2 Tim 2 - Musamu Wamubwete 2013

Muyongolo wakwiikama wa Yesu Kiristo

¹ Hango mwaana waami, bakila makwa mu bweese buri mu Kiristo Yesu.

² Myominso mi wuri wayuka kuri me, ha busu bwa bambaangi balaka, yaabisa myo kuri baatu bakwiikama, bakuka mu kuyikisa myo se kuri bakaka.

³ Ye se taambula mpasi bunu muyongolo wamubwete wa Kiristo Yesu.

⁴ Kuri muutu ko wuri kakotaana mu buyongolo, bweesiri kakaangama mu misamu mya kidziingu, mbuti tiiri kubweeye kuri wunde wa muholo mu kisalu.

⁵ Bakoolwiikaana mudzumuni-ntiinu mpu ya ndulukulu ko, mbuti wahele kubvumina mangisi ma ntiinu.

⁶ Muhati-manseke wukoomonaa mpasi, nde yelemini kutekesele kutaambula kikuuku kya bimbutu.

⁷ Bakula mamo ma nyileele. Mukwongo, Mfumu sa kakuha madyeele mu myominso.

⁸ Baambuka mwooyo mu Yesu Kiristo, wabutukila mu kaanda dimadi dya Davidi, nde wafuluka mu bafwa, bunu buri Musamu waami Wamubwete,

⁹ mu ntoono musamu wunde, me nyiri mu kumono mpasi mu bikonyi, buni muyiriki-mamabi; ngo kasi maampu ma Nzaambi mahele mu bikonyi.

¹⁰ Hango-nkuumbu, me nyiri mu kwekiindisa mutima mu myominso, mu ntoono basoolu, mpisi heki bo se babaka mvuukulu yiri mu Kiristo Yesu, na nkeembu ya mantaangu momanso.

¹¹ Maampu mamama mayelemene mu kusiila kanyi: «Mbuti tufwiiri kintwaari na nde, lo sa twaba mwooyo kintwaari na nde se;

¹² mbuti tukuundiri mpasi kintwaari na nde, lo sa twatuma kintwaari na nde se; mbuti tumutunini, lo nde se sa katutuna;

¹³ mbuti twahele kukwiikama, nde wuri wakwiikama, bukuri nde lo kabangusina kutuna nyutu ya nde-meene ko.»

Nyikusulu maampu ma Nzaambi yayibwete

¹⁴ Babaambula mwooyo mu mamama, wubayingukila ha busu bwa Nzaambi, yaa beyumuna mu bitoolo ko. Mimyo myahele mufunu, mbuti ka wa kudziimbisa baatu bayuka myo ko.

¹⁵ Sa makwa ye-meene, mu kumonokono ha busu bwa Nzaambi, bunu muutu wu bamwaatsiitsa, bunu kisari kihele kufwa nsoni, kikweyikisa maampu mangwanwa mu nyikusulu dzasuunguma.

¹⁶ Bata nzoonsulu dza bungooyi dzamukangala, bukuri bari na nzoonsulu dza bubwo, sa bahamisa kukoto kunsa bungooyi;

¹⁷ nzoonsulu dza bo dziri bunu mputa yibolosa muswinyi, yikweyalamika. Mu bo kuri Imenayo na Fileto,

¹⁸ bo bayeki batatuka na ngwanwa, bu bakweleele ti mfulukulu yayeki yayirima, bakwebwiisa kanyi dya bamosi.

¹⁹ Diri dyangwanwa ti lufulu lwa sa Nzaambi lwa makwa lwateleme, luri na kinyemu kyatina ti: «Mfumu yaari baatu baandi, na wunde wutaangunaa nkuumbu Mfumu, yelemini kutatuka na mamabi.»

²⁰ Munsa nzo yayinene, kari dzini nkoombo dza woolo na dza palata dzikoobaanaa ko, ngo kubaanaa se dza miti, na dza tubuumbu. Dzamosi badzisalilaa mu lukiinsu, ngo dzakaka badzisalilaa kwahele lukiinsu.

²¹ Ngo mbuti muutu tsyeemisini nyutu yaandi mu mamabi mamo, lo nde sa kaba lukoombo lwa lukiinsu, lwawuunguku, luri mufunu kuri Mfumu, mu kulusalila mu mpisi ma bayirikaa mamabwete.

²² Yitika mantiilu ma butuuti, saka nsungumunu, kanyi, ntiilu, na kiyeengi mu kintwaari na babo bayingukilaa Mfumu mu mutima watsyeemeke.

²³ Looso nzoonsulu dza buwulu na dza budzeeke, bu yaari kuri ti dzitwaalaa bikiindu.

²⁴ Kisari kya Mfumu wahele kuyelemene kunwaana, ngo yelemini kuba na musoongo mu baatu bobanso, wakuka mu kuyikisa, na wukuunda mamabi.

²⁵ Nde yelemini kuyikisa bari na muhaawu, mu bundeembu kuri ti kampe Nzaambi wubaheeri nyiingulu madyeele, mu kuyaaba ngwanwa,

²⁶ na babvutukila bitsimi byabibwete, na bapala mu siinga dya dyabulu, mu kari kabakaanga, mu kuri ti bayirika ma katii nde.