2 Kol 11 - Musamu Wamubwete 2013

Pawulo na bantumu bampya

¹ Mbuti beenu lo lukuundiri mwaa-bulawuku bwa me, lo katee kukuunda me.

² Mukwongo, me nyilusiila bukwa mu kiteesu kya bukwa bwa Nzaambi, bukuri me nyaluyakisa mu lulelusunu lwa makweele kuri bakala dimosi, bunu mwaa-ntuumba ya nswaasa yatsyeemeke ya kusoongo kuri Kiristo.

³ Ngo bunu bwaba wuna nyoko Eva mu lupyelu lwaandi, me nyibata ti bitsimi bibiya na biba la na nkulukulu na nsyemukunu ha busu bwa Kiristo.

⁴ Mukwongo, mbuti muutu wiisiri kuri beenu, wuluyaabisiri Yesu dikimi diri beetu twasii yaabisa ko, bunu pe lutaamburi mpeeve yasoboko na yiyo yi lwataamburi, bunu pe Musamu Wamubwe wasoboko na wunde wu lwataamburi, lo beenu mya bubwo ngo miri lukuundaa.

⁵ Mukwongo, me nsimini ti nyahele kubvula buntele, na bantumu ba beenu babanene babo, mu ntoono ti mosi.

⁶ Mbuti mu mya kudzoonso me nyahele na lungweensu, ngo kari mu mya nyaabulu ko; mimyo beetu twasoongo mu mpisi mpwaani, na mu biteesu byobinso kuri beenu.

⁷ Hoti masumu me nyiri nyayirika mu kuba wakuluka me-meene, mpisi beenu luba lwadzaangusu, bukuri twaluyaabisa Musamu Wamubwete kwa mungengi?

⁸ Me nyakuukusa mabuundu makaka, mu kutaambula mufutu kuri bo mu kusalila beenu.

⁹ Ha nyaba kuri beenu, bu nyaba na nzala lubakusu, me nyasii diila muutu manene ko; ngo me nyataambula lubakusu kuri bampaangi bafumini ku Makedonya; mu myominso me nyabisiri kuri ti beenu lumbuungula, na sa nyanamitina kubisa ntoono yiyo.

¹⁰ Yiyo ngwanwa ya Kiristo yiri mu me, kuri muutu wudika me ko mu kuba na kimweese kikyo mu mankoonsi ma Akaya.

¹¹ Bukuri nki? Mu kuri ti me nyahele ku lutya? Nzaambi yaari.

¹² Ma nyiri mu kuyirika, me sa mbweese kumayirika, mpisi me nyisila mpwaani, kuri babo batiiri kubaka mpwaani ya kusa kimweese bunu beetu.

¹³ Bukuri baatu babo ngo bantumu bampya, bisari byamawunu, bikweswemekene mu kifwaani kya bantumu ba Kiristo.

¹⁴ Diri dya nkimukunu ko, bukuri Satana nde-meene wuswemekinaa mu kifwaani kya mbasi ya buungi.

¹⁵ Ngo diri dyansisi ko, mbuti bisari bya nde se bikweswemekene mu kifwaani kya bisari bya nsungumunu. Nsukulu bo sa yaba bunu buri biyiriki byaaku.

Ntumu Pawulo wakuunda mpasi

¹⁶ Me nyibweese kuleele ti, ya kuba muutu wuhololo me bunu kilawuku ko, ngo mbuti ka bubwo ko, lo taambulee me bunu kilawuku, mpisi me se mba na mwaa-kimweese.

¹⁷ Ma nyiri mu kuleele, me nyahele kuleele mo bunu bu tiriri Mfumu, ngo bunu ti kunsa bulawuku, mu nsiitu yiyo ya kuba na kimweese.

¹⁸ Ngo bukuri baatu balaka bakwesa kimweese mu muswinyi, me se sa nsa kimweese.

¹⁹ Mukwongo, beenu luri na madyeele, lukwekuunda mu ntiilu ya beenu-meene, babo bahele na madyeele!

²⁰ Mukwongo, mbuti muutu wulusiiri bunkutu, mbuti muutu wuludiila manene, mbuti muutu horiri bi luri na byo, mbuti muutu wubilika mu beenu, na mbuti muutu wululeti ku busu, lo beenu lukuunda momanso mamo.

²¹ Me nyiri na nsoni mu kuleele mimyo, beetuneenu twasoongiri buyonsi. Ngo me nyiri mu kudzoonsolo bunu ti kunsa bulawuku. Mbuti muutu wakuka mu mpisi diba, lo me se nyakuka.

²² Bo Bahebeleho bari? Me se. Bahisaheli bari? Me se. Basundukila mu Abalaami bari? Me se.

²³ Bisari bya Kiristo bari? Me nzoonsulu bunu kilawuku, mu kuleele ti me mvuriri na bo; mu bisalu bya makwa, me mvuriri na bo; mu maboroko, me mvuriri na bo; mu nkuba kubwilikila, me mvuriri na bo; na me mvuriri kuba mu nsisi dza lufwa mu ntaangu ngo ntaangu.

²⁴ Mbala taanu, me nyiri nyabwilikila nkwaasulu makuumi matatu na wa kuri Bayudayo;

²⁵ mbala tatu me bari bandata nkwaasulu, mbala mosi me bari bandatila mu matari, mbala tatu me nyiri nyadyaama mu bwaatu, butsuku na mwiini me nyiri nyalutisa kunsa maampa.

²⁶ Me nyasa budyeengi bwa mu miilu mu ntaangu ngo ntaangu, nyakoto mu nsisi dza manyari, mu nsisi dza bangaa-bumfuna, mu nsisi dza ba turi kitsuumbu kimosi, mu nsisi dza makaanda, mu nsisi dza kunsa bvula, mu nsisi dza ku nsi yankatu, mu nsisi dza mu mubu, mu nsisi dza bampaangi bampya.

²⁷ Me nyasala na nyamono mpasi, me nyakyeelele bitulu bya bwiisi ntaangu ngo ntaangu, nyakolo nzala na mpwiisu, nyakoto maloomi ntaangu ngo ntaangu, nyakuukila kyoosi na nyaba mpene.

²⁸ Nyahele kutaanga kwaandi ti mi siiri, ngo musamu wu mbinikini me mpisi kiluumbu, musoongo wu nyiri na nde mu mabuundu momanso.

²⁹ Na wuri na buyonsi, kuri lo me se nyahele kuba na buyonsi? Na wubwa kuri lo me mutima wahele kusa mambaawu?

³⁰ Ngo mbuti mu kusa kimweese, lo me nsiiri kimweese mu misamu mitariri buyonsi bwaami.

³¹ Nzaambi, Taayi dya Mfumu Yesu, nde wasakumunu mu mibvu ngo mibvu, yaari kuri ti me nyahele kusa mpya.

³² Ku Damasiko mfumu yaba mumonikisi mbyaasi Areta, watelemisi bari Damasiko mu kukebe bvula mpisi bansiimba.

³³ Ngo me bansudukila munsa mpiri, mu mwaa-mweelu wantele, waba mu kibaka kya lupaangu, na me nyapatika mu myooko mya nde.