1 Kol 7 - Musamu Wamubwete 2013

Mamvutu mu misamu mitariri makweele

¹ Mu mitariri misamu mi lwatinina me, buri bwabubwete kuri muutu mu kuhele kubelemene wa mukyeetu.

² Ngo kasi, mu kubata buyala, mpisi bakala kaba na mukasi wa nde-meene, na mpisi mukyeetu se kaba na mulumi wa nde-meene.

³ Mulumi kayirika kuri mukasi waandi mamo ma kayelemini kuyirika, na mukasi se kayirika bwobumosi.

⁴ Mukasi kari na lutumu mu nyutu ya nde-meene ko, ngo mulumi; bwobumosi se, mulumi kari na lutumu mu nyutu ya nde-meene ko, ngo mukasi.

⁵ Wuni yaa kabisa wakaka ko, mbuti ka kuri luyukusini mu mwaa-ntaangu, mpisi lukoto mu lusaambulu; tumi lubweese kubvutukila kuba ha kimosi, mu kubata ti Satana kakwiisa kulusindukila, bu luheriri kuba na nkebulu-nyutu.

⁶ Ma nyileele mamo, mu kuri ti luba na nyukusunu, nkani ka mu kuluha lutumu ko.

⁷ Me mbee ntii kwaandi, ti baatu bobanso baba bunu me; kasi mpisi muutu wuri na kikabu kya nde-meene kya muha Nzaambi, wamosi wuri na kimaki, wakaka wuri na kikyo.

⁸ Kuri bahele kukweele, na kuri bafwiila balumi me nyileele ti, buri bwabubwete mu kuba bunu me.

⁹ Ngo mbuti bahele kubangisina kukebe manyutu, lo bakweele; bukuri bubvuriri bubwete mu kukweele ti na kuya mbaawu.

¹⁰ Ngo kasi, kuri bakweele me nyiha lutumu, kari me ko, ngo Mfumu: Mukasi yaa kahambikisa na mulumi waandi ko.

¹¹ Ngo mbuti weki wahambikisa, lo kaba bunubwo kwahele kukweele, bunu pe kabweese kuyukusuna na mulumi, na mulumi yaa kasuusa mukasi ko.

¹² Me nyileele kuri bakaka, me nkani ka Mfumu ko: mbuti mpaangi mosi wuri na mukasi wa mungooyi wutaamburi kwedzakala na nde, lo yaa kamusuusa ko.

¹³ Na mbuti wa mukyeetu wuri na mulimi wa mungooyi, wutaamburi kwedzakala na nde, lo yaa kamusuusa ko.

¹⁴ Bukuri mulumi wa mungooyi wataambula bungisi mu mukasi, na mukasi wa mungooyi wataambula bungisi mu mpaangi; mbuti ka bubwo ko, lo baala beenu basumuka, ngo kasi mu lumalu bo bari bangisi.

¹⁵ Ngo mbuti wa mungooyi tii kuhaambuka, lo kahaambuka kwaandi; haho ngo hari lo, mpaangi bunu pe kibusi wahele kuba wakaangama. Nzaambi waluteele mu kuba kunsa kiyeengi.

¹⁶ Mukwongo, ye wa mukyeetu buri wuyaabila, kampe ye sa bvuukisa mulumi waaku? Bunu pe ye wa mubakala buri wuyaabila, kampe ye sa bvuukisa mukasi waaku?

Kuba mu kiteesu kya mbila yaluteele Nzaambi

¹⁷ Mu myakaka ngo miri, hemese mpisi muutu kaba mu kiteesu kya muha Mfumu, mpisi muutu kadyaatila bunu buri mbila yamuteele Nzaambi. Mamo me nyiri mu kuloombo munsa mabuundu momanso.

¹⁸ Muutu wataambula mbila kuri wateendu bubakala, lo yaa kasaka kuba na sutu ko; muutu wataambula mbila kuri wahele kuteende bubakala, lo yaa kasaka bamuteende bubakala ko.

¹⁹ Nteendulu bubakala yiri kitotolo ko, na kuhele kuteende bubakala kiri kitotolo ko, ngo biri mufunu kubvumina mangisi ma Nzaambi.

²⁰ Mpisi muutu kanamitina kuba mu kiteesu ki kaba, ha kataamburi mbila.

²¹ Ye nkutu waba ha wataamburi mbila? Lo yaa mono mutima mpasi ko; ngo mbuti wiisiri kubaka bunsaalisi, lo bakila bwo ndaandu.

