1 Kol 15 - Musamu Wamubwete 2013

Mfulukulu Kiristo

¹ Bampaangi, me nyilubaambula mwooyo mu Musamu Wamubwete wu nyiri nyaluyaabisa, wu luri lwataambula, wu luri lwasikikila.

² Mu nde beenu lutaambula mvuukulu, mbuti lumukebiri mu kiteesu ki nyiri nyaluyaabisila nde; mbuti kari bubwo ko, lo kwa buunu luri lwasiila kanyi.

³ Mukwongo, me nyalutubukiri hani tete, ma nyataamburi me se ti: Kiristo wafwa mu ntoono masumu ma beetu, bunu buri Matinu;

⁴ wadziiku na wafulukusu mu kiluumbu kyabitatu, bunu buri Matinu.

⁵ Nde wamonokono kuri Kefa, tumi kuri kuumi na boolo;

⁶ tumi, nde wamonokono ha kimosi kuri bampaangi, baluta lutaangu lwa nkama taanu, mu bo kwakiri bari mwooyo natee lumalu, ngo babamosi bayeki bafwa.

⁷ Tumi, nde wamonokono kuri Yakobo, tumi kuri bantumu bobanso.

⁸ Ha mambisa ma bobanso, nde wayisa kumonokono kuri me se, nyiri bunu mwaa-mwaana wabutuka kwahele kukukisa mangoondo.

⁹ Bukuri me nyiri wubvuriri buntele mu bantumu, me nyahele kukuka ti banteele ntumu, bukuri me nyakwaamisini dibuundu dya Nzaambi.

¹⁰ Mu bweese bwa Nzaambi, me nyiri bu nyiri, na bweese bwaandi ku nyiri me, bwasii ba bwabuunu ko, kasi me nyabvula kusala na bobanso, ngo kari me ko, kasi bweese bwa Nzaambi buri mu me.

¹¹ Ngo ti diba me, ti diba bo, bu turi twayabisila beetu, bunubwo se beenu luri lwasiila kanyi.

Mfulukulu yeetu

¹² Mbuti bakweyaabisa Kiristo, lo bukuri wafuluka mu bafwa, ngo dyaburi babamosi mu beenu bakweleele ti, mfulukulu ya bafwa yiri ko?

¹³ Mbuti mfulukulu ya bafwa yo pe, lo Kiristo se wahele kufuluka.

¹⁴ Na mbuti Kiristo wahele kufuluka, lo nyabusulu yeetu yabuunu, na kanyi dyeenu se dyabuunu.

¹⁵ Beetu lo tweki bambaangi ba Nzaambi bampya, bukuri tutaanaa kimbaangi kyampya ti Nzaambi wafulukisa Kiristo, kuri nde wahele kumufulukisa; mbuti ngwanwa ti bafwa bakoofuluka ko.

¹⁶ Mukwongo, mbuti bafwa bakoofuluka ko, lo Kiristo se wahele kufuluka.

¹⁷ Mbuti Kiristo wahele kufuluka, lo kanyi dyeenu dyabuunu, na beenu lwakiri kunsa masumu meenu,

¹⁸ na babo bafwa kuri bari na kanyi mu Kiristo, lo badziimbila.

¹⁹ Ngo mbuti nsiitu dzi turi na dzo mu Kiristo, munu mu ntoono kidziingu kimaki, lo beetu tubvuriri manyoongi mu baatu bobanso.

²⁰ Ngo mu lumalu Kiristo wafuluka mu bafwa, nde ngo watete mu bafwa.

²¹ Hango, bukuri lufwa lwafumuna mu muutu mosi, mu muutu mosi se mfulukulu ya bafwa yiri yafumuna.

²² Mukwongo, bunu bu fwiilaa baatu bobanso mu Adami, bunubwo se, bobanso sa baba bamwooyo mu Kiristo;

²³ ngo muutu-muutu ha kibeendu kyaandi, Kiristo ngo watete, tumi bari mu Kiristo, mu ntaangu ya nyisulu yaandi.

²⁴ Tumi manunu yiba, mu ntaangu yi kabvutula kimfumu kuri wunde wuri Nzaambi na Taata, kamanaa kutsyaamuna kikuutu kyokinso, lutumu lwolunso, na mpinu dzodzinso.

²⁵ Bukuri nde yelemini kutuma, natee ku kasuusiri bataatu baandi bobanso, kunsa bitaambi byaandi.

²⁶ Mutaatu wampotulu wa kutsyaamuna ngo lufwa.

²⁷ Mukwongo, «Nzaambi wasuusa byobinso kunsa bitaambi byaandi.» Ngo habaanaa baleele ti: «Byobinso biri kunsa lutumu lwaandi.», lo diri na pwelelee ti, wungu-wungu wunde, wasuusiri byobinso kunsa lutumu lwa Kiristo.

²⁸ Ngo byobinso bibaanaa byeki byasuusa kunsa lutumu lwaandi, haho nde-meene Mwaana se, kaba kunsa lutumu lwa wunde, wasuusiri byobinso kunsa lutumu lwa Mwaana, mpisi heki Nzaambi kaba byobinso, mu bitotolo byobinso na mu baatu bobanso.

²⁹ Mbuti kari bubwo ko, lo babo bakootaambulaa mbotokulu ha kibeendu kya baatu bafwa, lo nki basa? Mbuti ngwanwa ti bafwa bahele kufuluka, lo mu nkya ntoono bari mu kutaambulaana mbotokulu ha kibeendu kya bo?

³⁰ Na beetu-meene se, mu nkya ntoono tukookotaa mu nsisi mpisi ntaangu?

