1 Kol 3 - Musamu Wamubwete 2013

Bisari bya Nzaambi

¹ Me ngo wuri, bampaangi, me nyasii bangusina kuludzoonsolo bunu ti kuri baatu bakimpeeve ko, ngo bunu ti kuri baatu ba muswinyi, bunu ti kuri mwaa-baala bansoombo mu Kiristo.

² Me nyalunwiisiri beene, nkani ka byandya bya kuba me nyaluheeri ko, bukuri beenu lwaketi kubibangusina ko. Ti mu lumalu beenu lo lwahele kubibangusina,

³ bukuri beenu lwakiri baatu ba muswinyi. Mukwongo, habaanaa kuri bukwa, na mayumu ha kakati dya beenu, buri lo kari baatu ba muswinyi luri ko? Na kari mu kimuutu luri mu kwedyaatila ko?

⁴ Mukwongo, muutu habaana wuleele ti: «Me nyiri wa Pawulo» na wakaka ti: «Me nyiri wa Apolo», buri beenu kari kimuutu luri na kyo ko?

⁵ Heki Apolo nki? Pawulo nki? Bisari biri beenu mu byo luri lwataambula kanyi, bunu bwaheeriri Mfumu kuri muutu-muutu.

⁶ Me nyakunini, Apolo wanyaka maampa, ngo Nzaambi wabuukisa.

⁷ Mu didyo, mukuni kari kitotolo ko, na munyaki-maampa se kari kitotolo ko, ngo wuri mufunu Nzaambi wukoobuukisaa.

⁸ Mukuni na munyaki-maampa boboolo muutu mosi, mpisi muutu sa kataambula mufutu waandi, bunu buri kisalu kyaandi.

⁹ Bukuri beetu turi bakwesala kintwaari na Nzaambi. Beenu luri nseke Nzaambi, na luri nzo ya Nzaambi.

¹⁰ Bunu buri bweese bwa Nzaambi bu kari kampa, me nyatuunga lufulu bunu mutuungi-manzo wamadyeele, ngo muutu mukimi wuri mu kutuunga ha yulu. Ngo mpisi muutu kasa madyeele, mu ntuungulu yi kari mu kutuungula ha yulu.

¹¹ Mukwongo, kuri muutu wutsiitsa kutunga lufulu lukimi ko, ha teke lufulu lweki haho, ngo Yesu Kiristo.

¹² Ngo mbuti muutu wutuunga ha yulu lufulu lulwo, mu woolo, mu palata, mu matari ma ntalu, mu miti, mu nsyeri,

¹³ lo kisalu kya mpisi muutu sa kyaba kyamonokono. Mukwongo, kiluumbu sa kyasoongo, bukuri kisalu sa kyayabakana mu mbaawu, mbaawu sa yatsiitsa kumono bunu buri kisalu kya mpisi muutu.

¹⁴ Mbuti kisalu kyatuunga muutu ha yulu lufulu, kiri bunu bu kiri, lo nde sa kataambula mufutu.

¹⁵ Mbuti kisalu kya muutu kinyeengini, lo nde sa kabwilikila yitila, nde-meene ngo wuri sa kabvuuka kuri bunu nde pariri kunsa mbaawu.

¹⁶ Buri beenu lwahele kuyaaba ti beenu luri nzo-Nzaambi, na ti Mpeeve Nzaambi yadzakala mu beenu?

¹⁷ Mbuti muutu tsyaamini nzo-Nzaambi, lo Nzaambi se sa kamutsyaamuna; bukuri Nzo-Nzaambi yiri yangisi, na beenu yo luri.

¹⁸ Muutu yaa kawunukina nde-meene ko: mbuti ha kakati dya beenu, muutu wutsima ti nde ngaa-madyeele mu ntaangu yimayi, lo kaba kilawuku mpisi heki kaba ngaa-madyeele.

¹⁹ Mukwongo, madyeele ma nsi yimayi ngo bulawuku ha busu bwa Nzaambi. Bukuri diri dyatinu ti: «Nzaambi wubakaa bangaa-madyeele mu mweete wabo-meene.»

²⁰ Dya bweese kutina ti: «Mfumu yaari bitsimi bya bangaa-madyeele, nde yaari ti byabuunu.»

²¹ Hango, yaa kuba muutu wusiila kimweese mu baatu ko, bukuri byobinso bya beenu:

²² Kaba Pawulo, Apolo, Kefa, nsi, bumwooyo, lufwa, bitotolo bya ntaangu yimayi, bunu pe bya ku mankula, byobinso bya beenu;

²³ beenu luri baatu ba Kiristo, na Kiristo wa Nzaambi.