²² Mukwongo, nkutu yataambula mbila mu Mfumu, muutu wakuuluka wuri wa Mfumu; bwobumosi se, muutu wuri bunsaalisi wataambula mbila, nkutu Kiristo kari.

²³ Nzaambi walusuumbiri mu ntalu yalaka, ngo yaa lukituka bankutu ba baatu ko.

²⁴ Bampaangi, mpisi muutu kanamitina kuba ha busu bwa Nzaambi, mu kiteesu ki kaba, ha kataamburi mbila.

Bamfuubi na bafwiilila balumi

²⁵ Mu mitariri babo bahele kukweele, me nyahele na ntumunu dza Mfumu, ngo me kitsimi nyisoongo, bunu bwa mbakila Mfumu ngebe, mu kuba muutu wu bayelemini kusikikila.

²⁶ Ngo me nyitsima ti buri bwabubwete mu kuba bunubwo, mu ntoono mpasi dza ntaangu yimayi: buri bwabubwete kuri muutu mu kuba bunubwo.

²⁷ Buri ye wakaangama mu wa mukyeetu? Yaa saka kuhambikisa ko. Wahele kukaangama mu wa mukyeetu? Yaa saka kukweele ko.

²⁸ Ngo mbuti ye kweeriri, lo kari masumu yirikiri ko; na mbuti ntuumba yanswaasa yikweeriri, lo kari masumu kayirika ko; kasi babo bakweele sa bamono mpasi mu muswinyi, ngo me ntiiri kuluwuungula mu mpasi dzidzo.

²⁹ Bampaangi, me bu ntiiri kuleele ti: ntaangu yeki yayikufi; mu lumalu, babo bari na bakasi, baba bunu ti bahele na bakasi,

³⁰ babo bari mu kudila, baba bunu ti bahele mu kudila, babo bari mu kumono kiminu, baba bunu ti bahele kumono kiminu, babo bari mu kusuumba baba bunu ti bahele na kitotolo,

³¹ na babo bari mu kubaka ndaandu mu nsi yimayi, baba bunu ti bahele kubaka ndaandu, bukuri nsi yamonokono yimayi yiri mu kuluta.

³² Me ntiiri ti beenu luhele kuba kunsa minyoongi. Wa mfuubi wusanaa minyoongi mu misamu mya Mfumu, wukwesaka bwa kubweeyile kuri Mfumu;

³³ ngo kasi, wakweele wuri kunsa minyoongi mu misamu mya nsi, wukwesaka bwa kubweeyile kuri mukasi waandi,

³⁴ na wuri mu kwedunga. Mukyeetu wa mfuubi na ntuumba ya nswaasa basanaa minyoongi mu misamu mya Mfumu, mpisi baba bangisi mu nyutu na mu kiluunsi, ngo kasi wakweele wusanaa minyoongi mu misamu mya nsi, wukwesaka bwa kubweeyile kuri mulumi waandi.

³⁵ Me nyileele mamo mu ndaandu ya beenu-meene, kari kuri ti nyilutubula siinga ko, ngo mu kuri ti luba na mbeelu yayibwete, na kinkununu mu Mfumu kwahele kebu-kebu.

³⁶ Mbuti muutu wumono kuri ti, lo wahele bweese kukuunda kuba wa nswaasa, wuri na nzala kuyukutisa mpwiisu ya muswinyi, na buyelemini kuba bubwo, lo kayirika ma katiiri, nde wahele kuyirika masumu, kakweele kwaandi.

³⁷ Ngo kasi, wunde wakaanga kitsimi kya makwa kunsa mutima waandi, kuri bahele kumukwiikisa, na wuri na lutumu mu mi katiiri nde-meene, tsimini kunsa mutima waandi, ti yelemini kukiinsa bunswaasa bwaandi, lo bubwe kayirika.

³⁸ Mu didyo, wunde wukweelisiri bunswaasa bwaandi lo bubwe kayirikiri; ngo wunde wahele kubukweelese, lo bvuriri kuyirika mamabwe.

³⁹ Mukyeetu wakaangama mu mulumi waandi, mu ntaangu yoyinso yiri mulumi wuri wamwooyo; ngo mbuti mulumi fwiiri, lo mukyeetu bakiri bunsaalisi mu kukweele wu katiiri, ngo kakweele wunu wuri mu Mfumu.

⁴⁰ Ngo mbuti mu kitsimi kya me, lo nde bvuriri kuba mu lwambwe mbuti nde namitini kuba bunu bu kari; me nsimini ti me se nyiri na Mpeeve ya Nzaambi.