1 Pet 3 - Musamu Wamubwete 2013

Nyukusunu ha kakati dya bakasi na balumi

¹ Bwobumosi beenu bakasi, tumumeenu kuri balumi beenu, mpisi heki ti hayuku babamosi babisa kusiila kanyi mu maampu, baba babakama kwahele maampu, ngo mu ndyaatulu ya bakasi baaku,

² bu bamono ndyaatulu yeenu ya bungisi kunsa kibvumi.

³ Monokunu yeenu ya ku mbasi yaa yiba mu: mfu dzahandu, bilebete bya woolo, bunu pe ndwaatulu binkuta byabibwe ko,

⁴ ngo bibyo byasweeku kunsa mutima muutu, biri byabiiya ko, bya mpeeve ya bundeembu, na ya kiyeengi, biri na ntalu yayinene ha busu bwa Nzaambi.

⁵ Mukwongo, bubwo mu ntaangu yayikulu, bakyeetu bangisi, baba na nsiitu mu Nzaambi, baba kwebweeyisaana manyutu maaku, mu kwetumuma kuri balumi baaku.

⁶ Bunu Sara, waba watumuma kuri Abalaami, wu kaba kweteelaana «Mfumu». Beenu lwayeki baala baandi ba bakyeetu, bu luyirikaa mamabwe, na bu luhelaa kuba na boomo mu kitotolo ti kimosi.

⁷ Balumi se bwobumosi, dzakaleenu mu kintwaari kunsa nyukusunu, bunu bu luyaabiri buyonsi bwa kitsuumbu kya bakyeetu. Bakiinseenu, bukuri bo se bari bakoondiri ba saala dya bweese bwa kidziingu. Yirikee bubwo, mpisi heki nsaambulu dzeenu dzihele kuba dzakakusulu.

Kwebama mu ntoono mamabwe

⁸ Ha mambisa haho, yukusunee beenu-banso, kabusinee mpasi, tyeenee bampaangi, beenee bangaa-ngebe, beene bakuluka,

⁹ yaa lwebvutula mamabi mu mamabi ko, bunu pe kitari mu kitari ko. Ngo kasi yendee lwesakumuna, bukuri mu bubwo bari baluteele mbila, mpisi heki lutaambula lusakumunu ngo saala.

¹⁰ Mukwongo, «Mpisi wutiiri kubaka kidziingu na kumono biluumbu bya kiminu, lo kakebe ludima lwaandi mu mamabi, na bibori byaandi mu kuhele kweleele mya mpya,

¹¹ kalooso mamabi na kayirika mamabwete, kesaka kiyeengi na kanamitina kusalila mu kyo.

¹² Bukuri miisu mya Mfumu miri ha yulu basuunguma, na makutu maandi maywiilaa nsaambulu dza bo; kasi busu bwa Mfumu buri kitatu na babo bayirikaa mamabi.»

¹³ Na wuyirikila beenu mamabi, mbuti beenu luri bangaa-kuheme mu mamabwe?

¹⁴ Ngo ti hayuku, beenu lukotiri mu mpasi mu ntoono nsungumunu, lo beenu luri mu lwambwe. Yaa luba na boomo bwa bo ko, na mutima yaa kasa mambaawu ko.

¹⁵ Dumusee Kiristo Mfumu kunsa mitima myeenu. Beene bayirima mu mantaangu momanso, mu kukalila buungu, kuri mpisi wunde wulufuula, nsiitu dziri mu beenu,

¹⁶ ngo diba mu bundeembu, mu kibvumi, na mu bitsimi byabibwete, mpisi heki mu ntoono yi bari mu kulusaanina, babo balusaana bafwa nsoni, mu kumono mu ndyaatulu yeenu yayibwete mu Kiristo.

¹⁷ Mukwongo, bubvuriri bubwete, mbuti bubwo buri kutya kwa Nzaambi, mu kumono mpasi mu nyirikulu mamabwe, ti na kumono mpasi mu nyirikulu mamabi.

¹⁸ Bukuri Kiristo wamono mpasi, lwo lumosi mu masumu; nde wasuunguma wamono mpasi mu ntoono bahele kusuunguma, mpisi heki kalunata kuri Nzaambi. Nde bamudzusiri mu muswinyi, ngo Mpeeve yamufulukisi.

¹⁹ Mu bubwo se, nde kari kayende mu kuyikisa biluunsi byaba mu boroko,

²⁰ byabisiri kusa kanyi mu ntaangu yayikulu, yaba namitinaa nkindusulu-mutima ya Nzaambi, mu biluumbu bya Nowa, bi kaba kwetuunga nzo ya kiluungu, munsa yo baatu bantele, miheebulu mpoomo myabvuukiri mu maampa.

²¹ Kikyo kyaba kifwaani kya mbotokulu, yilubvuukisa mu lumalu, mbotokulu yiyo yiri ya nswaakulu mviindu dza muswinyi ko, ngo ntambukulu Nzaambi mu kitsimi, mu nzila ya mfulukulu Yesu Kiristo,

²² nde wuri bu kayende ku yulu, wuri ha lubakala lwa Nzaambi. Bambasi, na baatu bari na lutumu na bari na mpinu, bari kunsa lutumu lwaandi.