Musamu wamubwete watina Yowane 13 - Musamu Wamubwete 2013

Yesu waswaaka miilu mya bayiki baandi

¹ Tekesele munkeembu wa Paaka wuba, Yesu bu kayaari ti kilookolo kyaandi kimwaatubuka, kya kuyisika mu nsi yimayi na kweende kuri Taata, bu kaba katiiri ba nde-meene mu nsi yimayi, wasoongo ntiilu yaandi mu bo natee ku manunu.

² Kilookolo ki baba dya mu nsinsika, dyabulu waba mwaasuusa, mu mutima Yuda, mwaana Simoni Iskaryote, kitsimi kya kuyekele Yesu.

³ Yesu bu kaba kayaari ti, Taata wamuyakisa byobinso mu myooko myaandi, na ti, nde wafumuna kuri Nzaambi, na kuri Nzaambi keki bvutuka,

⁴ nde wateleme ha kibeendu kikyo, wayisila binkuta bya mu yulu, na bu kaholo nsaanda, wayikaanga mu luketu lwaandi;

⁵ tumi ha kayitila maampa munsa lukoombo, na wabeke mu kuswaaka miilu mya bayiki baandi, na kuyaala myo mu nsaanda yikaba kakaanga mu luketu.

⁶ Nde wayooko kuri Simoni Petelo. Nde waleele kuri Yesu ti: «Mfumu, ye swaaka miilu mya me?»

⁷ Yesu wabvutula waleele kuri nde ti: «Mamo ma nyiri mu kuyirika me, ye wahele kuyaaba mu lumalu, ngo ye sa bakula mo ha mambisa.»

⁸ Petelo waleele kuri nde ti: «Ye wuri nswaakila miilu mya me ko!» Yesu wabvutula kuri nde ti: «Mbuti me nyahele kuswaaka ye, lo ye wuba, kintwaari na me ko».

⁹ Simoni Petelo wamuleele ti: «Mfumu, kari mini miilu mya me ko, ngo swaaka se na myooko na mutu!»

¹⁰ Yesu wamuleele ti: «Wunde wubee mwaayoolo maampa, lo kari na nzala kubweese kuyoolo ko, ha yulu mini miilu kuswaaka, bukuri watsyeeme ndemunso, na beenu lwatsyeeme, ngo kari beenu-banso ko.»

¹¹ Mukwongo, Yesu waba yaari wunde wumuyekele, ngo nkuumbu kabaleele ti: «beenu-banso lwahele kutsyeeme.»

¹² Kamanaa kuswaaka miilu mya bo, nde wabweese kulwaata binkuta byaandi, na wabweese kudzakala mu kudya. Nde wabafuula ti: «Buri beenu luyaari ma nyirikiri me kuri beenu?

¹³ Beenu luteelaa me ti: "Muyikisi" na "Mfumu", bwabubwe luleelaa, bukuri me bubwo nyiri.

¹⁴ Ngo mbuti, me Mfumu na Muyikisi nyiluswaakiryee miilu, lo beenu se, luyelemini kuswaakisina miilu beenu na beenu,

¹⁵ bukuri me nyiluheeri kifwaani mpisi heki, beenu se lusa bubwo bu nsii me mu beenu.

¹⁶ Ngwanwa mu ngwanwa, me nyiluleele ti: kisari wahele kubvula bukuutu na mfumu yaandi, wu bari baheeke se wahele kubvula bukuutu na wunde wamuheeke.

¹⁷ Mbuti beenu luyaari mimyo, lo beenu luri mu kiminu mbuti beenu lusariri myo.

¹⁸ Me nyahele kudzoonsolo mu beenu-banso; me nyaari ba nyiri nyasoolo; ngo kasi matinu mayelemini kweende mu mana: "Wunde wudya mpa me, wanangukina me kisiŋini kyaandi".

¹⁹ Kubandikila mu lumalu, me nyiluyaabisa, tekesele mamo mayirima, mpisi heki mu ntaangu yiyo yi mayirima, beenu lusa kanyi ti "me nyiri".

