1 Tim 1 - Musamu Wamubwete 2013

Mboto

¹ Pawulo, ntumu Yesu Kiristo, bunu buri lutumu lwa Nzaambi mubvuukisi weetu, na lwa Yesu Kiristo, nsiitu yeetu.

² Kuri Timoteho mwaana wangwanwa mu kanyi: bweese, ngebe na kiyeengi bifumunaa kuri Nzaambi Taata, na kuri Kiristo Yesu, Mfumu yeetu, biba na ye.

Ndubululu mu ntoono nyikusulu dzampya

³ Bunu bu nyabee kuleele, ha nyabee kweende me ku Makedonya, dzakala ku Efeso, mpisi heki wedika babamosi, yaa beyikisa nyikusulu dzikimi ko,

⁴ yaa bakaangama mu bimpa, na mu miloongo mya kinkaaka myahele kusuka; myominso mimyo mitwaalaana nkalikisi, ha kibeendu kya kukukisa kitsimi kya Nzaambi kiri mu kanyi.

⁵ Mufunu ntumunu yimayi, wuri mu kuri ti luba na ntiilu yifumunaa mu mutima watsyeemeke, nsimunu yayibwete, na kanyi dyahele bumpitu-bumpyoongo.

⁶ Babamosi bayeki batatuka la na mamo, na badziimbila kunsa nzoonsulu dzahele mufunu.

⁷ Bo batiiri kuba bayikisi ba mangisi, kasi bahele kubakula mi bari mu kuleele, na mi bari mu kuyirika kutswiikisa.

⁸ Beetu tuyaari kuri ti mangisi mari mamabwete, mbuti muutu wumasalila kwakubwete.

⁹ Tuyaabeenu ti mangisi bahele kumaha mu ntoono basuunguma, ngo mu ntoono bahele na mangisi, na bahele kutumuma, bahele na kinzaambi, bangaa-masumu, bahele na kanyi, bangaa-saana, bakwedzusa bataayi na banguri, badzusi ba baatu,

¹⁰ bangaa-buyala, babakala bakweta kimpala na bambaasi babakala, baatu bakweyarika bankutu, bangaa-mpya, bakwelaba-maalu ma mpya, na bakweyirika mari kitaatu na nyikusulu dzadzibwete,

¹¹ dzayelemene na Musamu Wamubwete wu bari bayakisa me, wa nkeembu ya Nzaambi ya kiminu.

Mvutukulu matoondo mu ntoono bweese bwa Nzaambi

¹² Me nyibvutula matoondo kuri wunde wampa makwa, Yesu Kiristo, Mfumu yeetu, bukuri nde wamwiini ti me nyayelemene mu kunsuusa mu kisalu.

¹³ Mu ntaangu yaluta me nyaba ngaa-bitari, ngaa-nkwaamusu, na ngaa-kinwa, kasi nde wambakila ngebe, bukuri me nyaba nyahele na nyaabulu, na nyaba kweyirika mamo kwahele kanyi.

¹⁴ Ngo bweese bwa Mfumu yeetu bwabuukila, ha kimosi na kanyi na ntiilu yiri mu Kiristo Yesu.

¹⁵ Maampu mamama mayelemene mu kusiila kanyi, na kumataambula mu mutima ndemunso ti: Kiristo Yesu wayisa ha nsi mu kubvuukisa bangaa-masumu, mu bo me watete.

¹⁶ Hango-nkuumbu, me bambakila ngebe, mpisi heki mu me watete, Kiristo Yesu kasoongo kifwaani kya nkindusulu-mutima yoyinso, kuri basiila kanyi mu nde, mu kutaambula kidziingu kyahele manunu.

¹⁷ Kuri Mbyaasi ya mantaangu momanso, yiri kafwaana ko, bamumonaa ko, Nzaambi yomosi kitsu, kuba lukiinsu na nkeembu mu bibvu ngo bibvu, Amene.

¹⁸ Ntumunu yi nyiri mu kuha kuri ye mwaana waami Timoteho, bunu buri mbikululu dzi bari batekesele kuleele mu ntoono ye, kuri ti, mu dzo, ye nwaana nwaanunu yayibwete,

¹⁹ bu wuri na kanyi na nsimunu yayibwete. Nsimunu yiyo babamosi bayeki bayilooso, na mu mitariri kanyi bo bayeki bapatuka mu maampa.

²⁰ Mu bo, kuri Imenayo na Alekandere, ba nyiri nyayekele kuri Satana, mpisi baba baseembu na bahele kubweese kwesaana Nzaambi.