1 Tim 2 - Musamu Wamubwete 2013

Nyikusulu mu ntoono lusaambulu

¹ Me nyilusyaamisa tekesele myominso, mu kusa ndoombulu, nsaambulu, nyingukulu, na mvutukulu matoondo mu baatu bobanso,

² mu bambyaasi, na mu bobanso bari na lutumu, mpisi tubeeneenu na kidziingu kya mpolo na kidzuunu, kunsa kinzaambi kyokinso na lukiinsu lwolunso.

³ Mamo mari mamabwete na ma kiminu ha busu bwa Nzaambi mubvuukisi weetu,

⁴ nde tiiri ti baatu bobanso babvuuka na biisa kunyaabulu ya ngwanwa.

⁵ Mukwongo, Nzaambi mosi kitsu yiri, na munkabu-kati se mosi kitsu wuri, ha kakati dya Nzaambi na baatu, munkabu-kati wunde muutu kari, ngo Kiristo Yesu.

⁶ Nde waheeri kikori ngo nyutu yaandi, mu kukuula baatu bobanso, kikyo ngo kimbaangi mu ntaangu yayelemene.

⁷ Mu kimbaangi kikyo me bari bansuusa mu kuba dingisi na ntumu, mu kweyikisa makaanda mu nzila ya kanyi na ya ngwanwa; me ngwanwa nyiri mu kuleele, nyahele kufuta mpya.

⁸ Ngo me ntiiri ti babakala besaambila mu mpisi kibeendu, kuri banaanguna myooko myatsyeemeke, kwahele nkesi na nkalikisi.

⁹ Me ntiiri se ti bakyeetu baba na ndwaatulu yayelemene, ya kibvumi na ya soongolo. Yaa babweeye mu mimpandi, mu bitotolo bya woolo bunu pe misaanga, na binkuta bya ntalu yalaka ko,

¹⁰ kasi byayelemene kuri bakyeetu basalilaa kibvumi kya Nzaambi, ngo mu kubweeye mu biyiriki byabibwete.

¹¹ Wa mukyeetu kanama nyikusulu kuri wawura, mu kutumuma kwokunso.

¹² Me nyahele kuha miswa kuri wa mukyeetu mu kuyikisa, ti mu kutuma wa mubakala, ngo kaba wawura.

¹³ Mukwongo, watete wu bayirikiri Adami, tumi Eva.

¹⁴ Kari Adami watambukiri mawunu ko, ngo kasi wa mukyeetu watambukiri mawunu na kusinina mangisi.

¹⁵ Ngo nde sa kaba wabvuuka mu ntoono mbutulu, mbuti namitini kuba mu kanyi, mu ntiilu, na mu bungisi, kunsa nkulukulu.