Mukaanda kuri bari Ngalatya 5 - Musamu Wamubwete 2013

Yaa ludziimbisa bunsaalisi bweenu ko

¹ Kiristo watukuula mpisi tuba na bunsaalisi. Ngo telemee na ngwii, na yaa lubweese kukoto mu kihaangu kya bunkutu ko.

² Yukeenu, me Pawulo, bu nyiri mu kuleele ti: mbuti beenu lutaamburi ti baluteende bubakala, lo Kiristo kasiiri mufunu kuri beenu ko.

³ Me nyibweese kutswiikisa dyo, kuri mpisi muutu wutaambula kuteende bubakala ti, lo yelemini se kukukisa Mangisi momanso.

⁴ Beenu lukwesaka kuba balulukusu mu Mangisi, lwayeki lwatabula kintwaari na Kiristo, lwayeki lwadziimbisa bweese.

⁵ Mukwongo, mu Mpeeve, beetu turi mu kwekiingila nsungumunu yi turi twasiila nsiitu mu kanyi.

⁶ Bukuri, mu Yesu Kiristo, kuteende bubakala bunu pe kuhele kuteende bubakala ka biri mufunu ko, ngo biri mufunu, kanyi disoongaana biyiriki mu ntiilu.

⁷ Beenu lwaba kwedzumuna kwakubwe; ngo na walukabukisi mu kuhele kutumuma kuri ngwanwa?

⁸ Muyooyolo wunde, wahele kunaangukina kuri wunde waluteele mbila.

⁹ «Mwaa-ndaambu lufunusu, lutoombolaana mbanda mampa yoyinso».

¹⁰ Me nyiri na nsiitu mu Mfumu mu ntoono beenu, ti beenu ka luba na bitsimi bikimi ko. Wunde wukotoso kisaangila ha kakati dya beenu, sa kabwilikila maseembu, bwooso kabeele.

¹¹ Me ngo wuri, bampaangi, mbuti me nyakiri mu kweyikisa nteendulu bubakala, lo mu nkya ntoono bari mu kubweese kwenkwaamisa? Haho ngo hari lo, musamu kuruwa wahele kubweese kubumisa baatu makya.

¹² Hemese babo bakwekotoso kisaangila ha kakati dya beenu, bahokolo manyutu bo-meene.

¹³ Mukwongo, bampaangi, beenu baluteele mbila mu kuba mu bunsaalisi. Ngo kasi, bunsaalisi bubwo yaa buba mpwaani ya kwedyaatila mu kimuutu ko; ngo kunsa ntiilu yendee lwesalisina beenu na beenu.

¹⁴ Bukuri Mangisi momanso mari makuka mu dyaambu dimosi, ngo dimadi: «Tya mbaasi yaaku bunu ye-meene.»

¹⁵ Ngo mbuti beenu lukwetatikaa na lukwekaakila bambaasi beenu na beenu, lo seenee madyeele, mpisi heki luhele kwefwilisina beenu na beenu.

Kuba batwaalusu mu Mpeeve nkani ka mu manzala ma muswinyi ko

¹⁶ Ngo kasi me nyiluleele ti: dyaatileenu mu Mpeeve, na luba ti bele na dyo pe, mu kuyukutisa nyiimunu dza muswinyi.

¹⁷ Bukuri muswinyi wukwenyiima mari kitaatu na Mpeeve; ngo Mpeeve se wukwenyiima mari kitaatu na muswinyi; mukwongo, bo batelemese kitaatu, wamosi mu wakaka, mpisi heki luhele kubangisina kuyirika ma lutiiri.

¹⁸ Ngo mbuti beenu luri lwatwaalusu kuri Mpeeve, lo lwahele bweese kuba kunsa lutumu lwa Mangisi.

¹⁹ Biyiriki bya muswinyi byayabakana, ngo bi: kimpala, nsumukunu, buyala,

²⁰ nsambukulu-biteki, buloki, lubelu, kitaatu, bukwa, kituunsi kya nkesi, kubakana, nkabunu, mpambukusu,

²¹ musoki, nkolulu malu, ndiilu ya mawaamba, na myominso myafwanikina na mimyo. Me nyilulubula mu mimyo, bunu bu nyatekesele kululeele ti, bayirikaana mya bubwo, ka bakondolo saala dya Kimfumu kya Nzaambi ko.

²² Kasi kimbutu kya Mpeeve ngo: ntiilu, kiminu, kiyeengi, nkindusulu-mutima, mbweeyulu-mutima, nzala-baatu, kanyi,

²³ bundeembu, nkebulu-nyutu. Mangisi mahele kitaatu na mya bubwo.

²⁴ Babo bari ba Kiristo [Yesu], bayeki bakomono muswinyi na mantiilu, na nyiimunu dzaandi.

²⁵ Mbuti turi mwooyo mu Mpeeve, lo tudyaatilee se mu Mpeeve.

²⁶ Yaa tubeenee bangaa-masiiku ko, beetu na beetu bisoombolo pe, musoki pe.