2 Pet 3 - Musamu Wamubwete 2013

Nyisulu Mfumu

¹ Banduku ba mutima, wumawu ngo mukaanda wamyoolo, me nyiri mu kulutinina. Mu myo myoolo, me nyilubaambula mwooyo, mpisi nyilusyaamisa mu mitariri madyeele ma bukensekelee mari mu beenu,

² na lubaambuka mwooyo mu maampu matekisiri kuyaabisa babikiri bangisi, na mu lutumu lwa bantumu beenu, lwa Mfumu na Mubvuukisi.

³ Tekeseleenu kuyaaba dimadi ti, mu biluumbu byansukulu, bangaa-munsiku sa biisa na munsiku waaku, sa bedyaatila bunu buri mantiilu ma bo-meene,

⁴ na kweleele ti: «Lusiilulu lwa nyisulu yaandi buri luri kuyirima pe? Mukwongo, kipilu kya fwiiri bakuutu, momanso mari bunu, bwaba mu mbandukulu nyirikulu bitotolo byobinso!»

⁵ Mukwongo, bo batiiri kudzimbikina dimadi ti: mayulu maba mu ntaangu yayikulu, na mu maampu ma Nzaambi, butoto bwayirimini mu maampa na maampa,

⁶ Mu bibyo se, nsi yayikulu yiri yadyaamina mu maampa na yiri yafuukusu.

⁷ Ngo mayulu na butoto bya lumalu, mu maampu momamosi, biri byawuunguku mu ntoono mbaawu, na byakebu mu kiluumbu kya mutsuundu, na kya mfukusulu baatu, bahele na kinzaambi.

⁸ Ngo banduku ba mutima, kuri ntoono mosi yiri beenu yaa luhele kuyiyaaba ko: kiluumbu kimosi kuri Mfumu, kiri bunu fuunda dya mibvu, na fuunda dya mibvu diri bunu kiluumbu kimosi.

⁹ Mfumu wahele kudziingila mu kukukisa nsiilulu dzaandi, bunu buri mu kwetsima babamosi ti wuri mu kudziingila; ngo nde wukiindisaa mutima mu beenu, bukuri katiiri ko ti babamosi bafuuka, ngo nde tiiri ti baatu bobanso biisa ku nyiingulu madyeele.

¹⁰ Kiluumbu kya Mfumu sa kiisa na sisuu bunu ngaa-kwiibi. Mu kiluumbu kikyo mayulu sa maluta mu kiyomo kya makwa. Bitotolo bikweluluka sa byasulumuka, na butoto na biyiriki biri mu bwo sa byaba byafuukusu.

¹¹ Ngo mbuti heki bubwo, ti byobinso sa byasulumuka, lo nkya baatu, beenu luyelemini kuba mu ndyaatulu ya bungisi, na mu kinzaambi,

¹² bu luri mu kwekiinga na kwebingukila nyisulu kiluumbu kya Nzaambi! Mu kiluumbu kikyo, mayulu makweluluka sa masulumuka, na bitotolo bikwehense mu mbaawu sa byanyengemuke.

¹³ Ngo beetu turi mu kwekiingila, bunu buri lusiilulu lwaandi, mayulu mamoono na butoto bwamoono, mumwo muba nsungumunu.

¹⁴ Hango-nkuumbu, banduku ba mutima, bu luri mu kwekiingila mamo, seenee makwa, mpisi nde kiisa kalutangusina mu kiyeengi, kuri lwahele na maka na mi baluseembele

¹⁵ Holuleenu nkindusulu-mutima ya Mfumu yeetu, bunu mvuukulu yeenu. Bunubwo se, mpaangi yeetu ya mutima, Pawulo, kari kalutinina, bunu buri madyeele ma bari bamuha.

¹⁶ Bunubwo se kari katina mu mikaanda myominso, mi kari mu kudzoonsolo mu mamama. Munsa mikaanda mimyo, misamu myamosi miri mpasi mu kubakula, na baatu bahele na madyeele, na bahele kukwiikama, bakwemikitula bunu bu basaana se mu Matinu makaka, mu kusakisa mfukusulu ya bo-meene.

¹⁷ Ngo beenu, banduku ba mutima, bu lumwaalubuka, seenee madyeele, mpisi heki luhele kuba bawumunu, mu nzimbusulu ya baatu bahele na mangisi, na luhele kubwa mu nsiitu ya beenu-meene.

¹⁸ Buukeenu kunsa bweese, na nyaabulu ya Mfumu na Mubvuukisi weetu Yesu Kiristo. Kuri nde, kuba nkeembu lumalu, natee mu kiluumbu kyahele mbandukulu na manunu! Amene.