²⁰ Mu ngwanwa mu ngwanwa, me nyiluleele, wunde wutaambula wu nyiheeke me, lo me kataambula se, na wunde wutaamburi me, lo wunde wampeeke kataamburi.»

Yesu wuyaabisa ti Yuda bee wumuyekiri

²¹ Bu kamana kudzoonso mamo, Yesu mutima wasa mambaawu, na wata kimbaangi waleele ti: «Mu ngwanwa mu ngwanwa me nyiluleele, mosi mu beenu sa kanyekele.»

²² Bayiki batalisina bo na bo, bahele kuyaaba mu na, kari mu kudzoonsolo.

²³ Mosi mu bayiki baandi wunde waba wuri Yesu wumutiiri, waba walaambula miilu mu kudya, na wasiingima ha ntulu Yesu.

²⁴ Simoni Petelo wadzoonsolo mu kidiimbu kuri muyiki wunde, mu kuyaaba mu na, kari mu kudzoonsolo.

²⁵ Muyiki wunde, bu kasiingima ha ntulu Yesu, wamufuula ti: «Mfumu, na wunde?»

²⁶ Yesu wabvutula ti: «Wunde wu nyiha me kitsuri kya mpa ki nyitsuuba me mu lukoombo.» Nde watsuuba kitsuri kya mpa, [nde waholo na] waha kuri Yuda, mwaana Simoni Iskaryote.

²⁷ Kamanaa kudya kitsuri kya mpa, Satana wakoto mu nde. Haho Yesu wamuleele ti: «Ma wuri mu kuyirika, yirika mo mu mawasu.»

²⁸ [Ngo] kuri muutu ti mosi ko, mu baba balaambula miilu mu kudya, wabakuri mu nkya ntoono nde kaba muleele mamo.

²⁹ Mukwongo, bamosi baba kutsima ti, bukuri Yuda waba kwekebaana nkangala mboongo, ngo Yesu kamuleeriri ti, yende wesuumba bi turi na nzala byo mu munkeembu, bunu pe mu ntoono bawelu, mpisi kabaha kitotolo.

³⁰ Bu kamana kudya kitsuri kya mpa, nde wapala mu kilookolo kinikyo. Bwaba bweki butsuku.

Lutumu lwamoono

³¹ Hanaho Yuda kamana kupala, Yesu waleele ti: «Mu lumalu Mwaana muutu weki wakeembusu, na Nzaambi wakeembusu mu nde;

³² [Mbuti Nzaambi weki wakeembusu mu nde,] lo Nzaambi se, sa kamukeembese mu nde, na hanaho, sa kamukeembese.

³³ Mwaa-baala, me nyakiri na beenu mu mwaa-ntaangu yantele. Beenu sa lwasaka me, ngo bunu bu nyabee leele kuri Bayudayo ti, ku nyikweende me, beenu lubangusina kwiisa ko; kuri beenu se bunubwo nyileele mu lumalu.

³⁴ Me nyiluha lutumu lwamoono: Tilisineenu beenu na beenu; bunu bu nyiri nyalutya me, beenu se tilisineenu beenu na beenu.

³⁵ Mu bubwo, bobanso bayaaba ti, beenu luri bayiki baami; mbuti beenu lwatilisina beenu na beenu.»

Yesu wuyaabisa ti Petelo sa kamutuna

³⁶ Simoni Petelo waleele kuri Yesu ti: «Mfumu, kuri ye wuri mu kweende?» Yesu wabvutula kuri nde ti: «Ku nyikweende me, ye lo wubangisina me kunama mu lumalu ko; ngo kasi kunu mankula ye sa nama me.»

³⁷ Petelo waleele kuri nde ti: «Mfumu, bukuri nki, me lo nyahele kubangisina kunama ye mu lumalu? Me sa nyekele kidziingu kya me, mu ntoono ye!»

³⁸ Yesu wabvutula ti: «Ye lo yekiri kidziingu kya ye mu ntoono me? Mu ngwanwa mu ngwanwa, me nyikuleele ti, tekesele mulumi nsusu kakookolo, lo ye sa tuna me, mbala tatu.»