1 Kol 13 - Musamu Wamubwete 2013

Ntiilu

¹ Mbuti me nyidzoonsaa mandiinga ma baatu, na ma bambasi, ngo nyahele na ntiilu, lo me nyeki nguunga bunu pe ngomo yi bari mu kusika.

² Mbuti me nyiri na kikabu kya kubikula, nyikwebakula mpaanu dzodzinso, nyiri na nyaabulu yoyinso, na nyiri na kanyi dyodinso kuri lo, nyinaanguna na milaandu, ngo nyahele na ntiilu, lo me nyiri wabuunu.

³ Mbuti me nkabiri byobinso bi nyiri na byo, kuri bari na nzala, na mbuti me nyekiri nyutu yaami mpisi nsa kimweese, ngo nyahele na ntiilu, lo myominso mimyo, myahele kubakisa me mu ntoono ti mosi.

⁴ Ntiilu yiri na nkindusulu-mutima, yayibwete, yahele na musoki, ntiilu yahele na nzala-kubila, yahele na masiiku,

⁵ yayirikaa dya nsoni ko, yasakaa ndaandu ya nde-meene ko, yabakaa nkesi ko, yakebaa makooti ko,

⁶ yamonaa kiminu mu bubayi ko, ngo yimonaa kiminu mu ntoono ngwanwa,

⁷ yifuka myominso, yisiila kanyi mu myominso, yiri na nsiitu mu myominso, yikuunda myominso.

⁸ Ntiilu yawaa ko, mbikululu sa dzawa, mandiinga sa mawa, nyaabulu sa yawa.

⁹ Bukuri, mwaa ndaambu kitsu tuyaari, na mwaa ndaambu kitsu tukoobikulaa.

¹⁰ Ngo mbasi-tsuku, nyirimunu yakuka yiisaana, lo bibyo bya ndaambu sa byawa.

¹¹ Ha nyaba mwaa-kilesi, me nyaba kwedzoonsaa bunu mwaa-kilesi, nyaba kwetsimaa bunu mwaa-kilesi, nyaba madyeele ma mwaa-kilesi; ngo bu nyeki wa mukuutu, me mwaasiisa myominso mya bulesi.

¹² Mukwongo, mu lumalu turi mu kwemono mu lumweenye, ngo twahele kuyirika kumono, ngo mbasi-tsuku sa twamono mu miisu na miisu. Mu lumalu me nyaari mwaa-ndaambu, ngo mbasi-tsuku sa Nyirika kuyaaba, bunu bu bari bayirika kuyaaba me se.

¹³ Mu lumalu, byo bitatu bibyo biri: kanyi, nsiitu na ntiilu; ngo mu byo, kibvuriri bunene ntiilu.