1 Pet 4 - Musamu Wamubwete 2013

Kusiisa masumu

¹ Ngo Kiristo bu kamono mpasi mu muswinyi, beenu se holeenu kitsimi kya bubwo bunu kinwaanunu, ti muutu wu mwaamono mpasi mu muswinyi, mwaahoto kuyirika masumu,

² mpisi heki beenu lunata kidziingu kya muswinyi, mu ntaangu yisiiri, bunu buri kutya kwa Nzaambi, nkani ka buri nyiimunu dza baatu ko.

³ Bukukiri! Bukuri mu ntaangu yaluta beenu lwayirikiri mi tiiri bangooyi, bu lwabee kwedyaatila kunsa buyala, nyiimunu, nkolulu malu, ndiilu na nwiinu bya mawaamba, na nsaambukulu-biteki yiri ntoono yayibi.

⁴ Mu didyo, bo bamono dyo dyankimukunu, ti beenu lwahele kubweese kweba kintwaari na bo, kunsa mawaamba ma buyala, ngo bari mu kwelusaana.

⁵ Bo sa batambikisa biyiriki byaaku, kuri wunde wayirima mu kutsuundisa bamwooyo na bafwa.

⁶ Mukwongo, mu bubwo, bari bayikisa Musamu Wamubwete kuri bafwa se, mpisi baba batsuundusu mu muswinyi bunu bu tiiriri baatu, na baba mwooyo mu Mpeeve bunu bu tiiriri Nzaambi.

Ntiilusunu munsa dibuundu

⁷ Nsukulu bitotolo byobinso yeki bele. Ngo dyaatileenu mu madyeele, na beenee na ndiilu na nwiinu byayelemene, mu ntoono lusaambulu.

⁸ Tekeselee meti, kutilisina kwalaka beenu na beenu, bukuri "ntiilu yifuukaa fundu-fundu dya masumu".

⁹ Yendee lwetaambula bambaasi beenu na beenu, kwahele kwemunguta.

¹⁰ Mpisi muutu, bunu buri kikabu kikari kataambula, kasalila kyo mu ndaandu ya bobanso, bunu bakebi bababwete ba mabweese ma Nzaambi, ma bitsuumbu-bitsuumbu.

¹¹ Mbuti muutu wudzoonso, lo kadzoonso bunu nde wutubula maampu ma Nzaambi; mbuti muutu wusala, lo kasalila mu makwa ma muha Nzaambi, mpisi heki mu momanso, Nzaambi kaba wakeembusu mu Yesu Kiristo, kuri nde kuri nkeembu na mpinu mu bibvu ngo bibvu! Amene.

Kumono mpasi mu nkuumbu ya Kiristo

¹² Banduku ba mutima, yaa lukimuka ko, mu kuba kunsa nsindukulu dzamakwa dzi mwaalutubukula, bunu ti ntoono yanzeense.

¹³ Ngo bukuri beenu luri na kikuuku mu mpasi dza Kiristo, lo monee kiminu, mpisi heki mu ntaangu yiyabakana nkeembu yaandi, beenu lutirimika mu kiminu.

¹⁴ Mbuti bakwelutuka mu ntoono nkuumbu ya Kiristo, lo beenu luri mu lwambwe, bukuri Mpeeve ya nkeembu ya Nzaambi yiwuumaa ha yulu beenu.

¹⁵ Mukwongo, muutu ti mosi mu beenu, yaa kamono mpasi ko, bunu ti nde mudzusi kari, bunu pe ngaa-kwiibi, bunu pe muyiriki-mamabi, bunu pe ngaa-kintori.

¹⁶ Ngo mbuti nde mpasi kumono mu nkuumbu ya mukiristo, lo yaa kamono nsoni ko, ngo kakeembese Nzaambi mu nkuumbu yiyo.

¹⁷ Bukuri kimaki ngo kilookolo kya kubaandika mutsuundu mu nzo ya Nzaambi. Ngo mbuti bandukiri mu beetu, lo buri bubeele nsukulu ya babo, babisa kusa kanyi mu Musamu Wamubwete wa Nzaambi?

¹⁸ Heki, "mbuti wasuunguma kubvuukila ha wuri dya mukuungi, lo buri bubeele mu muutu wahele na kinzaambi na mu ngaa-masumu?"

¹⁹ Hango, babo se bamonaa mpasi bunu buri kutya kwa Nzaambi, bayekele miheebulu mya bo kuri Muyiriki wakwiikama, mu nyirikulu mamabwe.