1 Tim 4 - Musamu Wamubwete 2013

Bangaa-nyikusulu dzampya

¹ Mpeeve wuyirika luleele ti: mu mantaangu ma nsukulu, babamosi sa bayekele kanyi, mu kukaangama mu mampeeve ma mawunu, na mu nyikusulu dza mampeeve mamabi,

² mu bumpitu-bumpyoongo bwa bangaa-mpya, bayeki na bidiimbu byasa mu kiseengu kya mbaawu, mu mitima mya bo-meene,

³ bakwekabikisa nkweelulu, na bakweha mangisi mu byandya biri Nzaambi wayirika, mu kuri ti baatu bakwiikama na bamwayaaba ngwanwa, badya mu mvutukulu matoondo.

⁴ Mukwongo, mpisi kiyiriki kya Nzaambi kyakibwete, kuri kya kulooso ko mbuti bakihoriri mu mvutukulu matoondo;

⁵ bukuri byobinso bibakaa bungisi mu maampu ma Nzaambi na mu lusaambulu.

Kisari kya Yesu Kiristo kyakibwete

⁶ Wubaangulaana misamu mimyo kuri bampaangi, lo ye sa ba kisari kyakibwete kya Kiristo Yesu, kyadiisulu mu maampu ma kanyi, na mu nyikusulu dzadzibwete, dzi wuri mu kunama kwa kubwete.

⁷ Ngo looso mankuma ma bungooyi na ma bakyeetu ba binuni. Yende wetsitsikila bwa kubeele na kinzaambi ye-meene.

⁸ Mukwongo, kutsitsikila kwa nyutu, kuri mufunu mu myantele; ngo kasi kuba na kinzaambi kuri mufunu mu myominso, kuri na lusiilulu lwa kidziingu kya lumalu, na kya ku mankula.

⁹ Maampu mamama mayelemene mu kusiila kanyi, na kumataambula mu mutima ndemunso.

¹⁰ Mukwongo, mbuti turi mu kwebama na kwenwaana, lo bukuri twasa nsiitu mu Nzaambi yamwooyo, yiri mubvuukisi baatu bobanso, mbiki ti bari na kanyi.

¹¹ Ye yelemini kutuma na yikisa misamu mimyo.

¹² Muutu yaa kasaana butuuti bwa ye ko, ngo soongo kifwaani kuri bangaa-kanyi, mu nzoonsulu, mu ndyaatulu, mu ntiilu, mu kanyi, na mu bungisi.

¹³ Natee ku nyikwiisa me, sa mutima mu ntaangulu, mu nsyamusunu, na mu nyikusulu.

¹⁴ Yaa nyaafuna kikabu kya bweese kiri mu ye ko, ki bari bakuha mu mbikululu, mu ntetukulu myooko mya kintwaari kya bakulu ba babakala.

¹⁵ Salila mamo, heele mutima mpisi bobanso bamono ti kisalu kya ye kiri mu kubuuka.

¹⁶ Sa madyeele ye-meene, na mu nyikusulu. Namitina kusalila bubwo; bukuri wusalilaana bubwo, lo ye sa wabvuuka ye-meene, na sa wabvuukisa babo bakuywiila.