³¹ Mpisi kiluumbu me nyiri muutu wafwa; mu didyo, bampaangi, me nyisiingisa kimweese kyaami mu beenu, kikyo ki nyiri na kyo mu Kiristo Yesu Mfumu Yeetu.

³² Mbuti mu kimuutu, me nyanweeni na baatu bari makwa bunu bibulu ku Efeso, lo nkya ndaandu me nyiri nyabaka? Ngo mbuti heki ti bafwa bahele kufuluka, lo «tudyeenee na tunweenee kweetu, bukuri bweepari sa twafwa.»

³³ Yaa luwunukina kweenu ko: «Kimbaasi kyakibi kikoobiyisa bifu byabibwete.»

³⁴ Nkati bvutukee ha lwaba, na yaa lubwa mu masumu ko, bukuri babamosi bahele na nyaabulu Nzaambi, me nyiludzusa nsoni.

Nyutu ya mfulukulu

³⁵ Ngo muutu lo wufuula ti: "Bafwa dyaburi bafulukila? Nkya nyutu bakwiisa na yo?

³⁶ Ye dzeeke dya muutu! Bibyo bi wukuna ye lo biri menene ko, mbuti byahele kufwa;

³⁷ na bibyo bi wukuna ye, kari muti wu wuri mu kukiinga ko, ngo nkono saangu, bunu pe ya muti mukimi.

³⁸ Tumi Nzaambi kaha nkono yiyo nyutu bu katiiri, na kuri mpisi nkono, nyutu ya nde-meene.

³⁹ Manyutu momanso mahele kuba momamosi, ngo nyutu ya baatu yikimi, ya bibulu yikimi, ya banoni yikimi, na ya bansu se yikimi.

⁴⁰ Manyutu ma ku yulu mari, manyutu ma ha butoto se mari, ngo kuseme kwa manyutu ma ku yulu, kwasoboko na kuseme kwa manyutu ma ha butoto.

⁴¹ Kuseme kwa ntaangu kukimi, kuseme kwa ngoondo kukimi, na kuseme kwa bambwetete se kukimi; bukuri mpisi mbwetete se yasobokono na yakaka mu kuseme.

⁴² Bunubwo se buri mu mfulukulu ya bafwa. Nyutu bayidziikaa kunsa mbolulu, ngo yifulukaana kuri yahele kubweese kubolo;

⁴³ bayidziikaa kwahele lukiinsu, ngo yifulukaana kunsa nkeembu; bayidziikaa mu buyonsi, ngo yifulukaa kunsa mpinu;

⁴⁴ bayidziikaa ya muswinyi, ngo yifulukaana ya kimpeeve. Mbuti nyutu ya muswinyi yiri, lo nyutu ya kimpeeve se yiri.

⁴⁵ Hango-nkuumbu, diri dyatinu: «Muutu watete, Adami, waba muutu wamwooyo»; ngo Adami dyansukulu, mpeeve yihaanaa bumwooyo.

⁴⁶ Ngo kari wa kimpeeve watekesele ko, ngo kasi wa muswinyi; tumi wa kimpeeve keki kwiisa.

⁴⁷ Muutu watete wafumuna mu butoto, wa tubuumbu, waboolo wafumuna ku yulu.

⁴⁸ Bunu buri muutu wa tubuumbu, bunubwo se buri baatu ba tubuumbu; bunu buri muutu wa ku yulu, bunubwo se buri, baatu ba ku yulu.

⁴⁹ Bunu bu turi mu kifwaani kya muutu wa tubuumbu, bunubwo se tuba mu kifwaani kya muutu wa ku yulu.

⁵⁰ Ngo bampaangi, me bu nyiri mu kuleele ti: muswiini na makila ka bitsiitsa kukondolo saala dya kimfumu kya Nzaambi ko, na mbolulu ka yiri nkondolo kiteesu kyahele mbolulu ko.

⁵¹ Me nyiluyaabisa musamu wa mpaanu: beetu-banso tuwa kufwa ko, ngo kasi beetu-banso sa twakituka.

⁵² Mu kilookolo kimosi, mu mbwatukulu diisu, mu mvumvuri yampotulu. Bukuri mvumvuri bu yibwa, bafwa sa bafuluka na nyutu yahele mbolulu, na beetuneenu sa twakituka.

⁵³ Mukwongo, nyutu ya mbolulu yimayi, yiyelemini kulwaata kiteesu kyahele mbolulu, na nyutu yifwaanaa yimayi, yiyelemini kulwaata kiteesu kyahele mfwiilu.

⁵⁴ Mbasi-tsuku nyutu yibolaa yimayi, yilwaataana kiteesu kyahele mbolulu, na nyutu yifwanaana yimayi, yilwaataana kiteesu kyahele mfwiilu, haho ngo hayirima maampu matina ti: «Lufwa balumingutini kunsa ndulukulu!»

⁵⁵ «Lufwa, ndulukulu ye yiri hari? Lufwa, kiba kya ye kiri hari?»

⁵⁶ Kiba kya lufwa ngo masumu, na mpinu dza masumu ngo mangisi.

⁵⁷ Matoondo kuri Nzaambi, nde kootuhaanaa ndulukulu mu Mfumu yeetu Yesu Kiristo.

⁵⁸ Hango, bampaangi baami ba mutima, beeneenu na keketee, na ngwii, salee kisalu kya Mfumu, mu kiteesu kyalutila mu mantaangu momanso, bu luyaari kuri ti kisalu kyeenu mu Mfumu, ka kiri kyabuunu ko.