2 Kol 4 - Musamu Wamubwete 2013

Busina bwa kimpeeve munsa bisa bya tubuumbu

¹ Hango-nkuumbu, bu turi na kisalu kimaki, beetu twahele kuholo-bito, bukuri mu ngebe dza Nzaambi turi twakitaambula.

² Ngo kasi beetu twabisa mansweeki mansoni, tukwedyaatila kwahele mawunu, na twahele kwekitula maampu ma Nzaambi, ngo mu nsoongulu ngwanwa, beetu turi mu kwesaka kuri ti baatu batufyongokono, ha busu bwa Nzaambi.

³ Ngo mbuti Musamu Wamubwete wa beetu wasweeku, lo mu bakweyende ku nzimbukulu kari kasweeku,

⁴ mu baatu bahele na kanyi, bari nzaambi ya nsi yi wayeki wabiiyisa madyeele ma bo, mpisi bahele kutalila buungi bwa Musamu Wamubwete, wa nkeembu ya Kiristo, nde wuri kifwaani kya Nzaambi.

⁵ Mukwongo, beetu twahele kweyaabisa mi tariri beetu-meene, ngo Yesu Kiristo Mfumu turi mu kweyaabisa; beetu-meene ngo turi bisari bya beenu mu ntoono Yesu.

⁶ Bukuri Nzaambi waleeriri ti: «Mu mampimbisi, buungi sa bwaseme!» Nde wasemini mu mitima myeetu, mu kusoongo nteendele ya nyaabulu nkeembu Nzaambi, ku busu bwa Yesu Kiristo.

⁷ Beetu tukwenata busina bumabu, mu bisa bya tubuumbu, mpisi heki mpinu dza kiteesu kyalutila, dziba dza Nzaambi nkani ka dza beetu ko.

⁸ Beetu batuswetekese mu mpele ngo mpele, ngo twahele kunyifuka, turi mu kwedunga, ngo twahele kukoono,

⁹ bakwetulaanda, ngo bahele kutubakila, batubwiisa ha nsi, ngo bahele kututsuumbula.

¹⁰ Mantaangu momanso, tukwenata mwomunso, lufwa lwa Yesu mu nyutu yeetu, mpisi heki bumwooyo bwa Yesu se, buba bwamonokono mu nyutu yeetu.

¹¹ Mukwongo, mantaangu momanso beetuneenu bamwooyo, turi bayekulu mu lufwa mu ntoono Yesu, mpisi heki bumwooyo bwa Yesu, buba bwamonokono mu nyutu yeetu ya lufwa.

¹² Mu didyo lufwa luri mu kusala mu beetu, ngo bumwooyo buri mu kusala mu beenu.

¹³ Bunu bu diri dyatinu: «Me nyasii kanyi, hango-nkuumbu nyadzoonsiri.» Beetu se, mu mpeeve yo yimosi ya kanyi, twasa kanyi, hango-nkuumbu turi mu kudzoonso,

¹⁴ bu tuyaari kuri ti, wunde wafulukisi Mfumu Yesu, sa kafulukisa beetu se kintwaari na Yesu, na sa katusuusa ha kimosi na beenu bebele na nde.

¹⁵ Mukwongo, myominso mimyo miri mu ntoono beenu, mpisi heki bweese buhamisaana mu baatu balaka, mvutukulu matoondo se yiba yabuukula mu nkeembu ya Nzaambi.

Kuba mwooyo mu kanyi

¹⁶ Hango-nkuumbu, beetu twahele kuholo-bito. Ngo ti hayuku nyutu yeetu ya ku mbasi yiri mu kwekuuka, lo nyutu ya kunsa-kati yiri mu kwekitukaa yamoono mu kiluumbu ngo kiluumbu.

¹⁷ Mukwongo, mpasi dzeetu dzaleenge mu ntaangu yi, dziri mu kubuta kilemu kya nkeembu ha yulu nkeembu, yahele manunu kuri beetu.

¹⁸ Beetu twahele kutala bitotolo bibyo byamonoko, ngo bibyo byahele kumonoko; bukuri bibyo byamonoko byahele kudziingula, ngo kasi bibyo byahele kumonoko, bidziingulaa kwakinkulu.