1 Tes 2 - Musamu Wamubwete 2013

Kisalu kya Pawulo ku Tesalonika

¹ Bampaangi, beenu-meene luyaari dyo ti nyisulu beetu kuri beenu yasiiri kuba yabuunu ko.

² Bunu bu luyaari, beetu twamono mpasi na batubamisa ku Filipo, ngo Nzaambi yeetu watusyaamisa mu kuyikisa Musamu waandi Wamubwete kunsa nwaanusunu dzamakwa.

³ Mukwongo, nyikusulu dza beetu ka dziri dza nzimbusulu ko, dza nsumukunu bunu pe dza mawunu ko.

⁴ Ngo bukuri Nzaambi watufyongokini mu kutuyakisa Musamu Wamubwete, beetu tukweyikisa kari mu kubweeye ha busu bwa baatu ko, ngo ha busu bwa Nzaambi, nde wufyongokinaa mitima myeetu.

⁵ Bunu bu luyaari, beetu twasii salila mu nzoonsulu dza lupyelu ko, bunu pe mu buungu dya ntiki-mboongo ko, Nzaambi mbaangi.

⁶ Beetu twasiiri saka masiiku mafumuna kuri baatu ko, mafumuna kuri beenu, bunu pe kuri bakimi ko.

⁷ Twaba kwaandi lo twakuka mu kuri ti beenu lutubuungula, bu turi bantumu ba Kiristo, ngo kasi beetu twaba twaluula mu bundeembu ha kakati dya beenu, bunu musoombi wubuungulaana baala ba nde-meene.

⁸ Mu musoongo wu turi na nde mu beenu, beetu turi na kiminu mu kuluha, kari wunu Musamu Wamubwete wa Nzaambi ko, ngo na kidziingu kya beetu-meene se, bukuri beenu luri bampaangi ba mutima.

⁹ Mukwongo, baambukeenu mwooyo, bampaangi, mu kisalu kya makwa na mpasi dza beetu: beetu twaluyikisa Musamu Wamubwete wa Nzaambi, mu kwesala butsuku na mwiini, mpisi heki ti mosi mu beenu kahele kutubuungula.

¹⁰ Beenu luri bambaangi, Nzaambi se mbaangi: ndyaatulu beetu yaba yangisi, yasuunguma, na yahele maseembu ha busu bwa beenu basiila kanyi.

¹¹ Beenu luyaari se ti, beetu twaba kuhololo mosi mosi mu beenu bunu bu hololaana taayi baala baandi.

¹² Beetu twaba kweluboondaana, kwelusyaamisaana, na kweluyingukilaana mu kuba na ndyaatulu yitiiri Nzaambi, nde wuri mu kuluteele mu kimfumu na mu nkeembu yaandi.

¹³ Hango-nkuumbu, beetu tubvutulaana matoondo kuri Nzaambi mpisi ntaangu, bukuri maampu ma Nzaambi ma luri lwayuka kuri beetu, beenu lwamataamburi, kari bunu maampu ma baatu ko, ngo bunu bu mari maampu ma Nzaambi ma ngwanwa, ma kwesala mu beenu basiilaana kanyi.

¹⁴ Mukwongo, bampaangi, beenu lweki minsombisiri mya mabuundu ma Nzaambi, mari mu nkoonsi ya Yudaya, masiila kanyi mu Kiristo Yesu, bukuri beenu se lwabamini kuri ba beenu-meene ba luri nsi mosi, mu misamu myomimosi mya bamini mabuundu mamo kuri Bayudayo.

¹⁵ Bo ngo baba dzusa Mfumu Yesu na babikiri, na bakwaamisini beetu. Bahele kubweeye ha busu bwa Nzaambi, na bo ngo bataatu ba baatu bobanso.

¹⁶ Bakwetukabukisa kuyikisa bangooyi mpisi bahele kubvuuka. Mu didyo bo bari mu kukukisilaana kiteesu kya masumu maaku, mpisi ntaangu. Ngo ku manunu nkesi dza Nzaambi dzi mwaa kubatubukila.

Pawulo wuri na nzala kubweese kumono bari ku Tesalonika

¹⁷ Bampaangi, beetu ngo bari, bu twaba la na beenu mu mwaa ntaangu, mu manyutu nkani ka mu mitima ko, mu musoongo walaka wu twaba na nde, twabaka kitsimi kya makwa mu kuri ti tumoneenu mu miisu na miisu.

¹⁸ Mu didyo, beetu twaba na nzala kwiisa kuri beenu, mbiki ti me Pawulo, mbala mosi bunu pe dzoolo, ngo Satana watukabukisi.

¹⁹ Mukwongo, beenu luri nsiitu yeetu, kiminu kyeetu, bunu pe lukoongolo lweetu lwa ndulukulu, ha busu bwa Mfumu yeetu Yesu mu ntaangu ya nyisulu yaandi.

²⁰ Mukwongo, beenu luri nkeembu yeetu na kiminu kyeetu.