Musamu wamubwete watina Yowane 12 - Musamu Wamubwete 2013

Mariya wayooso mananaasi mu miilu mya Yesu

¹ Biluumbu bisaamunu, tekesele munkeembu wa Paaka kaba, Yesu wayende ku Betanya, kwaba dzakalaa Ladzaro, wu kaba fulukisa mu bafwa.

² Kukwo, bamuha mbyandya, na Malata wamusiila byo ha kibeendu kya kudiila. Ladzaro waba mosi mu babo baba balaambula miilu mu kudya na nde.

³ Mariya bu kaholo mukuru mananaasi mantalu yalaka, wayitila mu miilu mya Yesu, na wayaala myo mu mfu dzaandi. Nzo yoyinso yaluula mu mfuku mananaasi.

⁴ Mosi mu bayiki baandi, Yuda Iskaryote, wunde wumuyekele, waleele ti:

⁵ «Buri baheryee kuyarika mananaasi ma, mu nkama tatu dza bidenali, na kuha kuri bawelu?»

⁶ Nde mamo kuleele, kari bukuri waba na musoongo mu bawelu ko, ngo bukuri waba ngaa-kwiibi, na nde waba kwekebaana nkangala mboongo, na bukuri waba holaana bi basokaa mumwo.

⁷ Yesu waleele ti: «Muhemese, nde kayirika mamo, mu ntoono kiluumbu kya nziikulu me.

⁸ Mukwongo, mu mantaangu momanso beenu luri kintwaari na bawelu; ngo kasi, beenu lwahele kuba kintwaari na me, mu mantaangu momanso.»

Ladzaro bamukutula mamfuundu

⁹ Mpuumbu yayinene ya Bayudayo yayaaba kuri ti, Yesu wuri ku Betanya. Bo bayende kukwo, kari munu mu ntoono Yesu ko, ngo mu kuri ti bamono se Ladzaro wu kafulukisi mu bafwa.

¹⁰ Bakuutu ba bangaanga-nzaambi baholo kitsimi kya kudzusa Ladzaro,

¹¹ bukuri, mu ntoono nde, balaka baba yitikaana Bayudayo, na kusiila kanyi mu Yesu.

Nkotulu Yesu ku Yerusalemi

¹² Ha mambisa ma kiluumbu kikyo, mpuumbu yayinene yabakwiisa ku munkeembu, yayuka ti Yesu wuri mu kwiisa ku Yerusalemi.

¹³ Baatu baholo matsweeni na bapala mu kweenmubwaana. Bo babeke kubikisa ti: «Hosaana! Kaba wasakumunu, wunde wukwiisa mu nkuumbu ya Mfumu, [na] mbyaasi ya Isaheli.»

¹⁴ Yesu, bu kamono mwaana mpuunda, wadzakala ha yulu nde, bunu bu diri dyatinu ti:

¹⁵ «Yaa ba na boomo ko, ntuumba ya Syoni; mono mbyaasi yaaku wiisiri, wadzakala ha yulu mwaana mpuunda.»

¹⁶ Bayiki baandi, hatete, baba bahele kubakula; ngo kasi Yesu habaanaa weki wakeembusu, haho bo babaambukiri mwooyo, ti mamo maba matinu mu nde, na bayirikiri bubwo mu nde.

¹⁷ Mpuumbu yaba na nde, ha kaba teele Ladzaro ku kupala mu mukala, mu kumufulukisa mu bafwa, yata kimbaangi mu nde.

¹⁸ Hango nkuumbu, mpuumbu [se] yayisa mu kumubwaana, bukuri bayukiri ti: nde wayirikiri kidiimbu kikyo.

¹⁹ Hango Bafarisi balelesene bo na bo ti: «Lumono bubwo, beenu lubangusina kusa kitotolo ko: mono baatu bobanso beensi ha mambisa ma nde!»

Bahelene babamosi bari mu kusaka Yesu

²⁰ Mu baba toomboko ku kweesaambila Nzaambi ku munkeembu, kwaba mwaa ndaambu Bahelene.

²¹ Bo bakokosolo kuri Filipo, wa ku Betesayida dya Ngalili, bamufuula baleele ti: «Mfumu, beetu tutiiri kumono Yesu.»

²² Filipo wayende kuleele kuri Andere, na Andere bo na Filipo, bayende ha kimosi mu kuleele kuri Yesu.

²³ Yesu wabvutula kuri bo waleele ti: «Kilookolo kitubukiri, kiri Mwaana muutu sa kaba wakeembese.

²⁴ Ngwanwa mu ngwanwa me nyiluleele, mbuti nkono saangu yibwiiri ha butoto yahele kufwa, lo sa yiba yokaka; ngo mbuti yifwiiri, lo sa yapalisa bimbutu byalaka.

²⁵ Wunde wutiiri kidziingu kyaandi, lo sa kadziimbisa kyo; na wunde wubele kidziingu kyaandi, mu nsi yimayi, lo sa kakebe kyo, mu kubaka kidziingu kyahele manunu.

