Biblia Todo Logo
Bìoball air-loidhne

- Sanasan -

1 Kol 16 - Musamu Wamubwete 2013


Ntolulu mboongo mu ntoono dibuundu dya Yerusalemi

1 Mu mitariri ntolulu mboongo mu ntoono bangisi, beenu se yirikeenu bunu bu nyatumini me, kuri mabuundu mari ku Ngalatya.

2 Mpisi kya lumiingu, muutu-muutu mu beenu kawuunguka ku nzo yaandi, bibyo bi kabangusini kukebe, mpisi bahele kukiinga ku nyikwiisa me mu kutolo mboongo.

3 Mu ntaangu yi nyitubuka me, me sa nyaheeke baatu ba luri lwasoolo, na mikaanda mpisi banata bikabu bya beenu ku Yerusalemi.

4 Mbuti bwayelemene ti me se nyeende, lo sa beende kintwaari na me.


Bitaasi bya Pawulo

5 Me sa nyiisa kuri beenu ha nyilutila ku Makedonya; bukuri me ku Makedonya nyilutila.

6 Mbuti buri bwadzuka, lo me sa nyadzakala kuri beenu, kampe sa nyalutisa se ntaangu ya kyoosi, mpisi lumbakisa mu kunamitina budyeengi bwaami, kwo ngo kwo ku nyibangisina kwe.

7 Bukuri me nyahele kutya kulumono hani ha nyiluta mu nzila, nyiri na kitsimi kya kudzakala mwaa-mantaangu kuri beenu, mbuti Mfumu heeri miswa.

8 Me sa nzakala ku Efeso, natee haba munkeembu wa Pantekote,

9 bukuri mweelu weki wadzibula kuri me na waangalaa, mu kusala kwakubwe, ti bukuri bataatu balaka.

10 Mbuti Timoteho wiisiri kuri beenu, lo talee, yaa kaba na boomo ko kuri beenu; bukuri nde wuri mu kwesala kisalu kya Mfumu bunu me.

11 Muutu yaa kamunyaafuna ko, ngo mubakisee mu kunamitina budyeengi bwaandi mu kiyeengi, mpisi nde kiisa kuri me, bukuri me nyiri mu kumukiinga, me na bampaangi.

12 Nkani mu mitariri mpaangi yeetu Apolo, me nyamusyaamisini kwalaka, mpisi kiisa na bampaangi kuri beenu, ngo nde wahele kutya kwiisa mu lumalu, kabakaa ntaangu tumi mbasi-tsuku kiisa.


Mandoongi ma mpotulu na mamboto

13 Beenee naana, teleme na keketee mu kanyi, lwatee kibakala, beenee na makwa.

14 Hemese myominso mya beenu myeyirimina kunsa ntiilu.

15 Me nyilusyaamisa bampaangi: beenu luyaa kuri ti baatu ba mu nzo Estefana, ngo batete bayiingiri madyeele mu Akaya; na bo bayekele manyutu mu kisalu kya bangisi.

16 Beenu se beeneenu batumuma kuri baatu ba bubwo, na kuri mpisi wunde wukwesala na kwemono mpasi kintwaari na bo.

17 Me nyimono kiminu mu nyisulu Estefana, na Fortunato, na Akayako, bukuri bo bayisiri mu kuyiingisa beenu luri bo pe.

18 Mukwongo, bo badzuunisini bitsimi bya me na bya beenu se. Yabukilee baatu ba bubwo.

19 Mabuundu ma ku Asya maluheekiri mamboto. Akila bo na Piriska, na dibuundu dikutukunaana mu nzo bo, baluheekiri mamboto malaka mu Mfumu.

20 Bampaangi bobanso baluheekiri mamboto. Helesenee mamboto beenu na beenu mu nyumutunu yangisi.

21 Taambuleenu mboto ya mu kooko kwa me-meene Pawulo.

22 Mbuti kuri wuri katii Mfumu ko, lo kabwilikila mpopi! Marana ta!

23 Bweese bwa Mfumu Yesu buba na beenu.

24 Me nyilutiiri beenu-banso mu Kiristo Yesu.

Nouveau Testament Beembe © Bible Society of the Republic of Congo, 2013.

Bible Society of Congo (Republic)
Lean sinn:



Sanasan