri mu kulubele, yaabeenu ti me ngo watete wu kari kabele.

¹⁹ Mbuti beenu lwaba ba nsi, nkani nsi yaketi kulutya, bukuri beenu lwaketi kuba ba yo. Ngo bukuri, me nyalusooriri na nyalupalisiri mu nsi, na beenu lwahele kubweese kuba baatu ba nsi, mu ntoono yiyo, nsi yiri mu kulubele.

²⁰ Baambukeenu mwooyo mu maampu ma nyaluleeriri: "Kisari wahele kulutila bunene ti na mfumu yaandi." Mbuti bo bakwaamisini me, lo beenu se sa balukwaamisa; mbuti bakebiri maampu ma me, lo sa bakebe se na ma beenu.

²¹ Ngo sa baluyirikila momanso mamo, mu ntoono nkuumbu yaami, bukuri bo bahele kuyaaba wunde wampeeke.

²² Mbuti me nyasii kwiisa ko, na nyahele kubadzoonsolo, nkani bahele kuyirika masumu. Ngo mu lumalu, lo bo basii na mpemisi ko mu masumu maaku.

²³ Wunde wubele me, wabele se na Taayi dya me.

²⁴ Mbuti me mbee nyahele kusa biyiriki ha kakati dya bo, biri muutu ti mosi kayirikiri ko, baketyee kuba na masumu ko; ngo mu lu, bo bamwiini na banyaafuni me na Taayi dyaami.

²⁵ Mimyo kuyirima, mu kuri ti matinu mu Mangisi ma bo, meende mu mana: "Bo baberiri me, kwahele buungu."»

²⁶ «Mbasi-tsuku, dikwiisa Mukakiri wuri ku Taata, Mpeeve Yangwanwa yifumuna kuri Taata, wunyiluheeke me, nde sa kateele me kimbaangi,

²⁷ na beenu se, sa lwateele me kimbaangi, bukuri kuholosono kunu mbandukulu, beenu luri kintwaari na me.»