2 Tes 3 - Musamu Wamubwete 2013

Nsyamusunu mu lusaambulu

¹ Mu misiiri, bampaangi, saambileenu mu beetu, mpisi heki maampu ma Mfumu maba mayabakana na maba makeembele bunu bu mari kuri beenu.

² Saambileenu se mpisi heki beetu tukuuluka mu myooko mya baatu bangaa-kibakala na bari na mutima-bubi; bukuri bobanso bahele na kanyi.

³ Ngo Mfumu wakwiikama, nde sa kalukumisa na kulukala mu Ngaa-bubi.

⁴ Beetu turi na kanyi mu Mfumu mu ntoono beenu, bukuri mamo ma turi mu kulutumaa, beenu luri mu kumayirakaa, na sa lwanamitina kumayirika.

⁵ Hemese Mfumu kutwaalisa mitima myeenu mu ntiilu ya Nzaambi, na mu kifiki kya Kiristo.

Mufunu kisalu

⁶ Bampaangi, beetu tululoombiri mu nkuumbu ya Mfumu yeetu Yesu Kiristo, mu kutatuku la na mpisi mpaangi yi kwedyaatila kunsa kisaangila, kwahele kuyelemene na kikulu ki lwataambula kuri beetu.

⁷ Beenu-meene luyaari bunu bwa kusombosolo beetu. Bukuri beetu twasii kunatina kidziingu kunsa kisaangila ha kakati dya beenu ko.

⁸ Beetu twasii kudya byandya bya muutu kwa buunu ko; ngo kunsa kisalu kya makwa na kunsa mpasi, butsuku na mwiini, beetu twasala mpisi heki mu beenu, muutu kahele kutubuungula.

⁹ Kari bukuri ti beetu twaba twahele na miswa ko, ngo beetu twaba tutiiri kulusoongo mu beetu-meene kifwaani kyayelemene kunama.

¹⁰ Mukwongo, mu ntaangu yi twaba kuri beenu, beetu twaba luleelaana ti: mbuti muutu katiiri kusala ko, lo yaa kadya se ko.

¹¹ Ngo beetu turi mu kweyuka ti bakaka mu beenu, bari mu kwedyaatila kunsa kisaangila, bahele kwesala, kasi bakwenama misamu myominso.

¹² Beetu tuloombo na tusyaamisa baatu ba bubwo, mu nkuumbu ya Mfumu Yesu Kiristo ti: basala mu kidzuunu mu kubaka bya kudya bya bo-meene.

¹³ Beenu ngo bari, bampaangi, yaa luholo-bito ko mu kuyirika mamabwe.

¹⁴ Mbuti kuri muutu wahele kutambikila ma turi mu kuleele beetu mu mukaanda wu, lo kebee dyo mu kuhele kubweese kuba kintwaari na wa bubwo, mpisi kamono nsoni.

¹⁵ Ya lumuhololo bunu mutaatu ko, ngo museembeenu bunu mpaangi.

Lusakumunu na mboto

¹⁶ Hemese Mfumu ya kiyeengi, nde-meene kaluha kiyeengi, mu mantaangu momanso na mu myominso. Mfumu kaba na beenu-banso.

¹⁷ Mboto yi ya mu kooko kwa meme Pawulo, kidiimbu mu mpisi mukaanda, wunkootinaa kiri bumabu.

¹⁸ Hemese bweese bwa Mfumu yeetu Yesu Kiristo buba na beenu-banso.