1 Tes 4 - Musamu Wamubwete 2013

Ndyaatulu yabweeye kuri Nzaambi

¹ Mu misiiri bampaangi, beetu tululoombo na tulusyaamisa mu Mfumu. Bu lwayeki lwayika kuri beetu ndyaatulu yayelemene mu kubweeye kuri Nzaambi, bunubwo se luri mu kwedyaatila, ngo bweeseenu kutoombolo kiteesu.

² Mukwongo, beenu luyaari nkya nyikusulu beetu turi twaluha mu nkuumbu ya Mfumu yeetu Yesu.

³ Kutya kwa Nzaambi kuri ti, beenu luba bangisi na luhele kwesalila buyala.

⁴ Mpisi muutu mu beenu kayaaba kuhololo mukasi waandi, kunsa bungisi na lukiinsu,

⁵ kwahele kuba mu lutumu lwa mantiilu mamabi, bunu bangooyi bari bahele kuyaaba Nzaambi.

⁶ Mu dyaambu di, yaa kuba wuyirika ma lumvuki kuri mpaangi yaandi, bunu pe kumuwuna ko, bukuri beetu twatekesele ku luyaabisa na kusiingisa dyo ti: Mfumu wubvutulaana mamabi kuri bayirikaana ma bubwo.

⁷ Mukwongo, Nzaambi ka siiri kututeele mbila mu kuba kunsa nsumukunu ko, ngo mu kuba kunsa bungisi.

⁸ Hango-nkuumbu, mpisi wunde wubisa nyikusulu dzimadzi, lo kari muutu kabisiri ko, ngo Nzaambi wuhaanaa Mpeeve yaandi Yangisi kuri beenu.

⁹ Mu dyaambu dya ntiilu ya kimpaangi, beenu luri na nzala kuri ti ba lutinina ko, bukuri beenu-meene lwayeki lwayika kuri Nzaambi bwa kutilisina beenu na beenu.

¹⁰ Bubwo se beenu luri mu kuyirikaana kuri bampaangi bobanso bari ku Makedonya, ngo beetu tulusyaamisa bampaangi, mu kubweese kutoombolo kiteesu,

¹¹ mu kweba na nzala kunata kidziingu kunsa kidzuunu, na kwenama misamu mini mya beenu-meene, na kwesala mu myooko mya beenu-meene bunu bu turi twalutuma dyo.

¹² Mpisi heki luba na ndyaatulu yayelemene ha busu bwa baatu bari ku mbasi, na muutu kahele kulubuungula.

Nyisulu Mfumu

¹³ Bampaangi, beetu tutii ko ti beenu luba kunsa lubu, mu mitariri babo ba mwaafwa, mpisi luhele kwenyoongo bunu bakaka bahele na nsiitu.

¹⁴ Mbuti tusiila kanyi ti Yesu wafwiiri na wafulukiri, lo tusiileenu se kanyi ti Nzaambi sa kafulukisa mu Yesu, babo bafwiiri kuri bari na kanyi mu nde.

¹⁵ Mukwongo, mi turi mu kuleele beetu, bunu buri maampu ma Mfumu, mimami: beetuneenu tuba twakiri mwooyo natee mu nyisulu Mfumu, ka tuba ku mankula ma babo bafwa ko.

¹⁶ Bukuri Mfumu nde-meene, mu kidiimbu kya nyaabusulu, mu mbeembu ya mukuutu bambasi, mu munyiingu mvumvuri ya Nzaambi, sa kasunduka mu mayulu, na babo bafwiila mu Kiristo sa batekesele kufuluka;

¹⁷ tumi beetuneenu tuba twakiri mwooyo, batunaanguna ha kimosi na bo mu matuti, mu kubwaana Mfumu mu kingye-kingye, na kuba kintwaari na Mfumu mantaangu momanso.

¹⁸ Hango-nkuumbu, yendeenu lwebondosono beenu na beenu mu maampu mamo.