Musamu wamubwete watina Yowane 1 - Musamu Wamubwete 2013

Maampu ma buungi na ma kidziingu.

¹ Ku mbandukulu kwaba maampu, maampu maba kuri Nzaambi, na maampu maba Nzaambi.

² Ku mbandukulu, mo maba kuri Nzaambi.

³ Byobinso byayirima mu mo; na kuri kitotolo ti kimosi kyayirima ko, kwahele kuyirimina mu mo.

⁴ Mu mo mwaba kidziingu, na kidziingu kyaba buungi bwa baatu;

⁵ buungi bwaseme kunsa mampimbisi, ngo mampimbisi masii taambula bwo ko.

⁶ Kwaba muutu mosi wuri Nzaambi wamuheekiri, nkuumbu yaandi Yowane.

⁷ Nde wayisa mu ntoono kimbaangi, mpisi kata kimbaangi mu buungi, kuri heki baatu bobanso basa kanyi mu nde.

⁸ Kari nde waba buungi ko, ngo nde wayisa mpisi kata kimbaangi mu buungi.

⁹ Buungi bubwo bwaba bwangwanwa, buhaanaa nsyeemunu kuri mpisi muutu, bu bwiisiri ha nsi.

¹⁰ Wunde wuri maampu, waba ha nsi, na nsi yayirimina mu nde, ngo nsi yasiiri kumuyaaba ko.

¹¹ Nde wayisa mu nsi ya nde-meene, ngo ba nde-meene basii kumutaambula ko.

¹² Ngo kuri bobanso bamutaambula, nde wabaha lutumu lwa kuba baala ba Nzaambi, kuri babo basa kanyi mu nkuumbu yaandi,

¹³ bahele kubutuka mu makila, mu kutya kwa muswinyi, na mu kutya kwa muutu, ngo kasi mu Nzaambi.

¹⁴ Ngo Maampu mayeki makituka muutu, nde wayisa kuba ha kakati dya beetu, waluula mu bweese na mu ngwanwa, na beetu twamono nkeembu yaandi, nkeembu yiri bunu yitaambulaana mwaana ndemosi kuri Taayi.

¹⁵ Yowane wata kimbaangi mu nde, wabikisa, waleele ti: «Wumawu ngo wu nyabee leele me ti: "Wuri mu kwiisa ku mambisa ma me, watekisiri na me, bukuri nde waba watete na me."»

¹⁶ Bukuri mu nduululu yaandi, beetu-banso twataambula bweese ha yulu bweese;

¹⁷ mukwongo bukuri mangisi mayisikila mu Moose, bweese na ngwanwa byayisikila mu Yesu Kiristo.

¹⁸ Kuri muutu wu mwaamono Nzaambi ko; ngo Mwaana ndemosi wuri Nzaambi, wuri munsa Taayi, nde kooyaabisa.

Kimbaangi kya Yowane Mubotiki

¹⁹ Kimaki ngo kimbaangi kya Yowane, mu ntaangu yiri Bayudayo ba ku Yerusalemi baheekiri [kuri nde] bangaanga-nzaambi, na bisari bya Nzo-nzaambi mu kumufuula ti: «Ye na wuri?»

²⁰ Nde waleele, wahele kutuna, waleele ti: «Me nyiri Kiristo ko.»

²¹ Bo bamufuula ti: «Heki ye na kwaandi? Buri ye ngo Eliya?» Yowane waleele ti: «Pele, me nyiri Eliya ko! Buri ye mubikiri wuri?» Nde wabvutula ti: «Pele!»

²² Hango bo baleele kuri nde ti: «Heki ye na wuri, mpisi heki beetu tuha mvutu kuri babo batusindikiri? Ye nki leeriri mu ntoono ye-meene?»

²³ Nde waleele ti: «Me nyiri "mbeembu, ya wunde wukwebikisa mu nsi yankatu ti: Suungukeenu nzila Mfumu!"» Bunu bwaleele mubikiri Esaya.

²⁴ Babaheekiri babo, baba Bafarisi.

²⁵ Bo bamufuula na baleele kuri nde ti: «Ngo buri ye wuri mu kwebotoko, mbuti ye wuri Kiristo ko, wuri Eliya ko, na wuri se mubikiri ko?»

²⁶ Yowane wabvutula kuri bo, waleele ti: «Me nyiri mu kwebotoko mu maampa, ngo ha kakati dya beenu, hari wunde wuri beenu lwahele kumuyaaba.

²⁷ Nde wukwiisa ku mambisa ma me, ngo [me] nyahele kukuka mu kunyanguna misiinga mya masapaatu ma nde.»

²⁸ Mimyo myayirima ku Betanya, mu simu dya Yolodani, kwaba botokaana Yowane.

