2 Tes 1 - Musamu Wamubwete 2013

Mboto

¹ Pawulo, Silvano na Timoteho kuri dibuundu dya bari Tesalonika, mu Nzaambi Taayi dyeetu, na mu Mfumu Yesu Kiristo.

² Bweese na kiyeengi bifumini kuri Nzaambi Taayi [dyeetu], na kuri Mfumu Yesu Kiristo, biba na beenu.

Mutsuundu wuba mu kiluumbu kya nyisulu Kiristo

³ Bampaangi, Beetu tuyelemini kubvutula matoondo mpisi ntaangu kuri Nzaambi, mu ntoono beenu. Buri bwabubwete, bukuri kanyi dya beenu diri mu kwebuuka kwalaka, na ntiilu yi luri na yo mu bambaasi yiri mu kwehamisa mu muutu-muutu.

⁴ Hango-nkuumbu, beetu turi na kimweese mu beenu ha kakati dya mabuundu ma Nzaambi, mu ntoono kifiki kyeenu na kanyi dyeenu, kunsa nkwamusunu dzeenu dzodzinso, na manyoongi ma luri mu kwekuunda.

⁵ Kikyo kidiimbu kya mutsuundu Nzaambi wasuunguma, mpisi luba lwamonoko ti lwayelemene mu kimfumu kya Nzaambi, ki luri mu kwemwiina mpasi.

⁶ Mukwongo, diri dyasuunguma ti Nzaambi kabvutula manyoongi kuri babo bakwelusoongo manyoongi;

⁷ na kaha mpuumunu, kuri beenu luri mu kwemono manyoongi, na kuri beetu. Mimyo mbasi-tsuku sa myaba ha monokono Mfumu Yesu mu mayulu na bambasi ba mpinu dzaandi,

⁸ kunsa mbaawu ya mile, mu kubvutula bubi kuri babo bahele kuyaaba Nzaambi, na bahele kutumuma mu Musamu Wamubwete wa Mfumu yeetu Yesu.

⁹ Bo sa bataambula maseembu ma mfukusulu yahele manunu, la na busu bwa Mfumu, na la na nkeembu ya makwa maandi,

¹⁰ mbasi-tsuku ha kakwiisa, mu kiluumbu kikyo, mu kuba wakeembusu mu bangisi baandi, na mu kuba wasiika mu bobanso basiilaana kanyi, bukuri beenu lwasiiriri kanyi mu kimbaangi kyeetu.

¹¹ Hango-nkuumbu, beetu tunamitina kusaambila mu beenu, mpisi heki Nzaambi yeetu kamono ti, beenu lwayelemene na mbila yi kari kaluteele, na mu mpinu dzaandi kakukisa nzala yoyinso yakuyirika mamabwe yiri mu beenu, na kisalu kya kanyi.

¹² Bubwo, nkuumbu Mfumu yeetu Yesu, yiba yakeembese mu beenu, na beetu se tuba twakeembese mu nde, bunu buri bweese bwa Nzaambi yeetu, na bwa Mfumu Yesu Kiristo.