1 Tim 5 - Musamu Wamubwete 2013

Myayelemene kuyirika baatu bakwiikama

¹ Yaa seembe wa kinuni mu kibakala ko, ngo musyaamisa bunu ti taayi, hololo minkuula bunu bampaangi,

² bakyeetu babuuka, bahololo bunu banguri, bantuumba bunu bibusi, kunsa bungisi bwobunso.

³ Kiinsa bafwiilila balumi, bari bafwiiri bangwanwa.

⁴ Mbuti mufwiiri wuri na baala bunu pe bateekulu, lo batekesele kuyika bwa kusalila kinzaambi mu nzo ya bo-meene, na mamo ma bayelemini kuyirika kuri bataayi na banguri, bukuri mimyo myabweeye ha busu bwa Nzaambi.

⁵ Wunde wuri mufwiiri wangwanwa, lo wunde wayeki wasaala nde mukaka, wasa nsiitu mu Nzaambi, na wunamitinaana mu ndoombulu na mu nsaambulu, butsuku na mwiini.

⁶ Ngo kasi, mufwiiri wuri na kidziingu kya minkeembu, lo wafwa ti hayuku wuri mwooyo.

⁷ Mimyo ye yelemini kubatuma, mpisi bahele kuba na mi babaseembele.

⁸ Mbuti muutu wahele kwebuungula ba nde-meene, mbiki ti ba mu nzo yaandi, lo nde tunini kanyi dyaandi na bvuriri mutima-bubi ti na mungooyi.

⁹ Mufwiiri mu kuba watinu nkuumbu mu mukaanda, yelemini kuba na mibvu myaluta makuumi masaamunu, na waba mukasi wa bakala dimosi,

¹⁰ wayabakana mu biyiriki byabibwete, wayeki wabuukisa baala, wataambula banzeense, waswaaka miilu mya bangisi, wabakisa bari mu ngebe, na wasa mutima mu mpisi kiyiriki kyakibwete.

¹¹ Ngo kasi, bwafwiiri bakiri mu buntuumba, lo ye kusa kubawuungula, bukuri mbuti bo batelimisi kitaatu na Kiristo mu ntoono manzala maaku, lo beki na nzala kukweele,

¹² na bari kunsa mutsuundu, bukuri bamwaayekele kanyi dyatete.

¹³ Ha yulu haho se, bilyeebe bari, bo misamu kweyaabila mu kweyende kyaatu-kyaatu mu manzo ma baatu; ngo kari bini bilyeebe bari ko, kasi bangaa-lusuku na bangaa-kintori se, bakweleele myahele kuyelemene.

¹⁴ Ngo me ntiiri ti bafwiiri bakiri mu buntuumba bakweele, babuta baala, batwaalisa manzo maaku, na yaa baha mpwaani ti mosi ko kuri mutaatu mu kudzoonso mamabi.

¹⁵ Mukwongo, bafwiiri babamosi beki bawumuka mu kwenama Satana.

¹⁶ Mbuti kuri mukyeetu ngaa-kanyi wuri na bafwiiri mu kaanda, lo kababakisa, na yaa kayekele kisalu kuri dibuundu ko, mpisi heki dibuundu kabakisa babo bari bafwiiri bangwanwa.

¹⁷ Bakulu ba babakala bari mu kwetwaalisa kwa kubwete, bayelemini kutaambula lukiinsu lwa biteesu byoolo, mbiki ti bakwemono mpasi mu maampu na mu nyikusulu.

¹⁸ Mukwongo, Matinu maleele ti: «Ngoombo mbuti yiri mu kudzabata mankono, lo kumukaanga pe munwa.» Na ti: «Kisari kiyelemini kubaka mufutu waandi.»

¹⁹ Yaa taambula ko ti bafuunda mukulu-bakala kuri ye, mbuti ka ha busu bwa bambaangi boolo bunu pe batatu ko.

²⁰ Babwiiri mu masumu, lo baseembe ha busu bwa baatu bobanso, mpisi baatu bakaka se baba na boomo.

²¹ Me nyi kuyingukila ha busu bwa Nzaambi, ha busu bwa Kiristo Yesu, na ha busu bwa bambasi ba Nzaambi ba bari basoolo ti, salila momanso mamo kwahele munsoori na kwahele bubayi.

²² Yaa tetekele muutu myooko mu mawasu-mawasu ko, na yaa ba kintwaari mu masumu ma ŋani ko; kebe nyutu yaaku kunsa bungisi.

²³ Yaa bweese kunwa mani maampa kitsu ko, ngo yende wenwa se mwaa-malu, mu ntoono bubeeru bwa kifunda, na mpololo-bito ya kinsosi-kinsosi.

²⁴ Masumu ma baatu babamosi, mari mayabakana tekesele bateleme ku mutsuundu; ngo kasi kuri bakaka, mo kuyabakana ha mambisa.

²⁵ Bwobumosi se, biyiriki byabibwete biri byayabakana; ngo byakaka byahele kuyabakana se, ka bitsiitsa kuba byasweeme ko.