1 Yow 4 - Musamu Wamubwete 2013

Mpeeve ya Nzaambi na mpeeve ya mutaatu.

¹ Banduku ba mutima, yaa lwesiila kanyi mu mpisi mpeeve ko, ngo fyongokinee mampeeve, mbuti ma Nzaambi mari; bukuri babikiri bampya balaka bamwaakwiisa mu nsi.

² Mu dimadi beenu luyaabula Mpeeve ya Nzaambi: mpisi mpeeve yitaambula ti Yesu Kiristo wayisa mu muswinyi, lo yiri ya Nzaambi;

³ na mpisi mpeeve yihele kutaambula Yesu, lo yiri ya Nzaambi ko; mpeeve yiyo ya mutaatu Kiristo, wu lwayukiri beenu ti wuri mu kwiisa, na mu lumalu weki mu nsi.

⁴ Mwaa-baala, beenu luri ba Nzaambi, na beenu lwabwiisiri babikiri bampya; bukuri wunde wuri mu beenu, bvuriri makwa na wunde wuri mu nsi.

⁵ Bo bari ba nsi; mu didyo, bakwedzoonsolo bunu buri nsi, na nsi yikwebaywiila.

⁶ Beetu turi baatu ba Nzaambi. Wunde wuyaari Nzaambi kootuywiila. Ngo wunde wuri kari wa Nzaambi ko, kakootuywiila ko. Mu didyo, beetu tuyaabilaa Mpeeve ya ngwanwa, na mpeeve ya mawunu.

Nzaambi ngo ntiilu

⁷ Banduku ba mutima, tutilisinee beetu na beetu, bukuri ntiilu yiri ya Nzaambi. Mpisi wuri na ntiilu wabutuka kuri Nzaambi na yaari Nzaambi.

⁸ Wunde wahele na ntiilu, lo ka yaa Nzaambi ko, bukuri Nzaambi ngo ntiilu.

⁹ Bumabu ntiilu ya Nzaambi yiri yayabakana ha kakati dya beetu: nde waheeke Mwaana waandi ndemosi mu nsi, mpisi heki tuba mwooyo mu nde.

¹⁰ Ntiilu yiri bumabu: ka kuri ko ti beetu twatiiri Nzaambi, ngo kasi nde watutya, na waheeke Mwaana waandi, bunu kikori mu masumu meetu.

¹¹ Banduku ba mutima, mbuti Nzaambi watutiila mu kiteesu kya bubwo, beetu se tuyelemini kwetilisina beetu na beetu.

¹² Kuri muutu ko wumwaamono Nzaambi. Mbuti tutilisinaa beetu na beetu, lo Nzaambi wusanaa kikuundi mu beetu, na ntiilu yaandi mu beetu yayeki yakuka.

¹³ Beetu tuyaabilaa ti twasa kikuundi mu nde, na nde wasa kikuundi mu beetu, bukuri nde watuha Mpeeve yaandi.

¹⁴ Beetu twakengisiri na tuta kimbaangi ti Taata waheekiri Mwaana, bunu Mubvuukisi nsi.

¹⁵ Mpisi wunde wutaambula ti Yesu Mwaana Nzaambi, lo Nzaambi wasa kikuundi mu nde, na nde wasa kikuundi mu Nzaambi.

¹⁶ Beetu twayaaba, na twasa kanyi mu ntiilu yiri na Nzaambi mu beetu. Nzaambi ngo ntiilu; mpisi wunde wasa kikuundi mu ntiilu, lo wasa kikuundi mu Nzaambi, na Nzaambi wasa kikuundi mu nde.

¹⁷ Mu didyo, ntiilu yiri yakuka ha kakati dya beetu, mpisi heki tubeeneenu na nsiitu mu kiluumbu kya mutsuundu, bukuri bunu bu kari nde, bunubwo se beetu turi mu nsi yimayi.

¹⁸ Boomo bwahele mu ntiilu; ngo kasi ntiilu yangwanwa yiyisilaa boomo, bukuri munsa boomo muri maseembu. Wunde wahele na boomo wayeki wakuka mu ntiilu.

¹⁹ Beetu tutyaanaa, bukuri nde watete watutiiri.

²⁰ Mbuti muutu wuleele ti: «Me ntiiri Nzaambi», ngo wubelaa mpaangi yaandi, lo nde ngaa-mpya. Mukwongo, wunde wuhelaa kutya mpaangi yaandi yikamono, lo katsiitsa kutya Nzaambi ko, wu kahele kumono.

²¹ Lu ngo lutumu lu turi twataambula kuri nde: wunde wutya Nzaambi, lo katya se mpaangi yaandi.