2 Pet 2 - Musamu Wamubwete 2013

Bayikisi bampya

¹ Kwaba babikiri bampya kunsa baatu, bunubwo se, sa kwaba bayikisi bampya, ha kakati dya beenu. Bo sa bakotoso mu madyeele nyikusulu dza nzimbusulu, na sa batuna Mfumu yabakuula, bo sa basakisa mfukusulu ya bo-meene na sisuu.

² Baatu balaka sa babanama kunsa buyala bwaaku; na mu ntoono bo, nzila ya ngwanwa sa yaba yasaanu,

³ na mu ntiki-mboongo, mu dzoonsolo dza lupyelu bo sa babadiilila manene. Kuri bo kuholosono na kidzika, mutsuundu wuri mu kwesala, na mfukusulu yaaku yahele kubwa tolo.

⁴ Mukwongo, Nzaambi kasii wuungula bambasi basumukini ko, ngo wabakaangiri mu bikonyi, na wabatubiri ku lubila lwa mampimbisi, ku kari kabawuunguka mu ntoono mutsuundu.

⁵ Nsi yayikulu se nde kasii kuyiwuungula ko, ngo wabvuukisiri Nowa muutu wampoomo, muyaabisi nsungumunu, ha katweesi mbuukulu maampa mu nsi ya baatu bahele na kinzaambi.

⁶ Nde wakese mukanu wa mfukusulu kuri mabvula ma Sodoma na Ngomora, bu kamakitula lufuta, mu kusoongo kuri baatu bahele na kinzaambi kifwaani kya mamo makwiisa ku mankula.

⁷ Nde wabvuukisiri Loti ngaa-kusuunguma, waba kwebamaana mu ntoono ndyaatulu dza buyala, dza baatu bahele na mangisi.

⁸ Mukwongo, nde ngaa-kusuunguma, bu kaba kwedzakalaana ha kakati dya bo, mu kiluumbu ngo kiluumbu, nde waba kwebamaana mu muheebulu waandi wasuunguma, bu kaba kwemonaana na kweyukaana mamabi ma baba kweyirikaana.

⁹ Mamo masoongo ti, Mfumu yaari kukuula bangaa-kinzaambi mu mpasi, na kukebe bahele kusuunguma mpisi baba baseembu mu kiluumbu kya mutsuundu,

¹⁰ mbiki ti babo batiiri kweyukutisa muswinyi, mu nyiimunu dzasumuka, na bakwenyaafuna bumfumu. Babo ngo bangaa-nzala-kubila, bangaa-masiiku, bahele na boomo mu kwesaana biluunsi bya nkeembu,

¹¹ koomosoko na bambasi, babvuriri makwa na mpinu, bahele kuteesele biluunsi bya nkeembu bibyo nzoonsulu dza nsaanunu, ha busu bwa Mfumu.

¹² Baatu babo bakwesaana bi badziimbiri, ngo bo se sa bafwa bunu bibulu byahele na madyeele, bi bayirikiri mu ntoono yiri ti, byekaangama mu myeete kuri babidzusa;

¹³ bo sa bataambula mamabi bunu mufutu wa mamabi. Bo bakwemono kiminu, mu kweyukitisa manzala ma muswinyi mwiini-ngeembe. Bo ngo mviindu na nsoni, bakwemono luwu mu mpya dzaaku, mu kweyirika minkeembu mya ndiilu kintwaari na beenu.

¹⁴ Miisu mya bo myaluula mu kimpala, na banamitina mu kweyirika masumu. Bakwekoondo baatu bahele kukwiikama, mitima mya bo myayuku mu ntiki-mboongo, bo ngo baala ba mpopi.

¹⁵ Bu bamana kusiisa nzila yasuunguma, bayeki bawumuka mu kwenama nzila ya Balaami mwaana Bosoro, watiiri mufutu wa mamabi.

¹⁶ Nde wataamburi biŋaŋunu mu ntoono kusinina kwa mangisi kwa nde-meene: mpuunda ya baba bu yapalisa mbeembu ya muutu, yahotoso bulawuku bwa mubikiri.

¹⁷ Baatu babo ngo manto mahele maampa, mibuungi mikweyende mu kiteembu, bari babawungukila mampimbisi ma bu bokoro.

¹⁸ Mukwongo, bakwedzoonso misamu myaminene myahele mufunu, bari mu kwekoondo mu nyiimunu dza muswinyi, mu buyala, babo babvuukila ha wuri dya mukuungi dya baatu bawumuka.

¹⁹ Bo bakwetaasila baatu bunsaalisi, buni bo-meene bankutu ba bifu byabibi. Bukuri, mpisi muutu wuri nkutu kuri bibyo bi kari katumuma.

²⁰ Mukwongo, mbuti babaanaa bamwabvuuka mu nsumukunu dza nsi, mu ntoono nyaabulu ya Mfumu na Mubvuukisi weetu Yesu Kiristo, babweesiri kuba bakaangama lukimi mu nsumukunu dzidzo, na beki batumuma, lo kiteesu kya bo kisyeeriri, kyeki kibvuriri bubi ti na kyatete.

²¹ Mukwongo, bwaketi kubvulila bubwe kuri bo, mu kuhele kuyaaba nzila ya nsungumunu, ti na kuri bamanaa kuyiyaaba, bayekiri lutumu lwangisi, lu bari babatubukila.

²² Ma leele nkuma yangwanwa ma mwaa kubatubukila: «Mbwa yibweesiri kubvutukila biluku byaandi», na: «ngulu yibayoosiri, yibvutukiri ku tamba.»