1 Kol 14 - Musamu Wamubwete 2013

Kubikula na kudzoonso mu mandiinga

¹ Namitinee kusalila ntiilu, beenee na kuheme mu bikabu bya kimpeeve, mbiki ti mu mbikululu.

² Mukwongo, wudzoonso mu mandiinga, wahele kudzoonso kuri baatu, ngo kuri Nzaambi; bukuri kuri muutu ko wubakula ma kaleele, koomosoko mu Mpeeve, nde wuri mu kuleele misamu mya mpaanu.

³ Ngo wunde wubikula, wudzoonsaa kuri baatu misamu mya ntuungulu, mya nsyamusunu, na mya nkumusunu.

⁴ Wudzoonsaa mu mandiinga, wubakaa ntuungulu ya nde-meene, kasi wunde wubikulaa wuhaanaa ntuungulu kuri dibuundu.

⁵ Me ntii ti beenu-banso lwedzoonso mu mandiinga, ngo mvuriri kutya kuri ti beenu lwebikula. Wubikulaa bvuriri na wudzoonsaa mu mandiinga, sati kuri ti nde-meene wubaangula, mpisi heki dibuundu dibaka ntuungulu.

⁶ Ngo mu lumalu bampaangi, mbuti me nyiisaa kuri beenu, kuludzoonsolo mu mandiinga, lo nkya mufunu me nyiba na nde kuri beenu, mbuti nyahele kudzoonso mu kutubula nyaabusulu, bunu pe nyaabulu, bunu pe mbikululu, bunu pe nyikusulu?

⁷ Bunubwo se, buri mu bisikulu bipalisaa mbeembu, bu siiri nseembe, bunu pe ngoomfi, mbuti byahele na minyiingu myasoboko, lo buri bayaabila munyiingu wa nseembe na ya ngoomfi?

⁸ Mukwongo, mbuti mukoonsi wahele kupalisa mbeembu yayibwete, lo na wuyirima mu kweende ku mudziingu?

⁹ Beenu se bwobumosi, mbuti ludzoonso mu ndiinga misamu miri baatu bahele kubakula, lo buri bayaabila mi baleele? Lo buni beenu ludzoonso kwa buunu.

¹⁰ Mandiinga ma bitsuumbu-bitsuumbu ha nsi, ngo buri, kuri ti yimosi yahele na mambangukulu?

¹¹ Ngo mbuti me nyahele kuyaaba ndiinga yidzoonso muutu, lo me nyiri munzeense kuri nde, na nde wuri munzeense kuri me.

¹² Hango beenu se, bukuri luri na kuheme mu bikabu bya kimpeeve, sakee kuba babuukula mu bya ntuungulu ya dibuundu.

¹³ Hango-nkuumbu, wunde wudzoonsaa mu mandiinga, kasaambila, mpisi kabaangula.

¹⁴ [Mukwongo], mbuti me nyisaambila mu mandiinga, lo kiluunsi kya me se kiri mu lusaambulu, kasi madyeele ma me mahele mu kusala.

¹⁵ Hango nsiila buri? Me nyelemini kusaambila mu Mpeeve, ngo nyelemini kusaambila se mu madyeele; me nyelemini kuyimbila mu Mpeeve, ngo nyelemini kuyimbila se mu madyeele.

¹⁶ Bukuri mbuti ye wuri mu kuha lusakumunu [mu] Mpeeve, lo muutu wabuunu wadzakala, buri kutambukila ti «Amene», mu mvutukulu matoondo ya ye, bukuri nde wahele kuyaaba, ma wuri mu kuleele?

¹⁷ Mukwongo, ye wuri mu kubvutula matoondo kwakubwe, kasi mbaasi wahele kubaka ntuungulu.

¹⁸ Me nyibvutula matoondo kuri Nzaambi, bukuri me mvuriri kudzoonso mu mandiinga ti na beenu-banso.

¹⁹ Ngo ha lukutukunu, me mvuriri kutya kuleele mantoono mataanu mu madyeele, mpisi me nyikisa se bambaasi, ti na kuleele fuunda dya mantoono mu ndiinga.