Yesu, Mwaana Kimeeme kya Nzaambi

²⁹ Ha mambisa ma kiluumbu kikyo, Yowane wamono Yesu wuri mu kwiisa kuri nde, waleele ti: «Monee Mwaana kimeeme kya Nzaambi, wuyisilaana masumu ma nsi.»

³⁰ Mu ntoono ya nde, me nyabee leele ti: "Kuri muutu mosi, wuri mu kwiisa ku mambisa ma me, watekisiri na me, bukuri nde waba watete na me."

³¹ «Me nyaba nyahele kumuyaaba; ngo mu kuri ti kaba wamonokono kuri Isaheli, mu didyo me nyayisiri mu kubotoko mu maampa.»

³² Yowane wata kimbaangi, waleele ti: «Me nyamono Mpeeve, bunu beembe, yanangukina ku yulu, yakulumuka, yasa kikuundi ha yulu nde.

³³ Me nyaba nyahele kumuyaaba, ngo wunde wampeekiri mu kubotoko mu maampa, waleele kuri me ti: "Mbasi-tsuku wu monaana wunde wuri Mpeeve yisundukiri na yisiri kikuundi ha yulu nde, lo wunde ngo wubotoko mu Mpeeve Yangisi."

³⁴ Me nyamwiini na nyateeri kimbaangi ti, wumawu ngo Mwaana Nzaambi.»

Bayiki ba Yesu batete

³⁵ Ha mambisa ma kiluumbu kikyo, Yowane waba wabweese kuteleme haho, na bayiki boolo mu bayiki baandi.

³⁶ Bu kamono Yesu wuri mu kuluta, nde waleele ti: «Monee, Mwaana kimeeme kya Nzaambi!»

³⁷ Bayiki bo boolo, bayuka ma kaba leele nde, na banama Yesu.

³⁸ Yesu kasyeetekaana, wubamwiini bari mu kwemunama, waleele kuri bo ti: «Nki luri mu kwesaka?» Bo baleele kuri nde ti: «Labi, mbangukulu ti, Muyikisi, kuri ye wuri mu kudzakala?»

³⁹ Nde waleele kuri bo ti: «Waseenu na sa lwamono.» Bo bayende na bamono ha kakoobaanaa nde, na bo badzakala na nde kiluumbu kikyo; kilookolo kyaba kyeki, kampe kyakuumi.

⁴⁰ Mosi mu bo boolo bayukiri maba leele Yowane, na baba nama Yesu, waba Andere, mpaangi Simoni Petelo,

⁴¹ nde watekesele kumono mpaangi yaandi Simoni na wamuleele ti: «Beetu tumwiinyee Mesya», mbangukulu ti «Kiristo.»

⁴² Nde wamunata kuri Yesu. Yesu bu kamutala, waleele ti: «Ye ngo Simoni, mwaana Yowane, ye sa bakuteele mu nkuumbu ya Kefa» mbangukulu ti «Petelo».

Filipo na Natanahele

⁴³ Ha mambisa ma kiluumbu kikyo, Yesu waŋana kweende ku Ngalili. Nde wabwaana Filipo na wamuleele ti: «Nama me.»

⁴⁴ Filipo waba wa ku Betesayida, bula bumosi na Andere bo na Petelo.

⁴⁵ Filipo wabwaana Natanahele, wamuleele ti: «Beetu tumwiinyee wunde wuri Moose wuri, mu kudzoonsolo mu nde mu Mangisi, na mu babikiri, Yesu, mwaana Yosefi wa ku Nadzareti.»

⁴⁶ Natanahele waleele kuri nde ti: «Buri ku Nadzareti se, lo kufumini kitotolo kyakibwete?» Filipo waleele kuri nde ti: «Wasa na mono.»

⁴⁷ Yesu wamono Natanahele wuri mu kwiisa kuri nde, waleele mu ntoono nde ti: «Mono mu-Isaheli wangwanwa, mu nde mwahele kuba mawunu.»

⁴⁸ Natanahele waleele kuri Yesu ti: «Ye buri yaabiri me?» Yesu wubvutula, waleele kuri nde ti: «Tekesele Filipo kakuteele mbila, lo me nyikumwiinyee, ha mposi mungenge.»

⁴⁹ Natanahele wabvutula kuri nde ti: «Labi, ye ngo Mwaana Nzaambi, ye ngo mbyaasi ya Isaheli.»

⁵⁰ Yesu wabvutula na waleele kuri nde ti: «Bukuri me nyikuleeriri ti me nyikumwiinyee ha mposi mungenge, ngo ye siiri kanyi? Ye sa mono mabvuriri bunene ti na mamo.»

⁵¹ Yesu waleele kuri bo ti: «Mu ngwanwa mu ngwanwa, me nyiluleele, beenu sa lwamono yulu dyadzibulu, na bambasi ba Nzaambi batoomboko na bakulumuka ha yulu Mwaana muutu!»