1 Yow 3 - Musamu Wamubwete 2013

Baala ba Nzaambi

¹ Monee nkya ntiilu Taata kari katutiila, mpisi heki batuteele baala ba Nzaambi, na turi se bo. Hango-nkuumbu, nsi yahele kutuyaaba, bukuri yahele kuyaaba nde.

² Banduku ba mutima, mu lumalu turi baala ba Nzaambi, na bubwo mbasi-tsuku bu tubeenee bwakiri kumonokono pe. Tuyaari kuri ti: mbuti nde monokini, lo beetu sa twafwanikina na nde, bukuri sa twamumono bunu bu kari.

³ Mpisi wunde wuri na nsiitu dza bubwo mu Kiristo, lo wutsyeemikaa nde-meene, bunu bu kari katsyeemeke nde.

⁴ Mpisi wunde wuyirika masumu, lo wusininaa se mangisi, bukuri masumu ngo kusinina kwa mangisi.

⁵ Beenu luyaari kuri ti: Kiristo wamonikini mu kuyusula masumu, na mu nde mwahele masumu.

⁶ Mpisi wasa kikuundi mu nde, kayirikaa masumu ko; na mpisi wuyirikaa masumu, lo wakiri kumumono pe, na wakiri se kumuyaaba pe.

⁷ Mwaa-baala, muutu yaa kaludziimbisa ko. Wunde wusalilaa nsungumunu, lo wasuunguma bunu Kiristo wuri wasuunguma.

⁸ Wunde wuyirikaa masumu, lo wa dyabulu, bukuri kuholosono kunu mbandukulu dyabulu watobiri masumu. Mu dimadi Mwaana Nzaambi kamonikini, mpisi katsyaamuna biyiriki bya dyabulu.

⁹ Mpisi wunde wabutuka kuri Nzaambi kayirikaa masumu ko, bukuri mumbutu Nzaambi wasa kikuundi mu nde. Nde ka katsiitsa kuyirika masumu ko, bukuri wabutuka kuri Nzaambi.

¹⁰ Mu didyo, bayaabulaa baala ba Nzaambi, na baala ba dyabulu. Mpisi wunde wuhelaa kusalila nsungumunu kari wa Nzaambi ko; bunubwo se kuri wuhelaa kutya mpaangi yaandi.

Ntilusunu

¹¹ Wumawu ngo mukeensu wu luri lwayuka kuholosono kunu mbandukulu: Twetilisineenu beetu na beetu.

¹² Yaa tuba bunu Kayini ko, waba ngaa-bubi, na wadzusiri mpaangi yaandi. Heki mu nkya ntoono kamudzusiri? Bukuri biyiriki bya Kayini byaba byabibi, na bya mpaangi yaandi byaba byasuunguma.

¹³ Bampaangi, yaa lwekimuka ko, mbuti nsi yikwelubele.

¹⁴ Beetu tuyaari ti, twayeki twayisika mu lufwa mu kuluta mu bumwooyo, bukuri beetu tutyaanaa bampaangi. Wunde wahele kutya bampaangi, lo wafwa kwakinkulu.

¹⁵ Mpisi wunde wubelaa mpaangi yaandi, lo nde mudzusi, na beenu luyaa ti mpisi mudzusi, lo kidziingu kya mantaangu momanso kyahele kusa kikuundi mu nde.

¹⁶ Mu didyo, beetu twayeki twayaaba ntiilu, bukuri Kiristo waheeri kidziingu kyaandi mu ntoono beetu, na beetu se tuyelemini kuha kidziingu kyeetu mu ntoono bampaangi.

¹⁷ Mpisi wunde wuri na lubaku lwa nsi, na mwiini mpaangi yaandi watikila, ngo kaangiri mutima, lo dyaburi ntiilu ya Nzaambi yitsiitsa kuba mu nde?

¹⁸ Mwaa-baala, yaa twetiilee mu bini bibori ko; ngo twetiilee mu biyiriki na mu ngwanwa.

Nsiitu ha busu bwa Nzaambi.

¹⁹ Mu dimadi, beetu sa twayaaba ti turi bangaa-ngwanwa, na ha busu bwaandi, sa twadzuunisa mitima myeetu.

²⁰ Ngo mbuti mutima weetu wutubwiisa, Nzaambi bvuriri kudzaangama na mutima weetu, na nde yaari momanso.

²¹ Banduku ba mutima, mbuti mutima weetu wahele kutubwiisa, lo turi na nsiitu mu Nzaambi,

²² na mpisi ma tuloombo, tumataambula kuri nde, bukuri beetu tukebaa ntumu dzaandi, na tuyirikaa mamabwe ha busu bwaandi.

²³ Lumalu ngo lutumu lwaandi: ti beetu tusa kanyi mu Mwaana waandi, Yesu Kiristo, na tutilisinee beetu na beetu, bunu bu kari katuha lutumu.

²⁴ Wunde wukebaa ntumu dzaandi wasa kikuundi mu Nzaambi, na Nzaambi wasa kikuundi mu nde. Mu dimadi beetu tuyaabilaa ti, Nzaambi wasa kikuundi mu beetu, mu Mpeeve yi kari katuha.