²⁰ Bampaangi, yaa luba mwaa-baala mu nsimunu ko; mu mitariri mamabi, beenee mwaa-baala, ngo mu nsimunu, beenee bakuutu.

²¹ Mu Mangisi mwatina ti: «Me sa nzoonso kuri kaanda dimadi mu baatu ba ndiinga yikimi, na mu minwa mya banzeense, ngo kasi ti mu bubwo, bo baywiila me ko, bu leeriri Mfumu.»

²² Mu didyo, kikabu kya mandiinga ngo kidiimbu kuri bangooyi nkani ka kuri bangaa-kanyi ko; na mbikululu ngo kidiimbu kuri bangaa-kanyi, nkani ka kuri bangooyi ko.

²³ Ngo mbuti heki, dibuundu dyodinso dyakutukuna ha kibeendu kimosi, na bobanso bari mu kudzoonso mu mandiinga, ngo baatu babuunu, bunu pe bangooyi bakotiri, buri lo bahele kuleele kuri beenu ti bilawuku?

²⁴ Ngo mbuti, bobanso bari mu kubikula, na mungooyi bunu pe muutu wabuunu kotiri, lo nde bakiri maseembu, na nsundusulu kuri bobanso;

²⁵ mansweeki ma mutima waandi lo mamonikini, na katsukaa busu ha nsi, saambiri Nzaambi na yaabisiri ti: "Ngwanwa Nzaambi wuri ha kakati dya beenu!"

Bunkete mu nkutukunu

²⁶ Bampaangi, nki kwaandi? Mu ntaangu yi lukutukunaa beenu, mosi wuri na mukuunga, wakaka wuri na nyikusulu, mukimi wuri na nyabusulu, wuni wuri na ma kuleele mu ndiinga, wakaka wuri na mambangukulu: myominso miyirimina mu ntuungulu.

²⁷ Mbuti muutu wudzoonso mu ndiinga, baba boolo bunu pe batatu, lo muutu-muutu kaba na kilookolo kyaandi, na kuba muutu wubaangula.

²⁸ Ngo mbuti, kwahele wubaangula, lo bawura ha lukutukunu, muutu-muutu kadzoonso kuri nde-meene na kuri Nzaambi.

²⁹ Babikiri ngo bari, boolo bunu pe batatu badzoonso, na baatu bakaka bafyongokono.

³⁰ Mbuti kuri muutu mukimi wadzakala, ngo kabakiri nyabusulu, lo watete wuri mu kudzoonso kawura.

³¹ Mukwongo, beenu-banso lo lubikuri mosi-mosi, mpisi heki bobanso bataambula nyikusulu na nsyamusunu.

³² Mampeeve ma babikiri mari matumuma kuri babikiri,

³³ bukuri Nzaambi, kari Nzaambi ya kisaangila ko, ngo ya kiyeengi. Bunu buri mu mabuundu momanso ma bangisi,

³⁴ bakyeetu bawura mu nkutukunu; mukwongo, bo bahele na miswa mya kudzoonso, kasi bayelemini kuba batumuma, bunu bu leele se Mangisi.

³⁵ Mbuti bari na ma batii kuyika, lo bafuula balumi ba bo-meene mu manzo, bukuri bwahele kuyelemene ti, mukyeetu kadzoonso ha lukutukunu.

³⁶ Buri maampu ma Nzaambi kuri beenu mari manangukina? Hoti kuni kuri beenu mari matubuka?

³⁷ Mbuti muutu wutsima ti nde mubikiri, bunu pe wa kimpeeve, lo kayaaba ti, ma nyiri mu kutinini beenu mamama, lutumu lwa Mfumu luri.

³⁸ Ngo mbuti muutu wahele kuyaaba, lo nde se wahele kuyabakana.

³⁹ Mu didyo, bampaangi baami, beeneenu na kuheme mu kubikula, na yaa lwekabukisa nzoonsulu mu mandiinga ko,

⁴⁰ ngo myominso milutila bunu bwayelemene, na kunsa bunkete.