1 Tim 6 - Musamu Wamubwete 2013

¹ Bobanso bari mu kihaangu kya bunkutu, bahololo bamfumu baaku mu lukiinsu lwolunso, mpisi heki nkuumbu Nzaambi na nyikusulu bihele kuba byasaanu.

² Babo bari bamfumu baaku basiilaa kanyi, yaa babanyaafuna ko bukuri ti bampaangi, ngo kasi babasalila kubvuriri bubwete, bukuri mamabwe mabayirika mamo, kuri bampaangi ba mutima, bangaa-kanyi bari mu kuyirika. Mamo ye yelemini kuyikisa na kutuma.

Nyikusulu dzampya na ntiki-mboongo

³ Mbuti muutu wuri na nyikusulu dzikimi, na wahele kukaangama mu maampu mamabwete ma Mfumu yeetu Yesu Kiristo, na mu nyikusulu dzayelemene na kinzaambi,

⁴ lo nde masiiku ma mudzusa miisu, na kayaa kitotolo ko. Nde wuri na bubeeru bwa nkalikisi na mayumu mu misamu. Kukwo kukoofuminaa musoki, nkalikisi, bitari, nsimunu mamabi,

⁵ mayumu mahele kuwa ma baatu ba biwulu, bari madyeele mamabi, na bahele na ngwanwa, bakwetsima ti kinzaambi nzila ya kubakila ndaandu.

⁶ Mukwongo, kinzaambi nzila ya kubakila ndaandu, mbuti ye kiminu kwemono munu mu biwuri na byo.

⁷ Bukuri twasii twaala kitotolo mu nsi yi ko, mu didyo se katutsiitsa kunata kitotolo ko.

⁸ Habaanaa turi na byandya na binkuta, lo twemono kiminu mu bini bibyo.

⁹ Ngo babo bari na nzala busina, bakoobwaanaa mu nsindukulu, mu myeete, na mu mburi nyiimunu dza buwulu na dzadzibi, dzikotisaana baatu kunsa mfukusulu na nzimbusulu.

¹⁰ Mukwongo, ntiilu ya mboongo ngo mwaansi wa momanso mamabi; babamosi bakaangama mu yo, bayeki badziimbisa kanyi, na bakomono manyutu maaku mu mburi manyoongi.

Mandoongi kuri Timoteho

¹¹ Ngo ye muutu Nzaambi, bata misamu mimyo. Yende wesaka nsungumunu, kinzaambi, kanyi, ntiilu, nkindusulu-mutima, bundeembu.

¹² Nwaana nwaanunu yayibwete ya kanyi, kwaata kidziingu kya mantaangu momanso ki bari bakuteelele mbila, na ki wuri wateele kimbaangi kyakibwete ha busu bwa bambaangi balaka.

¹³ Me nyikuloombiri ha busu bwa Nzaambi, nde wuhaanaa kidziingu kuri bitotolo byobinso, na ha busu bwa Kiristo Yesu, wateeri kimbaangi kyakibweete ha busu bwa Pontyo Pilato:

¹⁴ kebe lutumu kwahele kuba mviindu, na kwahele kuba mi bakuseembele, natee ha kwiisa kumonokono Mfumu yeetu Yesu Kiristo.

¹⁵ Nde mbasi-tsuku, wunde wuri mu lwambwe, wuri mutumi mosi kitsu, mbyaasi ya bambyaasi na Mfumu ya bamfumu, kasoongo mu mantaangu mayelemene.

¹⁶ Kuri wunde wuri, wunu nde kitsu wuri kafwaana ko, wadzakala kunsa buungi buri bwa kukokosolo pe, wuri muutu ti mosi kamumwii ko, na katsiitsa kumumono ko, kuba lukiinsu na mpinu dzahele manunu. Amene.

¹⁷ Leele kuri bisina bya ntaangu yimayi, yaa baba na masiiku ko, na yaa basiila nsiitu mu busina bwa mwaa-ntaangu mosi ko, ngo basiila nsiitu mu Nzaambi, nde kootuhaanaa byobinso mu busina mpisi tumono kiminu mu byo.

¹⁸ Baleele bayirika mamabwete, baba bisina mu biyiriki byabibwete, bangaa-kikabu, baatu bayirima mu kukabula,

¹⁹ bari mu kwekutikisa busina ha lufulu lwalubwete mu bo-meene, mpisi heki mu ntaangu yikwiisa, babaka kidziingu kyangwanwa.

²⁰ Ye Timoteho, kebe maampu ma bari bakuha, yende webata nzoonsulu dza bungooyi dza mukangala, na nkalikisi dza madyeele mampya,

²¹ mari babamosi munsa kwemasalila, bayeki basasika mu kanyi. Bweese buba na beenu!