1 Kol 6 - Musamu Wamubwete 2013

Muyalu na bampaangi

¹ Habaanaa mosi mu beenu, wuri na musamu na muutu mukimi, buri katsiitsa kweende ku muyalu ha busu bangaa-bubayi, nkani ka ha busu bwa bangisi ko?

² Buri beenu lwahele kuyaaba ti bangisi sa batsuundisa nsi? Ngo mbuti beenu lutsuundisa nsi, lo buri beenu lwahele kuyelemene mu kulalama misamu mya ntele?

³ Buri beenu lwahele kuyaaba ti, sa twatsuundisee bambasi? Heki buri tukoono kulalama misamu mya kidziingu kimaki?

⁴ Ngo lubaanaa luri na misamu mya kidziingu kimaki mya kulalama, beenu kweende kuri balarimi bari dibuundu wabanyaafuna,

⁵ lo me nyileele ti, dzidzo nsoni kuri beenu. Nkati ha kakati dya beenu, kwahele ngaa-madyeele ti mosi, wuri lo lalimini musamu na kusa nyukusunu, ha kakati dya bampaangi baandi?

⁶ Ngo mpaangi mosi lo wusa muyalu na mpaangi yakaka, na mimyo ha busu bwa bangooyi?

⁷ Mukwongo, lubaanaa lweki na miyalu beenu na beenu, lo yiyo mbwiilulu beenu yoyinso. Buri beenu luri, misamu mya bubayi kwekuunda pe? Buri luri kuhemene pe baluholo na byobinso bi luri na byo?

⁸ Ngo kasi beenu lukwesalila bubayi, na kweholo bitotolo bya baatu, na mamo kweyirika kuri bampaangi.

⁹ Buri beenu lwahele kuyaaba ti, bangaa-bubayi ka bataambula saala dya Kimfumu kya Nzaambi ko? Yaa luwunukina kweenu ko: biyala, minsaambiri mya biteki, bangaa-kimpala, bari na manzelu ma bukyeetu, babakala kakwesa kimpala na bambaasi bakala,

¹⁰ bangaa-kwiibi, bangaa-nsoki-mboongo, bakori ba malu, bangaa-bitari, na bakwedzika bya baatu, ka bataambula saala dya Kimfumu kya Nzaambi ko.

¹¹ Babamosi mu beenu bubwo baba, kasi lwayeki lwaswaaku, lwayeki lwataambula bungisi, lwayeki lwalulukusu mu nkuumbu ya Mfumu Yesu Kiristo, na mu Mpeeve ya Nzaambi yeetu.

Kusalila nyutu mu kukeembese Mfumu

¹² Me nyiri na miswa mu myominso, kasi myominso myahele mufunu; Me nyiri na miswa mu myominso, kasi nyiri ntambukila kuba kunsa lutumu lwa mpisi kiba ko.

¹³ Byandya bya mwooyo biri, na mwooyo wa byandya, ngo Nzaambi sa katsyaamuna byobyoolo. Nyutu yiri ya buyala ko, ngo ya Mfumu, na Mfumu wa nyutu.

¹⁴ Ngo Nzaambi, wafulukisi Mfumu, sa katufulukisa mu mpinu dzaandi.

¹⁵ Buri beenu lwahele kuyaaba ti, manyutu ma beenu ngo binamu bya Kiristo? Buri me lo mporiri binamu bya Kiristo mu kubikitula binamu bya mukyeetu wa kiyala? Ti bele na dyo pe!

¹⁶ Buri beenu lwahele kuyaaba ti, wunde wubvuutini na mukyeetu wa kiyala, lo beki nyutu mosi? Bukuri diri dyaleelu ti: «Boboolo sa baba muswinyi mosi.»

¹⁷ Ngo wunde wubvuutini na Mfumu, lo beki kiluunsi kimosi.

¹⁸ Bateenu buyala. Mpisi masumu, mari muutu wumayirika, lo mari ku mbasi nyutu. Ngo wusa buyala, wuyirikaana masumu mu nyutu ya nde-meene.

¹⁹ Buri beenu lwahele kuyaaba ti, nyutu beenu, ngo Nzo-nzaambi Mpeeve Yangisi, yiri mu beenu, yi luri lwataambula kuri Nzaambi, na lwahele kubweese kuba ba beenu-meene?

²⁰ Mukwongo, beenu bayeki balukuula mu ntalu yayinene. Ngo keembeseenu Nzaambi mu nyutu yeenu.