²⁶ Mbuti muutu tiiri kusalila me, lo kanama me; na haho ha nyiri me, lo kisari kya me se, sa kaba hanaho. Mbuti muutu wusalila me, lo Taata sa kamukiinsa.»

Yesu wudzoonsolo mu lufwa lwaandi

²⁷ «Mu lumalu, me mutima wusa mambaawu, ngo me ndeele ti kwe? Ti Taata, bvuukisa me mu kilookolo kimaki? Hango me ti, mu ntoono kilookolo kimaki nyiri nyayisa.

²⁸ Taata keembese nkuumbu yaaku!» Mbeembu yayukukuna ku mayulu ti: «Me nyakeembisiri nde, na sa nyabweese kumukeembese.»

²⁹ Mpuumbu yaba yateleme haho, bu yayuka yaleele ti: «Yiyo yibeeri nzasi!» Bakaka baleele ti: «Yiyo mbasi yidzoonsiri kuri nde.»

³⁰ Yesu wabvutula na waleele ti: «Kari mu ntoono me mbeembu yiyo yiyukukini ko, ngo mu ntoono beenu.

³¹ Mu lumalu, nsundusulu ya nsi yeki; mu lumalu, mfumu ya nsi yimayi sa bamutuba ku mbasi;

³² Na me mbasi-tsuku, ha nyisisa butoto mu kuba wadzaangusu, me sa nyakoko bobanso ku nyiri meenu.»

³³ Nde mimyo kuleele mu kuyaabisa, mu kya mfwiilu nde kaba kayelemene kufwiila.

³⁴ Mpuumbu yabvutula kuri nde ti: «Beetu twayukiri mu mangisi ti, Kiristo wunamitina kuba mu mu mantaangu momanso; heki ye buri wuleele ti: Mwaana muutu yelemini kuba wadzaangusu? Mwaana muutu wunde na?»

³⁵ Haho Yesu waleele kuri bo ti: «Buungi bwakiri ha kakati dya beenu, mu mwaa-ntaangu yantele. Yendee lwedyaata bu lwakiri na buungi, mpisi heki luhele kukimuka kuri lweki kunsa mampimbisi; bukuri wunde wukweyende kunsa mampimbisi wahele kuyaaba ku kakweende.

³⁶ Bu lwakiri na buungi, siilee kanyi mu buungi, mpisi luba baala ba buungi.» Bu kamana kunzoonso mamo, Yesu wasasika na wasweeme la na bo.

Bayudayo bahele kusiila Yesu kanyi

³⁷ Nde wayirika bidiimbu byalaka ha busu bwa bo, ngo bahele kumusiila kanyi,

³⁸ mpisi heki maampu ma leele Esaya mubikiri meende mu mana: «Mfumu, na wasiiriri kanyi mu ma twayukiri beetu? Kuri na Mfumu kasoongiri mpinu dzaandi?»

³⁹ Hango-nkuumbu, bo baba bahele kusiila kanyi. Mukwongo, Esaya wubweese kuleele ti:

⁴⁰ «Nde wabadzusiri miisu, na wabakubisiri mitima, mpisi heki bahele kumono mu miisu, bahele kubakula mu mutima, bahele kuyiinga dyeele, na me nyibatsinikisa.»

⁴¹ Esaya waleele bubwo, bukuri nde wamwiini munkeembu Yesu, na wadzoonsolo mu ntoono nde.

⁴² Ngo ha kakati dya bakuutu, baatu balaka basiiriri kanyi mu nde. Kasi mu ntoono Bafarisi, baba bahele kutambukila mu kubata ti, bee babapalisiri mu nzo-nkutukunu.

⁴³ Bukuri bo babvuriri kutya munkeembu wa baatu ti na munkeembu wa Nzaambi.

Nsundusulu mu maampu ma Yesu

⁴⁴ Yesu wabikisa waleele ti: «Wunde wusa kanyi mu me, lo kari mu me kasiila kanyi ko, ngo mu wunde wampeeke,

⁴⁵ na wunde wumono me, lo mwiini se wunde wampeeke.

⁴⁶ Me ngo buungi, nyayisa ha nsi, mu kuri ti mpisi wunde wusa kanyi mu me, kahele kunamitina kuba ku mampimbisi.

⁴⁷ Mbuti muutu, yukiri maampu maami, na wahele kumakebe, lo kari me nyimutsuundisa ko, bukuri me nyahele kwiisa mu kutsuundisa nsi, ngo mu kubvuukisa nsi.

⁴⁸ Wunde wubisa me, na wuhele kutaambula maampu ma me, lo wuri na wumutsuundisa.» Maampu ma ndeeriri me, mamo mamutsuundisa mu kiluumbu kya mpotulu.

⁴⁹ Bukuri me nsii dzoonso mu me-meene ko, ngo Taayi dyaami wampeeke, wampee lutumu mu mya kuleele na mya kudzoonsolo.

⁵⁰ Me nyaari ti lutumu lwaandi, luri na kidziingu kya mantaangu momanso. Ngo ma nyileele me, me kumaleele bunu bwa leeriri Taata, bunubwo se me nyimaleele.