1 Kol 4 - Musamu Wamubwete 2013

Bantumu ba Kiristo

¹ Mu didyo, baatu bayelemini kutuhololo bunu bisari bya Kiristo, na bakebi ba mpaanu dza Nzaambi.

² Hango, misiiri mi bari mu kuloombo kuri bakebi, miri ti baba bakwiikama.

³ Me ngo wuri, kuri mufunu walaka ko mu kuri ti me mba watsuundusu kuri beenu, bunu pe mu nsundusulu ya baatu. Me nyahele kutsuundisa nyutu me-meene.

⁴ Mukwongo, me ngo wuri nyahele kuyaaba ntoono, ngo kasi kari mu bubwo me nyiri nyalulukusu ko; wutsuundisa me ngo wuri Mfumu.

⁵ Hango, yaa lutsuundisa muutu ko, tekesele ntaangu yitubuka, natee Mfumu wiisiri. Nde mbasi-tsuku wuyaabisa mansweeki mari ku mampimbisi, na kusoongo bitsimi bya mitima. Haho, mpisi muutu kataambula masiiku kuri Nzaambi.

⁶ Bampaangi, mu ntoono beenu me mporiri kifwaani mu Apolo na mu me-meene, mpisi heki mu beetu, beenu luyika ntoono yiri ti: «Kupala pe ku mbasi mamo matinu», mpisi heki luhele kusa masiiku mu mosi kuri wakaka.

⁷ Mukwongo, na wumono kuri ti ye bvuriri? Nki ye wuri na byo, biri kari kutaambula wuri wataambula ko? Na mbuti kutaambula wuri wabitaambula, buri wuri mu kusa kimweese bunu ti wahele kutaambula?

⁸ Beenu lweki lwayukuta, beenu lweki bisina, beenu luri mu kubyaala kwahele beetu, ngo mbuti heki ti luri mu kubyaala, lo mu kuri ti beetu se tubyaala kintwaari na beenu.

⁹ Mukwongo, me bu nyimono, lo bunu ti Nzaambi wamonokoso beetuneenu bantumu bunu ti baatu bampotulu, bunu babari bakesele mukanu wa lufwa, bukuri twayeki bunu baatu babari mu kuseyesele ha busu bwa nsi, ha busu bwa bambasi, na ha busu bwa baatu.

¹⁰ Beetu turi bilawuku mu ntoono Kiristo, kasi beenu luri bangaa-madyeele mu Kiristo; beetu turi na buyonsi, kasi beenu luri na makwa; beenu luri bakeembusu kasi beetu turi banyaafunu.

¹¹ Natee mu kilookolo kimaki, beetu tukwefwa nzala na mpwiisu, turi mpene, bakwetulata, tukweyiima,

¹² na turi mu kwemono mpasi mu kwesala mu myooko mya beetu-meene. Bakwetutuka, ngo beetu tukwesakumuna; turi bakwaamusu, ngo beetu tukwekuunda;

¹³ bakwetufutukila, ngo beetu tukwesyaamisa. Beetu twayeki mutsyeeku nsi, bitiiti biri baatu bobanso babilooso, natee mu lumalu.

¹⁴ Me nyiri mu kulutinina misamu mimami, kari mu kuludzusa nsoni ko, kasi mu kululubula bunu baala baami ba mutima.

¹⁵ Mukwongo, lu ti hayuku lwiisiri kubaka mafuunda ma bayikisi mu Kiristo, lo luri na bataayi balaka ko, bukuri mu Kiristo Yesu, me nyalubutiri mu nyabusulu Musamu Wamubwete.

¹⁶ Ngo me nyilusyaamisa mu kuba basoombisiri ba me.

¹⁷ Hango-nkuumbu, me nyaluheekiri Timoteho, mwaana waami wa mutima na wakwiikama mu Mfumu. Nde sa kalubaambula mwooyo mu manzila maami mu Kiristo [Yesu], bunu bu nkooyikisilaa me kwokunso, mu mpisi dibuundu.

¹⁸ Babamosi basii masiiku, kutsima ti kampe me nyikwiisa kuri beenu ko.

¹⁹ Ngo mbuti Mfumu tiiri, me sa mwasila na kwiisa kuri beenu, na sa nyaaba nki bangaa-masiiku babo bari bakuka mu kuyirika, nkani ka mi bakwedzoonso bo mimyo ko.

²⁰ Bukuri Kimfumu kya Nzaambi kiri mu mya kudzoonso ko, ngo mu mya kuyirika.

²¹ Ngo beenu nki lutiiri? Kuri ti me nyiisa kuri beenu na lukwaasulu, hoti na ntiilu, na mpeeve ya bumpoombo.