2 Tim 4 - Musamu Wamubwete 2013

¹ Me nyikuyingukila ha busu bwa Nzaambi, na ha busu bwa Kiristo Yesu, nde wukwiisa kutsuundisa bamwooyo na bafwa, na mu monokunu yaandi na mu kimfumu kyaandi,

² yikisa Maampu, landukina mu ntaangu yayelemene na yahele kuyelemene, seembe, ŋaŋina, syaamisa, mu nkindusulu-mutima yoyinso kunsa nyikusulu.

³ Mukwongo, sa kwaba ntaangu yiri, baatu babweese kukuunda kuyuka nyikusulu dzangwanwa ko, ngo bunu buri mantiilu maaku, bo sa basaka kuba na bayikisi balaka babaleele mi batiiri kuyuka.

⁴ Bo sa babisa kuyuka ngwanwa, na sa basyeeteke mu kweyuka mankuma.

⁵ Ngo ye, ba wasoongolo mu myominso, kuunda mpasi, sa kisalu kya budingisi, kukisa kisalu kyaaku.

⁶ Mukwongo, makila ma me meki matsaamuna ha yulu kikabu, na ntaangu ya mweendu waami yimwaatubuka.

⁷ Me nyanweeni kikiindu kyakibwete, me mwaamana kudzumuna ntiinu, na nyakebe kanyi.

⁸ Mu lumalu, ba mwaampungukila mpu ya nsungumunu, mbasi-tsuku yi nyakisa Mfumu, mutsuundisi wasuunguma, mu kiluumbu kikyo; kari kunu kuri me ko, ngo kuri bobanso se batiiri monokunu yaandi.

Misiku mya mpotulu

⁹ Ba na malwangukila mu kwiisa kuri me mu mawasu.

¹⁰ Mukwongo, Dema wanyekele, mu lumalu nde weki kutya kwaandi misamu mya ntaangu yimayi, na wayensi ku Tesalonika; Kereseke ngo wuri wayensi ku Ngalatya, na Tito ku Dalamatya.

¹¹ Wuni Luka kitsu wuri na me. Holo Malako, mpisi lwiisa beenu boolo, mutwaala, bukuri nde wuri mufunu kuri me, mu ntoono kisalu.

¹² Me nyaheekiri Tikiko ku Efeso.

¹³ Mu ntaangu yi wukwiisa, ntwaalikila kiyuungu ki nyasisiri ku Torowasi ku nzo Karpo, na mikaanda, mbiki ti myayiriku mu mikaanda mya bibulu.

¹⁴ Alekandere, mutsuri-biseengu, wamonisini me mpasi dzalaka. Mfumu sa kamubvutukila mamo mayelemene na biyiriki byaandi.

¹⁵ Ngo ye se, sa madyeele mu nde, bukuri nde wanwaanisini maampu meetu mu kiteesu kyamakwa.

¹⁶ Ha nyaba nwaanikina me buungu dyaami mu lwatete, kuri muutu ti mosi ko wambakisiri, ngo bobanso banyekiri. Ngo yaa babaka mafuumbu mu mimyo ko.

¹⁷ Mfumu wambakisiri na wampeeri makwa, mpisi heki mu munwa me, maampu maba mayaabusu mu kiteesu kyakuka, na maba mayukukuna kuri makaanda momanso. Me bankuuriri mu munwa nkosi.

¹⁸ Mfumu sa kankuula mu momanso mamabi ma banyirikila, na sa kamvuukisa mu kunkotoso mu kimfumu kyaandi kya mayulu. Nkeembu yiba kuri nde mu bibvu ngo bibvu! Amene.

Mamboto ma nsukulu.

¹⁹ Ha mboto kuri Piriska, kuri Akila, na ku nzo ya Onesiforo.

²⁰ Erasto wasii saala ku Korinto. Torofimo me nyamusisiri wabeele ku Mileto.

²¹ Sa makwa mu kwiisa, tekesele ntaangu ya kyoosi yitubuka. Ebulo, Pude, Lino, Kolodya, na bampaangi bobanso bakuheekiri mboto.

²² Hemese Mfumu kaba na kiluunsi kya ye! Bweese buba na beenu!