1 Pet 5 - Musamu Wamubwete 2013

Kubuungula mpuumbu ya Nzaambi

¹ Me nyisyaamisa bakulu ba babakala bari ha kakati dya beenu. Me se nyiri mukulu-bakala bunu bo, mbaangi mu mpasi dza Kiristo, na nyiri kintwaari mu nkeembu yiba yayabakana.

² Buunguleenu mpuumbu ya Nzaambi yiri ha kakati dyeenu. Kebeenu yo mu bunkete, kari mu kukwiikisa ko, ngo mu mutima-bubwete bunu buri kutya kwa Nzaambi, kari mu kubaka mufutu mu bumpilikisi ko, ngo mu kuheme,

³ kari mu kuba bunu bamfumu, ha yulu babo balukwetwaalisa ko, ngo mu kuba kifwaani kyakibwete kuri mpuumbu.

⁴ Tumi ha monokono mukuutu batari, beenu lutaambula lukoongolo lwa nkeembu luri lwabiiya ko.

⁵ Bunubwo se, bituuti, beenee batumuma kuri bakulu ba babakala. Beenu-banso lwaateenu nkulukulu bunu musweele ha busu bwa bambaasi, bukuri: «Nzaambi wutungukilaa bangaa-masiiku, ngo kasi wuhaanaa bweese kuri bakuluka.»

⁶ Ngo kulukee kweenu kunsa koko kwa Nzaambi kwa mpinu, mpisi kaludzaangisa mu ntaangu yayelemene.

⁷ Mubwoongokileenu bitsimi byeenu byobinso bya mpasi, bukuri nde wuri na lusaambu mu beenu.

⁸ Beene bangaa-ndiilu na nwiinu byayelemene, beenee naana. Mutaatu weenu dyabulu, wuri mu kwedyengekele bunu nkosi yi kwewuma, yi kwesaka wu kamingutina.

⁹ Mutungukileenu na keketee mu kanyi, bu luyaari kuri ti bampaangi beenu se, bari mu kwekuunda mpasi dzodzimosi ha nsi.

¹⁰ Nzaambi ya mabweese momanso, waluteele mbila mu kukoto mu nkeembu yaandi yahele manunu mu Kiristo Yesu, bu lumwiini mpasi mu mwaa-ntaangu, sa kabweese kalutelemese nde-meene, sa kalukumisa, sa kaluha makwa na sa kalusa na keketee.

¹¹ Kuri nde kuba mpinu mu bibvu ngo bibvu! Amene.

Mboto ya manunu

¹² Mu lubakusu lwa Silvano, wu nyihololaa me bunu mpaangi yakwiikama, me nyilutinini mwaa-mukaanda wumawu, mu kulusyaamisa na mu kuta kimbaangi, ti bweese bwa Nzaambi bu luri lwasiila nsiitu buri bwangwanwa.

¹³ Dibuundu dyasoolu bunu beenu, diri ku Babiloni diluheekiri mboto. Malako se mwaana waami wuluheekiri mboto.

¹⁴ Beenu na beenu se helesenee mamboto mu nyumutunu ya ntiilu. Kiyeengi kiba kuri beenu-banso luri mu Kiristo.