Mukaanda kuri bari Ngalatya 6 - Musamu Wamubwete 2013

Kwenatisina binati

¹ Bampaangi, mbuti muutu bamutangusini wuyirika mamabi, lo beenu bakimpeeve suungukeenu wa bubwo, mu mpeeve ya bundeembu, ngo ye-meene se, sa madyeele mpisi hele kubwa mu nsindukulu.

² Yendeenu lwenatisina binati beenu na beenu, mu bubwo, beenu lukukisa Mangisi ma Kiristo.

³ Mukwongo mbuti muutu wutsima ti wuri mufunu, koomosoko wabuunu, lo nde wuwunukinaana.

⁴ Hemese mpisi muutu kayirika kutala kisalu kyaandi, tumi yiyo yiba ntoono ya kimweese mu nde-meene, nkani ka mu mukimi ko.

⁵ Mukwongo, mpisi muutu kanaanguna kilemu kya nde-meene.

⁶ Hemese wunde wu bayikisa Maampu, kaha kikuuku kya byobinso bikari na byo, kuri wunde wumuyikisa.

⁷ Yaa luwunukina kweenu ko, bakoosiila Nzaambi munsiku ko; bukuri, mamo ma kunaa muutu mani mamo se katolo.

⁸ Bukuri wunde wukuna mu kimuutu kya nde-meene, sa katolo mu kimuutu mbiiyulu; na wunde wukuna mu Mpeeve, sa katolo mu Mpeeve, kidziingu kyahele manunu.

⁹ Tweyirikeenu mamabwe, yaa tuholo-bito ko, bukuri ntaangu bu yikuka, sa twatolo, mbuti twahele kubwoongolo.

¹⁰ Mu didyo, ha twakiri na ntaangu, tuyirikeenu mamabwe kuri baatu bobanso, ngo bvula-bvula kuri baturi kintwaari mu kanyi.

Ndubululu ya mpotulu na mboto

¹¹ Monee, buri bunene bwa bisoni bi nyiri mu kutina mu kooko kwaami.

¹² Bobanso bari na nzala-kubila mu muswinyi, batiiri kulukwiikisa kuteende bubakala, mpisi heki bahele kuba bakwaamusu mu ntoono ya kuruwa dya Kiristo.

¹³ Mukwongo, bateende bubakala bahele kubvumina Mangisi bo-meene, ngo kasi bo batiiri ti beenu luba lwateende bubakala, mpisi babilika mu manyutu ma beenu.

¹⁴ Me ngo wuri, nyahele kusa nzala-kubila mu kitotolo, mbuti kari mu kuruwa dya Mfumu yeetu Yesu Kiristo ko, mu dyo, nsi yayeki yakomono mu ntoono ya me, na me bankomono mu ntoono ya nsi.

¹⁵ Mukwongo, kuba wateende bubakala bunu pe kuhele kuba wateende bubakala kuri mufunu ko; ngo biri mufunu kuba kiyiriki kyamoono.

¹⁶ Na bobanso basalila mu ngisi yiyo, kiyeengi na ngebe biba kuri bo, na kuri Isaheli dya Nzaambi.

¹⁷ Mu misiiri ngo miri, muutu yaa kansiila nduungusu ko, mukwongo, me nyiri na bidziminu bya Yesu mu nyutu yaami.

¹⁸ Bampaangi, bweese bwa Mfumu yeetu Yesu Kiristo buba na kiluunsi kya beenu! Amene.